ޕީއެންސީގެ ލީޑަރޝިޕް މަގާމުތަކަށް އިންތިޚާބުވި އަދި އައްޔަންކުރި ބޭފުޅުން ހުވާކުރައްވައިފި

ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެކި މަގާމުތަކަށް އިންތިޚާބުވި މެންބަރުންނާއި، ޕާޓީގެ އަސާސީ ގަވާއިދުގެ ދަށުން ލީޑަރޝިޕްގެ މަގާމުތަކަށް އައްޔަންކުރެއްވި ބޭފުޅުން މަގާމުގެ ހުވާކުރައްވައިފިއެވެ.

އަލަށް މަގާމުތަކާ ހަވާލުވެވަޑައިގެންނެވި ބޭފުޅުން ހުވާކުރެއްވުން އޮތީ ޕީއެންސީ ކޮންގްރެސްގެ ތެރެއިން ބޭއްވި ޚާއްސަ ޖަލްސާއެއްގައެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުޙައްމަދު މުޢިއްޒެވެ.

މި ރަސްމިއްޔާތުގައި ޕީއެންސީގެ ލީޑަރޝިޕްގެ މެންބަރުންނާއި، ވަޒީރުންގެ ފެންވަރުގައި ޕާޓީގެ އިސް މަގާމުތަކަށް އައްޔަންކުރެއްވި ބޭފުޅުންނާއި، ސަރުކާރު ކުންފުނިތަކުގެ މެނޭޖިންގ ޑިރެކްޓަރުން އަދި ސީއީއޯއިންގެ ތެރެއިން އައްޔަންކުރެއްވި ބޭފުޅުން ބައިވެރިވެވަޑައިގެންނެވިއެވެ. މީގެއިތުރުން ރައްޔިތުންގެ މަޖިލީހަށް އިންތިޚާބުވެފައިވާ މެންބަރުން ވެސް ވަނީ ހުވާކުރައްވާފައެވެ.

ޕީއެންސީގެ އިސް ލީޑަރޝިޕްގައި ހިމެނިވަޑައިގަންނަވަނީ ޕާޓީގެ ޗެއަރޕާސަން، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި، ސީނިއަރ ޑެޕިއުޓީ ލީޑަރުންގެ ގޮތުގައި ނައިބު ރައީސް ޙުސައިން މުޙައްމަދު ލަޠީފް އަދި ޕީޖީ ލީޑަރު އިބްރާހީމް ފަލާޙެވެ. މީގެއިތުރުން ސެކްރެޓަރީ ޖެނެރަލް މޫސާ ފަތުޙީ އާދަމާއި، ޑެޕިއުޓީ ސެކްރެޓަރީ ޖެނެރަލް މުޙައްމަދު ލަމްޢާން އަދި ޚަޒާންދާރު ޙުސައިން ފަހުމީ ވެސް ހިމެނިވަޑައިގަންނަވައެވެ.

ޕާޓީގެ ނައިބު ރައީސުންގެ ގޮތުގައި ހޮވިވަޑައިގެންނެވި 6 ބޭފުޅުންނަކީ ވަޒީރު ޢަބްދުﷲ ރާފިޢު، ވަޒީރު އަޙްމަދު ޝިޔާމް، ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާޠިމަތު ސަޢުދާ، ބާރަށު ދާއިރާގެ މެންބަރު އިބްރާހީމް ޝުޖާޢު، ވަޒީރު މުޙައްމަދު ސަޢީދު އަދި ޗީފް ސްޕޯކްސްޕާސަން މުޙައްމަދު ޙުސައިން ޝަރީފެވެ.

ޕާޓީގެ ރައީސްގެ ހައިސިއްޔަތުން ވަޒީރުންނާއި ވަޒީރުންގެ ފެންވަރުގެ މަގާމުތަކުން އައްޔަންކުރެއްވި 7 ބޭފުޅުންނަކީ ޗީފް އޮފް ސްޓާފް ޢަބްދުﷲ ފަޔާޟް، މިނިސްޓަރ އެޓް ދަ ޕްރެޒިޑެންޓްސް އޮފީސް ޢަބްދުﷲ ނާޞިރު، ވަޒީރު މުޙައްމަދު އަމީން، ވަޒީރު ޢަލީ ޖީލާ، ވަޒީރު ޑރ. ޢަބްދުﷲ މުއްޠަލިބް، ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް މުޙައްމަދު ޠޮލާލް އަދި ޤަޠަރުގައި ހުންނަވާ ސަފީރު އާދަމް ޝަރީފް ޢުމަރެވެ. ކުންފުނިތަކުގެ އިސްވެރިންގެ ތެރެއިން އައްޔަންކުރެއްވީ ޢަބްދުއްރައްޒާޤު ޙަލީމް، ޢަލީ ޒުހައިރު އަދި ހަމްދާން ޝަކީލެވެ. މީގެ އިތުރުން އަންހެނުންނާއި ޒުވާނުންގެ ގޮފީގެ އިސް ބޭފުޅުންނާއި ސްޓިއަރިންގ ކޮމިޓީތަކަށް ހޮވުނު ފަރާތްތަކުން ވެސް މި ޖަލްސާގައި ހުވާކުރެއްވިއެވެ.