ޕީއެންސީގެ އެތެރޭގެ އިންތިޚާބަކީ އެހެން ޕާޓީތަކަށް ނަމޫނާއެއް: ޢަބްދުއްރަހީމް

ވެރިކަންކުރާ ކޮންގްރެސް ޕާޓީ (ޕީއެންސީ) އިން މިހާރު ކުރިއަށްގެންދާ އެތެރޭގެ އިންތިޚާބަކީ އެހެން ސިޔާސީ ޕާޓީތަކަށް ނަމޫނާއެއް ކަމަށާއި، މި އިންތިޚާބުން ޕާޓީތަކުގެ އިންތިޚާބުތައް ހާމަކަންބޮޑު އަދި އިންތިޒާމުވެގެން ބޭއްވޭނެ ގޮތް ސާބިތުކޮށްދޭނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާމަން ޢަބްދުއްރަހީމް ޢަބްދުﷲ ވިދާޅުވެއްޖެއެވެ.

މިއަދު ކުރިއަށްދާ އިންތިޚާބާ ގުޅޭގޮތުން ވާހަކަދައްކަވަމުން ޢަބްދުއްރަހީމް ވިދާޅުވީ، މިއީ ރާއްޖޭގެ ސިޔާސީ ޕާޓީއަކުން މިހާތަނަށް ބާއްވާ އެންމެ ބޮޑު އެތެރޭގެ އިންތިޚާބު ކަމަށެވެ. މި އިންތިޚާބުގައި ރާއްޖޭގެ 131 ރަށެއްގައި ޖުމްލަ 2،086 މަގާމަކަށް މީހުން އިންތިޚާބު ކުރެވޭނެއެވެ. އަދި މި މަގާމުތަކަށް 2،300 އަށްވުރެ ގިނަ ކެންޑިޑޭޓުން ވާދަކުރާއިރު، މިއީ ޕާޓީގެ ލީޑަޝިޕަށް މެންބަރުންގެ އޮތް އިތުބާރު ހާމަކޮށްދޭ ކަމެއްގެ ގޮތުގައި އޭނާ ފާހަގަކުރެއްވިއެވެ.

މި އިންތިޚާބުގައި ހޮވުމަށް ހަމަޖެހިފައިވަނީ ދާއިރާތަކުގެ ރައީސުންނާއި، ނައިބު ރައީސުން އަދި ސްޓިއަރިންގ ކޮމިޓީތަކުގެ މެންބަރުންނެވެ. ޕީއެންސީގެ މަޖިލިސް މެންބަރުން ނެތް ދާއިރާތަކުގައި ރައީސުން އިންތިޚާބު ކުރާއިރު، މަޖިލިސް މެންބަރުން ތިއްބެވި ދާއިރާތަކުގައި އިންތިޚާބު ކުރަނީ ނައިބު ރައީސުންނެވެ.

އިންތިޚާބުގެ ތައްޔާރީތަކާ ގުޅޭގޮތުން ވާހަކަދައްކަވަމުން މަޖިލީހުގެ ރައީސް ވިދާޅުވީ، މި އިންތިޚާބުގެ ތައްޔާރީތައް ކުރިއަށްގެންދިޔައީ ޕާޓީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކުލަވާލެއްވި ޚާއްޞަ ކޮމިޓީއެއްގެ ބެލުމުގެ ދަށުން ގާތްގަނޑަކަށް އެއް މަސް ދުވަހުގެ ތެރޭގައި ކަމަށެވެ. އަދި މިހާތަނަށް ވޯޓުލުމުގެ ކަންކަން ވަރަށް އޮމާންކަމާއެކު ކުރިއަށްދާކަން އޭނާ ފާހަގަކުރެއްވިއެވެ.

ޢަބްދުއްރަހީމް އިތުރަށް ވިދާޅުވީ، އޭނާގެ ސިޔާސީ ތަޖުރިބާއަށް ބަލާއިރު، މީގެ ކުރިން ވެރިކަން ކުރާ އެއްވެސް ޕާޓީއަކުން މިހާ ބޮޑު އަދި މިހާ ވާދަވެރި އެތެރޭގެ އިންތިޚާބެއް ބާއްވާފައި ނުވާ ކަމަށެވެ. މެންބަރުންގެ ފަރާތުން ފެންނަ މި ޖޯޝަކީ ރައީސް ޑރ. މުޢިއްޒުގެ ލީޑަޝިޕަށް އޮތް އިތުބާރުގެ ރަމްޒެއް ކަމަށްވެސް ވިދާޅުވިއެވެ.

އިންތިޚާބުގެ ކަންކަން ސުލްހަވެރިކަމާއެކު ނިމިގެންދާނެ ކަމަށް އުއްމީދު ކުރައްވާކަން ހާމަކުރައްވަމުން، ޢަބްދުއްރަހީމް ވިދާޅުވީ މި އިންތިޚާބުގެ ސަބަބުން ޕާޓީ އިތުރަށް ވަރުގަދަވެ، ރާއްޖޭގެ ސިޔާސީ މައިދާނުގައި ޕާޓީތަކުގެ އެތެރޭގެ އިންތިޚާބުތައް ބާއްވާނެ ފުރިހަމަ މިންގަނޑެއް ކަނޑައެޅިގެންދާނެ ކަމަށެވެ.