ޓިއުޝަންގައި ގިނަ ވަގުތު ހޭދަކުރުމަކީ ފުންކޮށް ވިސްނަންޖެހޭ ކަމެއް: މިނިސްޓަރު ޑރ. އިސްމާޢީލް ޝަފީޢު

ސްކޫލްގެ ހަ ގަޑިއިރު ނިންމުމަށްފަހު، ދަރިވަރުން އިތުރު ހަތަރު ގަޑިއިރާއި ހަ ގަޑިއިރާ ދެމެދުގެ ވަގުތެއް ޓިއުޝަންގައި ހޭދަކުރުމަކީ ސީރިއަސްކޮށް ވިސްނަންޖެހޭ މައްސަލައެއް ކަމަށް މިނިސްޓަރ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓް ޑރ. އިސްމާޢީލް ޝަފީޢު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ މަތީ ވަނަތައް ހޯދި ދަރިވަރުންނަށް އިނާމު ދިނުމަށް ބޭއްވި "ހައި އެޗީވަރސް ސެރެމަނީ" ގެ ފުރަތަމަ ދަންފަޅީގައި ވާހަކަފުޅު ދައްކަވަމުންނެވެ. މިނިސްޓަރު ވިދާޅުވީ އަމިއްލައަށް އުނގެނުމުގެ ޒިންމާ ދަރިވަރުން މިއަށްވުރެ ބޮޑަށް އުފުލަންޖެހޭ ކަމަށާއި، ކިޔެވުމަށް އޮންނަ ޝައުގުވެރިކަން އިތުރުކުރަން ޖެހޭ ކަމަށެވެ. އަމިއްލައަށް އުނގެނުމުގެ ޒިންމާ ނެގުމަކީ ދަރިވަރުންގެ ވިސްނުމުގެ ހުނަރުތައް ވަރުގަދަވެ، ފިލާވަޅުތައް ދޭހަވާ މިންވަރު ރަނގަޅުވާނެ ކަމެއްކަން މިނިސްޓަރު ފާހަގަކުރެއްވިއެވެ.

މުޖުތަމައުގައި އަށަގަނެފައިވާ ޓިއުޝަން ސަގާފަތާ މެދު ކަންބޮޑުވުން ފާޅުކުރައްވަމުން މިނިސްޓަރު ވިދާޅުވީ، ސްކޫލުން ގެއަށް އައުމަށްފަހު ގިނަ ދަރިވަރުން ދިގު ވަގުތުތަކެއް ޓިއުޝަން ކްލާސްތަކުގައި ހޭދަކުރާ ކަމަށެވެ. "ދަރިވަރަކު ހަ ގަޑިއިރު ސްކޫލުގައި ހޭދަކުރުމަށްފަހު، އަނެއްކާ ގެއަށް ގޮސް ހަތަރު ގަޑިއިރު ނުވަތަ ހަ ގަޑިއިރު ޓިއުޝަންގައި ހޭދަކުރުމަކީ ވަރަށް ފުންކޮށް ވިސްނަންޖެހޭ ކަމެއް،" މިނިސްޓަރު ވިދާޅުވިއެވެ.

ސްކޫލުން ބޭރުން އެހީތެރިކަން ބޭނުންވި ނަމަވެސް، އެކަމުގެ ސަބަބުން ކްލާސްރޫމްގައި އުނގެނުމަށް އޮންނަ ސަމާލުކަން ކުޑަވެގެން ނުވާނެ ކަމަށް ޑރ. އިސްމާޢީލް ޝަފީޢު ވިދާޅުވިއެވެ. އަދި ޓިއުޝަނަށް މާ ގިނަ ވަގުތު ހޭދަކުރުމުގެ ސަބަބުން ދަރިވަރުންގެ ދުޅަހެޔޮކަމަށް އަސަރުކޮށް، ކުޅިވަރާއި މުނިފޫހިފިލުވުމުގެ ހަރަކާތްތަކަށް އޮންނަ ވަގުތު ހަނިވާކަމުގެ އިންޒާރު މިނިސްޓަރު ދެއްވިއެވެ.

މީގެއިތުރުން، އަމިއްލައަށް ހޯދައިގަނެގެން އުނގެނޭ ދަރިވަރުންނަށް އެ އުނގެނޭ އެއްޗެއްގެ 75 އިންސައްތަ ހަނދާނުގައި ހުންނަކަން ފާހަގަކުރައްވައި، މާބޮޑަށް އެހެން މީހުންނަށް ބަރޯސާވުމަކީ (ސްޕޫން-ފީޑިންގ) އުނގެނުމުގެ ގާބިލުކަން ކުޑަވާނެ ކަމެއް ކަމަށް މިނިސްޓަރު ވިދާޅުވިއެވެ.

މުދައްރިސުންނަށް މުޚާތަބުކުރައްވަމުން މިނިސްޓަރު ވިދާޅުވީ، ސްކޫލް ގަޑީގައި ދަރިވަރުންނަށް ބޭނުންވާ މިންވަރަށް އުނގަންނައިދެވޭނެ ގޮތަކަށް ކްލާސްރޫމްގެ ކިޔަވައިދިނުން ބައްޓަންކުރަން ޖެހޭ ކަމަށެވެ. އަދި ކްލާސްރޫމް ތެރޭގައި ކިޔަވައިދިނުމުގައި ހުންނަ ބަލިކަށިކަމެއްގެ ސަބަބުން ޓިއުޝަން ސަގާފަތް އިތުރަށް ވަރުގަދަވެގެން ހިނގައިދާނެ ކަމަށްވެސް ވިދާޅުވިއެވެ.

މިނިސްޓަރު ވަނީ ތައުލީމީ ދާއިރާގައި މާނަހުރި ކުރިއެރުމެއް ހޯދޭނީ ސްކޫލްތަކާއި، މުދައްރިސުންނާއި، ބެލެނިވެރިން އަދި ދަރިވަރުން ގުޅިގެން މަސައްކަތް ކޮށްގެންކަން ފާހަގަކުރައްވާފައެވެ.