އައްޑޫގެ މަސްވެރިންނަށް ތެޔޮ ލިބުމުގެ ދަތިކަން ހައްލުކޮށްދެއްވާނެކަމުގެ ޔަގީންކަން ވަޒީރު ޝިޔާމް ދެއްވައިފި

ހިތަދޫ އުތުރު ދާއިރާގެ ބައި-އިލެކްޝަނުގައި ޕީއެންސީގެ ފަރާތުން ވާދަކުރައްވާ ކެނޑިޑޭޓް އަހްމަދު ސައީދުގެ ކެމްޕެއިން ލޯންޗުކުރުމަށް އައްޑޫގައި ބޭއްވި ޖަލްސާގައި ވާހަކަދައްކަވަމުން، މަސްވެރިންނަށް ކުރިމަތިވެފައިވާ ތެލުގެ މައްސަލައަށް ދާއިމީ ހައްލެއް ހޯއްދަވައިދެއްވާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވޭތުވެދިޔަ ތިން ދުވަހުގެ ތެރޭގައި އައްޑޫގެ މަސްވެރި ހަތަރު ގްރޫޕަކާ ބައްދަލުކުރައްވައި، ވަޒީރު ޝިޔާމް ވިދާޅުވީ މަސްވެރިން ފާހަގަކުރި ކަންބޮޑުވުންތަކާއި ބޭނުންތަކަށް ސަރުކާރުން ވަރަށް ބޮޑަށް އިސްކަންދެއްވާނެ ކަމަށެވެ. ޚާއްޞަކޮށް މަސްވެރިން އެންމެ ބޮޑަށް ފާހަގަކުރި ތެޔޮ ލިބުމުގެ ދަތިކަމާއި، ތެލަށް ކުރަންޖެހޭ ހޭދަ ބޮޑުވުމުގެ މައްސަލައަށް ސަރުކާރުން ހައްލުތަކެއް ހޯދަމުންދާ ކަމަށް ވަޒީރު ވިދާޅުވިއެވެ.

މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެޔޮ ހޯދުމަށް ދަތިތަކެއް ހުރި ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިންނަށް ލުއި ފަސޭހަގޮތްތައް ހަމަޖައްސައިދެމުންދާކަން ވަޒީރު ފާހަގަކުރެއްވިއެވެ. އެގޮތުން، ބާޒާރުގައި ތެލުގެ އަގު ބޮޑުވި ނަމަވެސް، މަސްވެރި އުޅަނދުތަކަށް އަގުހެޔޮކޮށް ތެޔޮ ލިބޭނެ އިންތިޒާމު ހަމަޖައްސާފައިވާ ކަމަށާއި، މިހާރު ރާއްޖޭގެ ކޮންމެ އަތޮޅަކުންވެސް އެސްޓީއޯ ރޭޓުގައި ތެޔޮ ލިބޭނެ ނިޒާމު ގާއިމުކުރެވިފައިވާ ކަމަށް ޝިޔާމް ވިދާޅުވިއެވެ.

އައްޑޫ ސިޓީގެ ޖިއޯގްރަފީ އޮތްގޮތުން، އެއްގަމުންނާއި ކަނޑުމަގުން ތެޔޮ ހޯދުމަށް މަސްވެރިން ބޮޑު ހޭދައެއް ކުރަންޖެހޭކަން ފާހަގަކުރައްވަމުން ވަޒީރު ވިދާޅުވީ، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ އައިސް ޕްލާންޓް ހުރި ސަރަހައްދުން ބިމެއް ލިބިއްޖެ ނަމަ، ތެޔޮ ރައްކާކުރެވޭނެ ފިއުލް ޝެޑެއް އެ ސަރަހައްދުގައި ޤާއިމުކޮށްދެއްވާނެ ކަމަށެވެ.

މީގެ އިތުރުން، މަސްވެރިންގެ އެދުމުގެ މަތިން މިފްކޯގެ މަސް ފިހާރައެއްގެ ޚިދުމަތް އައްޑޫގައި ގާއިމުކޮށްފައިވާ ކަމަށާއި، ކުރިއަށް އޮތް ދެތިން ދުވަހުގެ ތެރޭގައި މިފްކޯއިން އުފައްދާ ހުރިހާ ބާވަތެއްގެ އުފެއްދުންތައް އެ ފިހާރައިން ލިބެން ހުންނާނެ ކަމުގެ އުފާވެރި ޚަބަރުވެސް ވަޒީރު ވަނީ ދެއްވާފައެވެ.

މަސްވެރިކަމުގެ ސިނާއަތަކީ ދިވެހި އިގްތިސާދާއި މުޖުތަމައަށް ބޮޑު އަސަރެއް ކުރާ ސިނާއަތަކަށް ވާތީ، މަސްވެރިންގެ ހުރި ކަންބޮޑުވުންތައް ހައްލުކުރުމަކީ ސަރުކާރުގެ ބޮޑު އަމާޒެއް ކަމަށް ވަޒީރު ޝިޔާމްގެ ވާހަކަފުޅުގައި ފާހަގަކުރެއްވިއެވެ.