ޖީޕީއީގެ ބޯޑު ބައްދަލުވުމުގައި މިނިސްޓަރު ޑރ. އިސްމާޢީލް ޝަފީޢު ބައިވެރިވެވަޑައިގެންފި

ފަރަންސޭސިވިލާތުގެ ޕެރިހުގައި ބޭއްވި ގްލޯބަލް ޕާޓްނަރޝިޕް ފޯ އެޑިއުކޭޝަން (ޖީޕީއީ) ގެ ބޯޑު އޮފް ޑައިރެކްޓަރުންގެ ބައްދަލުވުމުގައި މިނިސްޓަރ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓް ޑރ. އިސްމާޢީލް ޝަފީޢު ބައިވެރިވެވަޑައިގެންފިއެވެ.

މި ބައްދަލުވުމުގައި މިނިސްޓަރު ބައިވެރިވެވަޑައިގަތީ އޭޝިއާ އަދި ޕެސިފިކް ސަރަޙައްދު ތަމްސީލުކުރައްވާ ބޯޑު މެންބަރެއްގެ ހައިސިއްޔަތުންނެވެ. މިއީ ދުނިޔޭގެ ތަޢުލީމީ ދާއިރާ ކުރިއެރުވުމަށް ކުރެވޭ މަސައްކަތްތަކުގައި ރާއްޖެއަށް ލިބިފައިވާ މުހިންމު އަދި ފާހަގަކޮށްލެވޭ ދައުރެކެވެ.

މިނިސްޓަރު ޑރ. އިސްމާޢީލް ޝަފީޢުގެ އަރިހުގައި މި ދަތުރުފުޅުގައި ޓެކްނިކަލް އެޑްވައިޒަރެއްގެ ގޮތުގައި ސްޓޭޓް މިނިސްޓަރު އަޙްމަދު މުޙައްމަދު ބައިވެރިވެވަޑައިގެންނެވިއެވެ. ތިން ދުވަހުގެ މުއްދަތަށް ކުރިއަށްދިޔަ މި ބައްދަލުވުންތަކުގައި، ޖީޕީއީގެ މަސައްކަތްތައް ހިންގާނެ އޮނިގަނޑާއި، ކުރިއަށް އޮތް ދައުރުގައި ރޭވިފައިވާ ޙަރަކާތްތަކުގެ އިތުރުން، ކުރިއަށް އޮތް އަހަރުތަކަށް ލަފާކުރާ ބަޖެޓާ ގުޅޭގޮތުން މުހިންމު މަޝްވަރާތަކެއް ކުރެވި، ގޮތްތަކެއް ނިންމާފައިވެއެވެ.

ގްލޯބަލް ޕާޓްނަރޝިޕް ފޯ އެޑިއުކޭޝަން (ޖީޕީއީ) އަކީ ތަރައްޤީވަމުން އަންނަ ޤައުމުތަކުގެ ތަޢުލީމީ ނިޒާމުތައް ހަރުދަނާކުރުމަށް ހިލޭ އެހީ ފޯރުކޮށްދޭ ދުނިޔޭގެ އެންމެ ބޮޑު އެއް ބައިނަލްއަޤްވާމީ ފަންޑެވެ. މިއީ ދުނިޔޭގެ އެކި ޤައުމުތަކުގެ ސަރުކާރުތަކާއި، މަދަނީ ޖަމްޢިއްޔާތަކާއި، ބައިނަލްއަޤްވާމީ އެހީދޭ ފަރާތްތައް ގުޅިގެން، ކޮންމެ ކުއްޖަކަށް ފެންވަރު ރަނގަޅު ތަޢުލީމެއް ފޯރުކޮށްދިނުމަށްޓަކައި ކުރިއަށްގެންދާ ވަރަށް މުހިންމު އިސްނެގުމެކެވެ.