ވާވު އަތޮޅުގެ ކޭވްއެއްގައި ތާށިވެ މަރުވި އިޓަލީގެ ފަސް ޑައިވަރުންގެ މަރުގެ ސަބަބު ފިންލޭންޑްގެ ތަޖުރިބާކާރުން ހޯދައިފި

ވާވު އަތޮޅުގެ ކަނޑުއަޑީގެ ހަނި ހޮހޮޅައެއްގެ ތެރޭގައި ތާށިވެ، އިޓަލީގެ ފަސް ޑައިވަރުން މަރުވި ހާދިސާގެ ސަބަބުތައް ފިންލޭންޑްގެ ތަޖުރިބާކާރު ޑައިވަރުން ދިރާސާކޮށްފިއެވެ.

މިއީ ރާއްޖޭގެ ތާރީޚުގައި ހިނގި އެންމެ ނުރައްކާތެރި ޑައިވިންގ ހާދިސާގެ ގޮތުގައި ބެލެވެއެވެ.

ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި، ޑައިވަރުން ހޮހޮޅައިން ބޭރަށް ނުކުުތުމަށް މަސައްކަތްކުރި ވަގުތު، އަނދިރިކަމުގެ ތެރޭގައި އުފެދުނު "ވެލީގެ ފާރެއް" ފަދަ އިލޫޝަނެއްގެ ސަބަބުން، މަގު އޮޅި ނުރަނގަޅު ދިމާލަކަށް ދެވުނީއެވެ. އެމީހުންނަށް ވަދެވުނު މަގަކީ ބޭރުވެވޭނެ ގޮތެއް ނެތް، ބެދިފައިވާ ކޮރިޑޯއެއް ކަމަށް ތަަޖުރިބާކާރުން ބުނެއެވެ.

މަރުވި ޑައިވަރުންގެ ހަށިތައް ފެނިފައިވަނީ ވާވު އަތޮޅުގެ "ޝާކް ކޭވް" ނުވަތަ "ދެކުނު ކަނޑު" ސަރަހައްދުގެ 50 މީޓަރު އަޑީގައި އޮތް ހަނި ހޮޅިއެއްގެ ތެރެއިންނެވެ.

ޑައިވިންގ ތަޖުރިބާކާރުން ފާހަގަކުރާ ގޮތުގައި، 12 ލީޓަރުގެ އެއާ ސިލިންޑަރެއް ބޭނުންކޮށްގެން 50 މީޓަރުގެ އަޑީގައި މަޑުކޮށްލެވޭނީ ވަރަށް ކުރު ވަގުތުކޮޅަކަށެވެ. ކަންބޮޑުވެ ހާސްވުމުގެ ސަބަބުން ސިލިންޑަރުގެ ވައި އަވަހަށް ހުސްވީ ކަމަށް ބެލެވެއެވެ. މީގެ އިތުރުން، މި ހާދިސާ ހިނގި ފުންމިނަކީ ރާއްޖޭގައި ފަތުރުވެރިންނަށް ޑައިވް ކުރުމަށް ހުއްދަދީފައިވާ 30 މީޓަރަށްވުރެ މާ ފުން ސަރަހައްދެއްކަން މީޑިއާތަކުން ފާހަގަކުރެއެވެ.

މި ހާދިސާގައި މަރުވި މީހުންގެ ތެރޭގައި މެރިން ބަޔޯލޮޖީގެ ތަޖުރިބާކާރުންނާއި ރިސާޗަރުން ހިމެނެއެވެ. އަދި ހަށިތައް ނެގުމުގެ މަސައްކަތުގައި ބައިވެރިވި އެމްއެންޑީއެފްގެ ޑައިވަރު މުހައްމަދު މަހުދީ، ޑިކޮމްޕްރެޝަން ސިކްނެސް ނުވަތަ "ބެންޑްސް" ޖެހިގެން މަރުވުމާ ގުޅިގެން، މި ހާދިސާގައި މަރުވި މީހުންގެ ޖުމްލަ އަދަދު ވަނީ ހައަކަށް އަރާފައެވެ.

މި ހާދިސާ ހިނގަން މެދުވެރިވި ސީދާ ސަބަބު ދެނެގަތުމަށްޓަކައި، ޑައިވަރުން ބޭނުންކުރި ގޯޕްރޯ ކެމެރާގެ ފުޓޭޖުތަކާއި އެހެނިހެން އާލާތްތައް މިހާރު ދަނީ ތަހުގީގު ކުރަމުންނެވެ.