ޢާޝޫރާ ދުވަހުގެ ބަރަކާތާއި ފިލާވަޅުތައް ލިބިގަތުމަށް މިއަދުގެ ހުކުރު ޚުޠުބާގައި ގޮވާލައިފި

މުޙައްރަމު މަހުގެ ދިހަވަނަ ދުވަސް ނުވަތަ ޢާޝޫރާ ދުވަހަކީ އިލާހީ ނަޞްރާއި، އީމާންކަމުގެ ވަރުގަދަ ފިލާވަޅުތަކުން ފުރިގެންވާ ދުވަހެއްކަން ބަޔާންކޮށް، އެ ދުވަހުގެ ބަރަކާތް ހޯދުމަށް މިއަދުގެ ހުކުރު ޚުޠުބާގައި ރާއްޖޭގެ އެންމެހާ މުސްލިމް އަޚުންނަށް ގޮވާލައިފިއެވެ.

04 މުޙައްރަމް 1448 (19 ޖޫން 2026) ވީ ހުކުރު ދުވަހު މުޅި ރާއްޖޭގައި އިއްވި ޚުޠުބާ ބިނާކޮށްފައިވަނީ ޢާޝޫރާ ދުވަހުގެ މާތްކަމާއި އެ ދުވަހާ ގުޅިފައިވާ ތާރީޚީ މުހިންމު ހާދިސާތަކުގެ މައްޗަށެވެ.

ޚުޠުބާ ފަށްޓަވަމުން ވަނީ މާތް اللهއަށް ބިރުވެތިވެ، ތަޤުވާވެރިވުމަށް ވަޞިއްޔަތްކޮށްފައެވެ. އަދި އެއްވެސް ނަފުސަކަށް އަނެއް ނަފުސަކަށް އެއްވެސް ކަމެއް ކޮށްނުދެވޭނޭ، ހަމައެކަނި اللهގެ އަމުރުފުޅު ހިނގާނޭ ޤިޔާމަތް ދުވަހަށް ތައްޔާރުވުމަށް ހަނދާންކޮށްދީފައެވެ.

މިއަދުގެ ޚުޠުބާގައި ބަޔާންކުރި ގޮތުގައި، ޢާޝޫރާ ދުވަހަކީ އަނިޔާވެރި ފިރުޢައުނުގެ ކިބައިން މޫސާގެފާނާއި އެކަލޭގެފާނަށް ތަބާވީ މީހުން މާތް الله ސަލާމަތްކޮށްދެއްވި ދުވަހެވެ. އަދި ފިރުޢައުނާއި އޭނާގެ ލަޝްކަރު ކަނޑަށް ޣަރަޤުކުރެއްވި ދުވަހެވެ. މި ހާދިސާއިން ލިބޭ އެންމެ ބޮޑު ފިލާވަޅަކީ، ކޮންމެ މުޞީބާތަކުން ވެސް ސަލާމަތްވެވޭނީ އީމާންކަމާއި އިސްލާމްކަމުގެ ސަބަބުން ކަމާއި، މާތް اللهއަށް އިތުބާރުކޮށްގެން މެނުވީ ދެ ދުނިޔޭގެ ސަލާމަތެއް ނެތްކަން ކަމުގައި ޚުޠުބާގައި ފާހަގަކުރިއެވެ.

މުޙައްރަމް މަހުގެ މާތްކަމަށް އަލިއަޅުވާލަމުން ޚުޠުބާގައި ބުނީ، މިއީ الله ޙުރުމަތްތެރި ކުރައްވާފައިވާ ހަތަރު މަހުގެ ތެރެއިން މަހެއް ކަމަށެވެ. އަދި ކީރިތި ރަސޫލާ ﷺ މަދީނާއަށް ހިޖުރަކުރެއްވިއިރު، ޔަހޫދީން މޫސާގެފާނަށް ނަޞްރު ލިބުނު ދުވަހުގެ އުފަލުގައި ރޯދަ ހިފާތީ ފެނިވަޑައިގަތުމުން، އެކަލޭގެފާނަށް މާ ބޮޑަށް ޙައްޤުކަން ބޮޑީ މުސްލިމުންކަން ބަޔާންކުރައްވައި، އެ ދުވަހު ރޯދަހިފުމަށް އަމުރުކުރެއްވިކަން ހަނދާންކޮށްދިނެވެ.

ޢާޝޫރާ ދުވަހު ރޯދަހިފުމުގެ ސަވާބާ ބެހޭގޮތުން ޚުޠުބާގައި ބުނީ، އެއީ ވޭތުވެދިޔަ އަހަރުގެ ކުދި ފާފަތައް ފުއްސަވައިދެއްވާނެ ކަމެއް ކަމަށެވެ. އަދި ރޯދަހިފުމުގައި އެންމެ އިސްކަންދޭންވީ ގޮތަކީ ޢާޝޫރާ ދުވަހުގެ ކުރިއަށް ނުވަތަ ފަހަށް ދުވަހެއް އިތުރުކޮށްގެން، ޔަހޫދީންނާ ޚިލާފަށް ރޯދަހިފުން ކަމުގައި ވެސް ބަޔާންކުރިއެވެ.

ޚުޠުބާ ނިންމާލަމުން ވަނީ ޢާޝޫރާ ދުވަހާއި މުޙައްރަމް މަހާ ގުޅުވައިގެން މުޖުތަމަޢުގެ ތެރެއަށް ފެތުރެމުންދާ ބިދުޢަތަކާއި ދީނާ ޚިލާފު އާދަކާދަތަކަށް ސަމާލުވުމަށް ގޮވާލާފައެވެ. ވަކިން ޚާއްޞަކޮށް، ހިތާމަ ފާޅުކުރުމުގެ ގޮތުން ކުރެވޭ ދީނާ ޚިލާފު ކަންކަމަކީ އިސްލާމީ އުޞޫލުތައް އޮޅުވާލުމަށް ދީނުގެ ދުޝްމަނުން ތަޢާރުފުކޮށްފައިވާ ކަންކަން ކަމަށް ޚުޠުބާގައި އިންޒާރު ދިނެވެ. އެހެންކަމުން، ރަސޫލާ ﷺ ދެއްކެވި މަގުން ހަމައެކަނި ރޯދަހިފުމާއި އަޅުކަމުގައި ދެމިތިބުމަށް އެންމެހާ މުސްލިމުންނަށް މިއަދުގެ ޚުޠުބާގައި ނަޞޭޙަތްތެރިވިއެވެ.