އިދިކޮޅު ތިން ރައީސުންނަށް ލިބޭނީ "ޝޮކެއް": މެންބަރު ޝުޖާއު

އައްޑޫ ސިޓީ ހިތަދޫ މެދު ދާއިރާގެ ބައި-އިލެކްޝަނުގެ ނަތީޖާއާ ގުޅިގެން، ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު، އިދިކޮޅު ސިޔާސީ ލީޑަރުންނަށް ވަރުގަދަ ރައްދެއް ދެއްވައިފިއެވެ.

ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި ޝުޖާއު ވިދާޅުވީ، ކުރީގެ ތިން ރައީސުން ކަމަށްވާ ރައީސް ޔާމީން ޢަބްދުލްޤައްޔޫމާއި، ރައީސް މުޙައްމަދު ނަޝީދު އަދި ރައީސް އިބްރާހީމް މުޙައްމަދު ޞާލިޙް ގުޅިވަޑައިގެން މަސައްކަތް ކުރެއްވި ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަނި ހޯއްދެވި ނަތީޖާއާ ދެމެދު އޮތީ އެންމެ 62 ވޯޓުގެ ތަފާތެއް ކަމަށެވެ.

ޝުޖާއު ފާހަގަކުރެއްވި ގޮތުގައި، ސަރުކާރު ހިންގާ ޕީއެންސީން މި ނަތީޖާ ހޯއްދެވީ ކުރީގެ އެމްޑީޕީ ސަރުކާރުން ބައި-އިލެކްޝަންތަކުގައި އަމަލުކުރި ގޮތަކަށް ނޫނެވެ. އެގޮތުން ކޮމަންޑޫ އާއި ގުރައިދޫ ދާއިރާގެ އިންތިޚާބުތަކުގައި މުޅި ދައުލަތް ލޫޓުވާލައި، ދައުލަތުގެ ވަސީލަތްތައް އޮއްސާލި ފަދަ އެއްވެސް ކަމެއް މި ސަރުކާރުން ކޮށްފައި ނުވާނެ ކަމަށް އޭނާ ވިދާޅުވިއެވެ.

"މި ނަތީޖާ ޕީއެންސީން ހޯއްދެވީ އާސަންދަ އާއި އެންސްޕާގެ ވެރިން ލެޕްޓޮޕްތައް ހިއްޕަވައިގެން ހިތަދޫއަށް އަރުވައިގެނެއް ނޫން. ވަޒީފާތަކާއި ޕްރޮމޯޝަންތައް އޮއްސައިގެނެއް ނޫން،" ޝުޖާއު ވިދާޅުވިއެވެ. އޭނާ އިތުރަށް ވިދާޅުވީ މި ނަތީޖާއިން އެ ތިން ރައީސުންނަށް ލިބޭނެ މޮޅެއް ނެތް ކަމަށާއި، އޭގެ ބަދަލުގައި އެ ބޭފުޅުންނަށް ލިބިވަޑައިގަންނަވާނީ ބޮޑު "ޝޮކެއް" ކަމަށެވެ.

އިންތިޚާބުގެ ތެރޭގައި އެކި ބޭފުޅުން އުޅުއްވި ގޮތަށް އަލިއަޅުއްވާލައްވަމުން ޝުޖާއު ވިދާޅުވީ، ރައީސް ޔާމީން ގޭގައި ކޯލް ސެންޓަރެއް ހައްދަވައިގެން ރައްޔިތުންނަށް ގުޅުއްވަން އިންނެވިއިރު، ރައީސް ނަޝީދާއި ރައީސް ޞާލިޙް އުޅުއްވީ ހިތަދޫގައި ދޮރުން ދޮރަށް ހިންގެވުމުގައި ކަމަށެވެ.

ނަމަވެސް، ރައީސް ޑރ. މުޙައްމަދު މުޢިއްޒު އެ ވަގުތު ހޭދަކުރެއްވީ ޤައުމީ ބޮޑު މަސްއޫލިއްޔަތެއްގައި ކަމަށް ޝުޖާއު ފާހަގަކުރެއްވިއެވެ. އެގޮތުން އެ ތިން ރައީސުންގެ ދައުރުގައި ނެންގެވި ބޮޑެތި ލޯނުތައް ދައްކަވައި، ޤައުމުގެ ރޭޓިންގ ރަނގަޅުކުރުމަށް ކުރަންޖެހޭ މުހިންމު މަސައްކަތްޕުޅުތަކުގައި ރައީސް މުޢިއްޒު އަވަދިނެތި އުޅުއްވި ކަމަށް އޭނާ ވިދާޅުވިއެވެ.

މި ބައި-އިލެކްޝަނުގެ ނަތީޖާއިން ދޭހަކޮށްދެނީ ރައީސް މުޢިއްޒުގެ ސަރުކާރަށް ރައްޔިތުންގެ އޮތް އިތުބާރު ކަމަށާއި، ނުފޫޒެއް ނެތި އިންސާފުވެރިކަމާއެކުވެސް ސަރުކާރަށް ބޮޑު ތަރުހީބެއް އޮތްކަން ހާމަވެގެން ގޮސްފައިވާ ކަމަށް ސަރުކާރަށް ތާއީދުކުރާ ފަރާތްތަކުން ބުނެއެވެ.