އޭޝިއާ-ޕެސިފިކް މީޑިއާ ސަމިޓުގެ ސަބް-ފޯރަމްތައް ފަށައިފި

އޭޝިއާ-ޕެސިފިކް މީޑިއާ ސަމިޓުގެ ހަރަކާތްތައް ރަސްމީކޮށް ފެށި، އޭގެ ތެރެއިން ސަބް-ފޯރަމްތައް ބާއްވަން ފަށައިފިއެވެ.

މިއަހަރުގެ ސެޕްޓެމްބަރު މަހުގެ 3 އިން 5 އަށް ޗައިނާގައި ކުރިއަށްދާ މި ސަމިޓުގެ ރަސްމީ ހުޅުވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ސެޕްޓެމްބަރު 5 ގައެވެ. ނަމަވެސް، ރަސްމީކޮށް ސަމިޓު ހުޅުވުމުގެ ކުރިން އެކި ސަރަޙައްދުތަކަށް ބަހާލައިގެން ކުރިއަށްގެންދާ ސަބް-ފޯރަމްތައް މިހާރު ވަނީ ފަށާފައެވެ. މި ފޯރަމްތައް ކުރިއަށްދަނީ ޗައިނާގެ ގުއާންގްޒޯ، ޓޮންގްގުއާން އަދި ޒޫހައިގައެވެ.

ގުއާންގްޒޯގައި ބޭއްވި ސަބް-ފޯރަމް ހުޅުވުމުގެ ރަސްމިއްޔާތުގައި ދިވެހިރާއްޖެއިން ޗައިނާއަށް ކަނޑައަޅުއްވާފައި ހުންނަވާ ސަފީރު ޑރ. ފަޒީލް ނަޖީބާއި، ޕަބްލިކް ސަރވިސް މީޑިއާ (ޕީއެސްއެމް) ގެ ޗެއަރޕަރސަން އާމިނަތު ނަމްޒާ ބައިވެރިވެވަޑައިގެންނެވިއެވެ. މި ފޯރަމްގެ ތެރެއިން ދެ ޕެނަލް ޑިސްކަޝަނެއް ކުރިއަށް ގެންގޮސްފައިވާއިރު، މި މަޝްވަރާތައް މައިގަނޑު ގޮތެއްގައި އަމާޒުކޮށްފައިވަނީ އޭޝިއާ-ޕެސިފިކް ސަރަޙައްދުގެ އެއްބާރުލުން އިތުރުކުރުމަށާއި، ސަރަޙައްދީ ތަރައްޤީގެ އައު ބާރަކަށް އާޓިފިޝަލް އިންޓެލިޖެންސް (އޭއައި) ހެދުމަށް ކުރެވިދާނެ ކަންކަމުގެ މައްޗަށެވެ. މި ޕެނަލް މަޝްވަރާތަކުގައި ސަފީރު ޑރ. ފަޒީލް ވެސް ބައިވެރިވެވަޑައިގެންނެވިއެވެ.

މި ސަބް-ފޯރަމްތަކަކީ ބައިވެރިންނަށް ތަފާތު ތަޖުރިބާތަކެއް ހޯދައިދިނުމުގެ ގޮތުން، އެ ސަރަޙައްދުތަކުގެ އިޤްތިޞާދީ އަދި ޝަހަރީ ތަރައްޤީ ފެންނަ މުހިންމު ތަންތަނަށް ޒިޔާރަތްކުރުމުގެ ފުރުޞަތު ވެސް ލިބިގެންދާ ގޮތަށް އިންތިޒާމުކުރެވިފައިވާ ހަރަކާތްތަކެކެވެ.

"ބިލްޑިންގ ދަ ރޯޑް ޓު ޕްރޮސްޕަރިޓީ އޮފް ދި އޭޝިއާ-ޕެސިފިކް ކޮމިއުނިޓީ ތްރޫ މީޑިއާ ކޮންސެންސަސް އެންޑް އެކްޝަން" މި ޝިޢާރުގެ ދަށުން ބާއްވާ މި ސަމިޓަކީ ޗައިނާގެ ސެންޓްރަލް ޕްރޮޕެގެންޑާ ޑިޕާޓްމަންޓާއި، ޒިންހުއާ ނިއުސް އެޖެންސީ އަދި ގުއާންގްޑޮންގް ޕްރޮވިންޝަލް ގަވަރމަންޓް ގުޅިގެން އިންތިޒާމުކުރާ ސަމިޓެކެވެ.

މިއަހަރުގެ ސަމިޓުގައި އޭޝިއާ-ޕެސިފިކް ސަރަޙައްދުގެ 42 ޤައުމަކުން 220 މީޑިއާ އިދާރާއެއް ތަމްސީލުކުރާ 400 އަށްވުރެ ގިނަ މަންދޫބުން ބައިވެރިވެއެވެ. އޭގެ ތެރޭގައި ބައިނަލްއަޤްވާމީ މީޑިއާ ކުންފުނިތަކާއި، މީޑިއާ ދާއިރާއަށް ޚާއްޞަ ޔުނިވަރސިޓީތަކާއި، ސަރުކާރުގެ މުއައްސަސާތަކުގެ އިތުރުން އދ. ގެ އެކި އިދާރާތަކާއި ބައިނަލްއަޤްވާމީ ޖަމްޢިއްޔާތަކުގެ މަންދޫބުން ހިމެނެއެވެ.