ލަންކާ މަގުން ކޮންޓޭނަރު ގެނައުމުގައި ހުރި ދަތިތަކަށް ހައްލެއް ލިބިއްޖެ: އެމްޕީއެލް

ކޮލަންބޯ ބަނދަރުން ރާއްޖެއަށް ކޮންޓޭނަރު ގެނައުމުގައި ދިމާވެފައިވާ ދަތިތަކަށް މިހާރު ހައްލެއް ލިބިފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފިއެވެ.

އެމްޕީއެލް އިން ބުނި ގޮތުގައި މާލޭ ވިޔަފާރި ބަނދަރަށް މުދާ އުފުލާ އުޅަނދުތައް އަންނަ މިންވަރު މިއަހަރުގެ ކުރީކޮޅުން ފެށިގެން އިތުރުވުމާ ގުޅިގެން، މުދާ ބޭލުމުގައި ގޮންޖެހުންތަކެއް ކުރިމަތިވިއެވެ. ޚާއްޞަކޮށް ބައެއް އުޅަނދުތަކުން ކުރިއަށްވުރެ ގިނަ އަދަދަކަށް ކޮންޓޭނަރު އެއްފަހަރާ ގެންނަން ފެށުމުން، ބަނދަރުގައި މުދާ ބޭލުމަށް ހޭދަވާ ދުވަސް އިތުރުވެގެން ދިޔަކަން އެ ކުންފުނިން ފާހަގަކުރިއެވެ. އަދި ބަނދަރުގެ ޖާގައިގެ ދަތިކަމުގެ ސަބަބުން، ޑިމާންޑާ އެއްވަރަށް ޚިދުމަތް ދިނުމުގައި ވެސް ދަތިތަކެއް ހުރި ކަމަށް އެމްޕީއެލް އިން ބުންޏެވެ.

ނަމަވެސް، އެމްޕީއެލްގެ އޮޕަރޭޝަންސް ޓީމުތަކުން ކުރި މަސައްކަތުން، މިއަހަރުގެ އޭޕްރިލް މަހުން ފެށިގެން ކޮޅުނބު ބަނދަރުގައި ތާށިވެފައި ހުރި 4،000 އަށްވުރެ ގިނަ ޓީއީޔޫ (ކޮންޓޭނަރު) މިހާރު ވަނީ ރާއްޖެ ގެނެސްފައެވެ. މިއާއެކު، މާލެ އާއި ކޮޅުނބާ ދެމެދު ދަތުރުކުރާ މުދާ އުފުލާ ބޯޓުތައް މިހާރު އާންމު ޝެޑިއުލްގެ ދަށުން ދަތުރުކުރަން ފަށާފައިވާ ކަމަށް އެ ކުންފުނިން ބުންޏެވެ.

ވިޔަފާރި ބަނދަރުގެ ޖާގައިގެ ދަތިކަމަށް ވަގުތީ ހައްލެއް ހޯދުމުގެ މަސައްކަތް ކުރަމުންދާއިރު، ސަރުކާރުން ވަނީ މާލޭ ވިޔަފާރި ބަނދަރު އަންނަ އަހަރުގެ ނޮވެމްބަރު މަހުގެ ނިޔަލަށް ތިލަފުއްޓަށް ބަދަލުކުރުމަށް ނިންމާފައެވެ. މި މަޝްރޫޢުގެ ފުރަތަމަ ފިޔަވަހީގެ މަސައްކަތް ޗައިނާގެ ޗައިނާ ހާބަރ އިންޖިނިއަރިންގ ކޮމްޕެނީ (ސީއެޗްއީސީ) އާ ހަވާލުކޮށްފައިވާއިރު، ބަނދަރުގެ 100 މީޓަރުގެ ކީވޯލް ހެދުމާއި އެ ސަރަހައްދުގައި ގާ އެތުރުމުގެ މަސައްކަތް ހަވާލުކޮށްފައިވަނީ އެމްޓީސީސީއާއެވެ.

އެމްޕީއެލް އިން ބުނީ ތިލަފުށީގައި ތަރައްޤީކުރާ ބަނދަރުގެ މި ސަރަހައްދުގެ މަސައްކަތް މިއަހަރުގެ އޮކްޓޯބަރު މަހަށް ނިންމުމަށް އަމާޒު ހިފާފައިވާ ކަމަށެވެ. މި މަސައްކަތް ނިމުމުން، ކަނޑުމަގުން ގެންނަ މުދާ ކްލިއަރ ކުރުމުގެ ޚިދުމަތް އެ ސަރަހައްދުން ދޭން ފަށާނެއެވެ. އަދި މުޅި މަޝްރޫޢު ނިމުމުން، މި ސަރަހައްދު ބޭނުންކުރާނީ އެމްޕީއެލްގެ އުޅަނދުތަކަށް ޚާއްޞަ "ސަރވިސް ކީ" އެއްގެ ގޮތުގައެވެ.

ތިލަފުށިން އެމްޕީއެލްއަށް ލިބިފައިވާ 20 ހެކްޓަރުގެ ބިމުގައި ކުރިއަށްގެންދާ މި މަޝްރޫޢުގެ ފުރަތަމަ ފިޔަވަހި ނިމުމުން، މުދާ އުފުލާ ބޯޓުތައް ކްލިއަރ ކުރުމަށް މިހާރު ހޭދަވާ 5 ނުވަތަ 6 ދުވަހުގެ ބަދަލުގައި، އެ މަސައްކަތް 48 ގަޑިއިރުގެ ތެރޭގައި ނިންމާލެވޭނެ ކަމަށް އެމްޕީއެލް އިން ލަފާކުރެއެވެ.