އަންހެން ކުދިންގެ ޙައްޤުތައް ރައްކާތެރިކުރުމުގައި ސަރުކާރު ދެމިއޮންނާނެ: ރައީސް މުޢިއްޒު

ބައިނަލްއަޤްވާމީ ގޮތުން ފާހަގަކުރާ އަންހެން ކުދިންގެ ދުވަހުގެ މުނާސަބަތުގައި، އަންހެން ކުދިންގެ ޙައްޤުތައް ރައްކާތެރިކޮށް، އެ ކުދިންނަށް ފުރިހަމަ ކުރިއެރުން ހޯދައިދިނުމަށް ފުރުޞަތުތައް ފަހިކޮށްދިނުމުގައި ސަރުކާރު ދެމިއޮންނާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ކޮންމެ އަހަރެއްގެ ވެސް އޮކްޓޫބަރު މަހުގެ 11 ވަނަ ދުވަހު ފާހަގަކުރާ މި ދުވަހާ ގުޅިގެން، ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ދުނިޔޭގެ އެކި ކަންކޮޅުތަކުގައިވާ އަންހެން ކުދިންގެ ޙައްޤުތައް ކުރިއަރުވައި ރައްކާތެރިކުރުމަށް މި ސަރުކާރުން އަބަދުވެސް ވަކާލާތުކުރާނެ ކަމަށެވެ.

ރައީސުލްޖުމްހޫރިއްޔާ ވިދާޅުވީ، އަންހެން ކުދިންނާއި ޒުވާން އަންހެނުން ބާރުވެރިކުރުވައި، އެ ކުދިންނަކީ މުސްތަޤުބަލުގެ ލީޑަރުންގެ ގޮތުގައި ބިނާކުރުމަށާއި، ޤައުމީ ތަރައްޤީގައި މާނަހުރި ގޮތެއްގައި ބައިވެރިވެވޭނެ ފުރުޞަތުތައް ފަހިކޮށްދިނުމަށް ސަރުކާރުން ސިޔާސަތުތައް އެކަށައަޅައި، އެ މަސައްކަތްތައް ކުރިއަށް ގެންދާނެ ކަމަށެވެ. މީގެއިތުރުން، އަންހެން ކުދިންގެ އުންމީދުތައް ޙާޞިލުކުރުމަށްޓަކައި ރައްކާތެރި އަދި އެހީތެރިކަން ލިބޭނެ މާޙައުލެއް ކަށަވަރުކޮށްދިނުމުގެ މުހިންމުކަން ވެސް އެމަނިކުފާނު ފާހަގަކުރެއްވިއެވެ.

މި ލަނޑުދަނޑިތައް ޙާޞިލުކުރުމުގައި މުޖުތަމަޢުގެ ދައުރު ފާހަގަކުރައްވަމުން ރައީސް ވިދާޅުވީ، އަންހެން ކުދިން ބާރުވެރިކުރުވުމަކީ ޢާއިލާތަކާއި، މުޖުތަމަޢު އަދި ކަމާބެހޭ އެންމެހައި ފަރާތްތައް ގުޅިގެން ކުރަންޖެހޭ މަސައްކަތެއް ކަމަށެވެ.

"މިއަދު އަޅުގަނޑުމެންގެ އަންހެން ދަރިންނަށް ކުރާ އިންވެސްޓްމަންޓަކީ، އެންމެންނަށް ހަމަހަމަ، ޝާމިލު އަދި ފާގަތި މުސްތަޤުބަލަކަށްޓަކައި ކުރެވޭ އިންވެސްޓްމަންޓެއް،" ރައީސް ވިދާޅުވިއެވެ.

ބައިނަލްއަޤްވާމީ އަންހެން ކުދިންގެ ދުވަސް ޚާއްޞަކޮށްފައިވަނީ އަންހެން ކުދިންގެ ޙައްޤުތައް ފާހަގަކުރުމަށާއި، ތަޢުލީމު އުނގެނުމާއި، ރައްކާތެރިކަން ހޯދުމާއި، ހަމަހަމަ ފުރުޞަތުތައް ލިބިގަތުމުގެ އިތުރުން މުޖުތަމަޢުގައި ބައިވެރިވުމުގައި ދުނިޔޭގެ އެކި ކަންކޮޅުތަކުގައި އަންހެން ކުދިންނަށް ކުރިމަތިވާ ގޮންޖެހުންތަކަށް އަލިއަޅުވާލައި، އެކަންކަމަށް ހައްލު ހޯދުމަށެވެ.