ކޮޅުވެއްޓި ބަންޑުން ޖަހާލި ހާދިސާ: ގެއްލުނު 3 ވަނަ މީހާގެ ހަށިގަނޑު ވެސް ފެނިއްޖެ
މިދިޔަ ބުދަ ދުވަހުގެ ރޭ މެންދަމު، ކޮޅުވެއްޓިއެއް ބަންޑުން ޖަހާލި ޙާދިސާގައި ގެއްލުނު މީހުންގެ ތެރެއިން، 3 ވަނަ މީހާގެ ހަށިގަނޑުވެސް ފެނިފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.
އެމްއެންޑީއެފް އިން އެކްސްއަށް ކުރި ޕޯސްޓެއްގައި ބުނެފައިވަނީ ހަށިގަނޑު ފެނިފައިވަނީ އޮޔާދަނިކޮށް ކަމަށެވެ. އެގޮތުން ބަންޑުން ޖަހާލައި، އަޑިއަށް ދިޔަ އަލްމާކް-ފިޔަ ލޭންޑިންގ ކްރާފްޓުން ގެއްލިގެން ހޯދަމުންދިޔަ ތިންވަނަ މީހާގެ ހަށިގަނޑު ފެނިފައިވަނީ މާލެ އަތޮޅު އާއިލާފުށްޓާއި ވިލާ ނޮޓިކާއާ ދެ ރަށް ދޭތެރެއިން ކަމަށް ވެސް ބުނެފައިވެއެވެ.
ބުރާސްފަތި ދުވަހުގެ ފަތިހު މި ކޮޅުވެއްޓި ދަތުރުކުރަމުން ދިޔައީ މާލެ އަތޮޅު އެރިޔަދޫއަށެވެ. ކޮޅުވެއްޓީގައި 7 މީހަކު ދަތުރުކުރަމުން ދިޔައިރު އެރޭ 4 މީހުން ސަލާމަތްކޮށްފައިވެއެވެ.
މި ހާދިސާގައި ތިން މީހުން ގެއްލިގެން ހޯދަމުން ދިޔައިރު، އެ ދުވަހު ހެނދުނުގެ ވަގުތެއްގައި ފުރަތަމަ ފެނިފައިވަނީ ދިވެހި މީހާގެ ހަށިގަނޑެވެ. އެއަށްފަހު އިންޑިއާ މީހާގެ ހަށިގަނޑު އެ ދުވަހު މެންދުރު ވަގުތެއްގައި ވަނީ ފެނިފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
