ބަރަކާތްތެރި ޙައްޖު ދުވަހުގެ މުނާސަބަތުގައި ރައީސުލްޖުމްހޫރިއްޔާގެ ދެކަނބަލުން ތަހުނިޔާ ފޮނުއްވައިފި

މިއަހަރުގެ ބަރަކާތްތެރި ޙައްޖު ދުވަހުގެ މަތިވެރި މުނާސަބަތާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ދިވެހި ޙައްޖާޖީންނަށާއި މުޅި އިސްލާމީ އުންމަތަށް ތަހުނިޔާ އާއި ހެޔޮދުޢާ ފޮނުއްވައިފިއެވެ.

ރައީސުލްޖުމްހޫރިއްޔާ މި ތަހުނިޔާ ފޮނުއްވީ މިއަދު އެކްސް މެދުވެރިކުރައްވައި ކުރެއްވި ޕޯސްޓެއްގައެވެ. ރައީސުލްޖުމްހޫރިއްޔާގެ މެސެޖު ފެއްޓެވީ "ލަބްބައިކަ ﷲުމަ ލަބްބައިކް" ނުވަތަ "އަޅުގެ ވެރި ރަސްކަލާނކޮ! އިޖާބަދީގެން އަޅާ އިބަރަސްކަލާނގެ ޙަޟްރަތަށް ހާޒިރުވެއްޖައީމެވެ" މި މަތިވެރި ތަލްބިޔާ އާ އެކުގައެވެ. އެމަނިކުފާނު ވަނީ މި ބަރަކާތްތެރި ދުވަހުގެ ހެޔޮ ދަރުމައާއި ޘަވާބު ދިވެހި ރައްޔިތުންނަށް ލިބިދެއްވުމަށާއި، މުޅި ދިވެހި ގައުމަށް މާތްﷲގެ ރަޙްމަތާއި ބަރަކާތް މިންވަރުކުރެއްވުމަށްވެސް އެމަނިކުފާނު އެދިވަޑައިގަތެވެ.

މީގެ އިތުރުން، ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ކުރެއްވި ޕޯސްޓެއްގައި، ޙައްޖުގެ މާތް އަޅުކަން އަދާކުރަމުންދާ އެންމެހައި ދިވެހި ޙައްޖާޖީންނަށް "މަބްރޫރު ޙައްޖެއް" މިންވަރުކުރެއްވުމަށް އެދި ދުޢާކުރެއްވިއެވެ. އަދި މި ބަރަކާތްތެރި ދުވަހުގެ ހެޔޮ ދަރުމައާއި ރަޙްމަތް، ދިވެހި ކޮންމެ އުޚުތަކާއި އަޚަކަށް އަދި މުޅި އިސްލާމީ އުންމަތަށް ލިބިދެއްވުން އެދިވަޑައިގަންނަވާފައިވެއެވެ.