މާލެ ސަރަހައްދުގައި އިތުރު ސޯޝަލް ހައުސިންގ މަޝްރޫޢެއް ކުރިއަށް ގެންދިއުމަށް ސަރުކާރުން ނިންމައިފި

މާލެ ސަރަހައްދުގައި ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށްޓަކައި، އިތުރު ސޯޝަލް ހައުސިންގ މަޝްރޫޢެއް ފެށުމަށް ސަރުކާރުން ރާވަމުންދާކަން މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްގެ ސްޓޭޓް މިނިސްޓަރު އަޙްމަދު ނާޒިމް މުޙައްމަދު ހާމަކުރައްވައިފިއެވެ.

ދައުލަތުގެ މީޑިއާގައި ވާހަކަދައްކަވަމުން ނާޒިމް ވިދާޅުވީ، ބޭންކް އޮފް މޯލްޑިވްސް (ބީއެމްއެލް) ގެ ސަބްސިޑިއަރީ ކުންފުންޏެއް ކަމަށްވާ ބީއެމްއެލް އެފޯޑަބަލް ހޯމް ލީސިންގ ކޮމްޕެނީ މެދުވެރިކޮށް، މާލެއާއި ވިލިމާލޭގައި 3,260 ހައުސިންގ ޔުނިޓް އެޅުމުގެ މަސައްކަތް މިހާރުވެސް ފެށިގެން ކުރިއަށްދާ ކަމަށެވެ. މާލެ ސަރަހައްދުގެ ރައްޔިތުންނަށް ކުރިމަތިވެފައިވާ އެންމެ ބޮޑު ގޮންޖެހުމަކީ ބޯހިޔާވަހިކަންކަން ފާހަގަކުރައްވައި، އެ ފުރުސަތުތައް ފުޅާކުރުމަށް ސަރުކާރުން މެދުނުކެނޑި މަސައްކަތް ކުރަމުންދާކަމަށް އޭނާ ވިދާޅުވިއެވެ.

ސްޓޭޓް މިނިސްޓަރު އިތުރަށް ވިދާޅުވީ، އިތުރު ބޯހިޔާވަހިކަމުގެ މަޝްރޫޢުތައް ހިންގުމަށްޓަކައި ބިން ހަމަޖެއްސުމާ ގުޅޭގޮތުން ބީއެމްއެލްއާއެކު މަޝްވަރާތައް ކުރެވެމުންދާ ކަމަށެވެ. އަދި ކުރިއަށް އޮތް ތަނުގައި ހިންގާ މަޝްރޫޢުތައް ބިނާވާނީ އެ ކުންފުނީގެ މާލީ ގާބިލުކަން ހުރި މިންވަރެއްގެ މައްޗަށް ކަމަށްވެސް އޭނާ ފާހަގަކުރެއްވިއެވެ.

ސަރުކާރުގެ އަމާޒަކީ މާލެ ސަރަހައްދުގައި ޖުމްލަ 4,000 ހައުސިންގ ޔުނިޓް ތަރައްޤީކުރުން ކަމަށް ނާޒިމް ވިދާޅުވިއެވެ. މީގެ އިތުރުން ގުޅީފަޅާއި އެހެނިހެން ސަރަހައްދުތަކުގައިވެސް ބޯހިޔާވަހިކަމުގެ މަޝްރޫޢުތައް ކުރިއަށްދާކަން ފާހަގަކުރައްވައި، ބިން ލިބޭ މިންވަރަކުން އިތުރު މަޝްރޫޢުތައް ފައްޓަވާނެ ކަމަށް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ދައުރު ނިމުމުގެ ކުރިން މިހާރު ކުރިއަށްދާ ހުރިހާ މަޝްރޫޢުތަކެއް ނިންމައި، ރައްޔިތުންނަށް ހަވާލުކުރެވޭނެ ކަމުގެ ފުރިހަމަ ޔަގީންކަން ސްޓޭޓް މިނިސްޓަރު ނާޒިމް ދެއްވިއެވެ. ސަރުކާރުން އެންމެ ބޮޑު އިސްކަމެއް ދެނީ ރައްޔިތުންގެ ބޯހިޔާވަހިކަމުގެ ބޭނުންތަކަށް ހައްލެއް ހޯދައިދިނުމަށް ކަމަށްވެސް އޭނާ ވިދާޅުވިއެވެ.