ޒުވާނުންނަކީ މުސްތަޤުބަލަށްޓަކައި ކުރެވޭނެ އެންމެ މުހިންމު އިންވެސްޓްމަންޓް: ޑރ. ޝަހީމް

މުޖުތަމައެއްގެ މުސްތަޤުބަލު އަމާންކުރުމަށްޓަކައި ކުރެވޭނެ އެންމެ މުހިންމު މަސައްކަތަކީ ޒުވާނުން ބިނާކުރުން ނުވަތަ ޒުވާނުންނަށް އިންވެސްޓްކުރުން ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ މެލޭޝިޔާގައި ކުރިއަށްދާ "ތާޑް އިންޓަރނޭޝަނަލް ސަމިޓް އޮފް ރިލިޖަސް ލީޑަރސް 2026" ގެ ތެރެއިން ބޭއްވި ބައިނަލްއަޤުވާމީ ޒުވާނުންގެ ކޮންފަރެންސްގައި ތަޤުރީރު ކުރައްވަމުންނެވެ. މި ސަމިޓަކީ މުސްލިމް ވޯލްޑް ލީގުގެ ދައުވަތަކަށް ވަޒީރު ބައިވެރިވެވަޑައިގަންނަވާ ބައްދަލުވުމެކެވެ.

ޑރ. ޝަހީމްގެ ތަޤުރީރުގައި، މިޒަމާނުގެ ގޮންޖެހުންތަކާ ކުރިމަތިލުމަށާއި، ޑިޖިޓަލް އިންގިލާބާއި އާޓިފިޝަލް އިންޓެލިޖެންސްގެ ރޮނގުން ކުރިއަށްދިއުމަށްޓަކައި ޒުވާނުންނަށް ބޭނުންވާ ޢިލްމާއި، އަޚުލާޤީ ސިފަތަކާއި އަދި އަމަލީ ހުނަރުތައް ފޯރުކޮށްދިނުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ. އަދި ޒުވާނުން ބާރުވެރިކުރުވުމަކީ މުޖުތަމައުތައް ވަރުގަދަކޮށް، ދެމެހެއްޓެނިވި އިޖުތިމާޢީ ތަރައްޤީއަށް މަގުފަހިކޮށްދޭ ދިގު މުއްދަތުގެ އިންވެސްޓްމަންޓެއްކަން އެމަނިކުފާނު ފާހަގަކުރެއްވިއެވެ.

މި ކޮންފަރެންސް އިންތިޒާމުކުރެއްވި ކަމަށްޓަކައި މެލޭޝިޔާ ސަރުކާރަށާއި، ބޮޑުވަޒީރު ޑރ. އަންވަރު އިބްރާހީމަށާއި، އެޤައުމުގެ ދީނީ ކަންތައްތަކާ ބެހޭ ވުޒާރާއަށް ވަޒީރު ޝުކުރު އަދާކުރެއްވިއެވެ. މީގެ އިތުރުން، އިސްލާމްދީނާއި މުސްލިމުންގެ ޚިދުމަތުގައި ސައުދީ އަރަބިއްޔާއިން ކުރަމުންދާ މަސައްކަތްތަކާއި، މެދުމިނުގެ ސިޔާސަތު ކުރިއެރުވުމަށް ދެ ހަރަމްފުޅުގެ ޚާދިމް ސަލްމާން ބިން ޢަބްދުލްޢަޒީޒް އާލް ސުޢޫދާއި ވަލީއަހުދު މުޙައްމަދު ބިން ސަލްމާން ކުރައްވާ މަސައްކަތްޕުޅުތަކަށްޓަކައި ވަޒީރު ވަނީ ތައުރީފު ކުރައްވާފައެވެ.

ދުނިޔޭގެ 31 ޤައުމަކުން 1,500 އަށްވުރެ ގިނަ ދީނީ އިލްމުވެރިންނާއި ލީޑަރުން ބައިވެރިވާ މި ސަމިޓަކީ މެލޭޝިޔާގެ ބޮޑުވަޒީރުގެ އޮފީހާއި، މުސްލިމް ވޯލްޑް ލީގާއި، މެލޭޝިޔާގެ މިނިސްޓްރީ އޮފް ރިލިޖަސް އެފެއާޒް ގުޅިގެން ބާއްވާ ބޮޑު ބައްދަލުވުމެކެވެ.