16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރަނީ

ދިވެހިރާއްޖޭގައި އުމުރުން 16 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން ހަނިކުރުމަށް ނުވަތަ މަނާކުރުމަށް ސަރުކާރުން ބަލަމުންދާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރައްވައިފިއެވެ.

މިއަދު ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ވަކި އުމުރަކުން ދަށުގެ ކުދިންނަށް ބައެއް ސޯޝަލް މީޑިއާ ޕްލެޓްފޯމްތަކަށް ވަނުން ހަނިކުރުމަށް އަޅަންޖެހޭ ފިޔަވަޅުތަކާ ގުޅޭގޮތުން ސަރުކާރުން މަސައްކަތް ކުރަމުންދާ ކަމަށެވެ. މި ބަދަލުތައް ގެނައުމުގައި އޮސްޓްރޭލިއާއިން މި ފަހުން ކުޑަކުދިން ސޯޝަލް މީޑިއާ ބޭނުންކުރުން ހަނިކުރުމަށް އެކުލަވާލާފައިވާ އުސޫލުތަކަށް ބަލާނެ ކަމަށްވެސް އެމަނިކުފާނު ވިދާޅުވިއެވެ.

ރައީސް ޑރ. މުޢިއްޒު ފާހަގަކުރެއްވި ގޮތުގައި، ދިވެހިރާއްޖެއަކީ އިސްލާމީ އަގުތަކާއި އުސޫލުތަކުގެ މައްޗަށް ބިނާވެފައިވާ ގާތް ގުޅުމެއް އޮންނަ މުޖުތަމައަކަށް ވާއިރު، ޒުވާން ޖީލަށް ކުރިމަތިވާ ގޮންޖެހުންތަކުން ސަލާމަތްކުރުމަށް އިސްނަގައިގެން ފިޔަވަޅުތައް އަޅަންޖެހެއެވެ. އަދި ދުނިޔޭގެ ގިނަ ގައުމުތަކަކުން މިފަދަ ފިޔަވަޅުތައް އަޅަން ފަށާފައިވާކަން ފާހަގަކުރައްވައި، އިންޓަނެޓްގެ ޒަރީއާއިން ކުރިމަތިވާ ނުރައްކާތަކުން ކުޑަކުދިން ރައްކާތެރިކުރުމުގެ މުހިންމުކަމުގެ މައްޗަށް އެމަނިކުފާނު އަލިއަޅުއްވާލެއްވިއެވެ.

މި ނިންމުމަކީ ޒުވާނުން ރައްކާތެރިކުރުމަށް އެޅޭ މުހިންމު ފިޔަވަޅެއްގެ ގޮތުގައި ސިފަކުރައްވަމުން ރައީސް ވިދާޅުވީ، ކުޑަކުދިން ސޯޝަލް މީޑިއާ ބޭނުންކުރާ ގޮތާމެދު ބެލެނިވެރިންގެ މެދުގައި އޮތް ކަންބޮޑުވުންތަކަށް މިކަމުގެ ސަބަބުން ހައްލެއް ލިބިގެންދާނެ ކަމަށެވެ.

ސޯޝަލް މީޑިއާގެ ސަބަބުން ކުރިމަތިވާ ނުރައްކާތަކަށް އިޝާރާތް ކުރައްވައި ރައީސް ވިދާޅުވީ، ކުޑަކުދިންނަށް ނުރައްކާތެރި ކޮންޓެންޓާއި ނޭދެވޭ އަމަލުތަކަށް ހުށަހެޅޭ މިންވަރު އިތުރުވަމުންދާ ކަމަށެވެ. ވަކިން ހާއްސަކޮށް "ސައިބަރ ބުލީން" ނުވަތަ އިންޓަނެޓް މެދުވެރިކޮށް ފުރައްސާރަކުރުމަކީ ކުދިންގެ ނަފްސާނީ ދުޅަހެޔޮކަމަށާއި މުސްތަގުބަލަށް އޮތް ބޮޑު ނުރައްކަލެއްގެ ގޮތުގައި އެމަނިކުފާނު ފާހަގަކުރެއްވިއެވެ.

ސަރުކާރުގެ އަމާޒަކީ ކުޑަކުދިންނަށް ރައްކާތެރި އޮންލައިން މާހައުލެއް ގާއިމުކޮށްދިނުން ކަމަށާއި، މި ގެންނަން އުޅޭ ބަދަލުތަކުގެ ބޭނުމަކީ ޑިޖިޓަލް ވަސީލަތްތައް ބޭނުންކުރުމުގައި ކުދިންނަށް ކުރިމަތިވާ ނުރައްކާތައް ކުޑަކުރުން ކަމަށްވެސް ރައީސް ޑރ. މުޢިއްޒު ވިދާޅުވިއެވެ.