މާލެ ސިޓީ ކައުންސިލްގެ 2020 ވަނަ އަހަރުގެ އޮޑިޓް: ވަކި ބަޔަކަށް ނާޖާއިޒު ފައިދާ ލިބޭ ގޮތަށް ކޯޓޭޝަންތައް ހޯދާފައިވާކަން ހާމަވެއްޖެ

މާލެ ސިޓީ ކައުންސިލުން 2020 ވަނަ އަހަރު ކުރިއަށްގެންދިޔަ ޕްރޮކިއުމަންޓް މުއާމަލާތްތަކުގައި، ވަކި ބަޔަކަށް ނާޖާއިޒު ފައިދާ ލިބޭ ގޮތަށް އެކަކު އަނެކަކާ ގުޅުން ހުރި ވިޔަފާރިތަކުން ކޯޓޭޝަން ހޯދާފައިވާކަން އެ ކައުންސިލްގެ އިންޓަރނަލް އޮޑިޓް ރިޕޯޓުން ހާމަވެއްޖެއެވެ.

ކްރޯ މޯލްޑިވްސް އެލް.އެލް.ޕީ އިން ތައްޔާރުކޮށް، ކައުންސިލުން އާންމުކުރި މި އޮޑިޓް ރިޕޯޓަކީ މާލޭގެ މޭޔަރުކަމުގައި ޝިފާ މުޙައްމަދު ހުންނެވި ދުވަސްވަރުގެ މުއާމަލާތްތަކަށް ބިނާކޮށް ތައްޔާރުކޮށްފައިވާ ރިޕޯޓެކެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، އޮޑިޓަރުން ވަނީ 35,000 ރުފިޔާއަށްވުރެ ކުދި މުއާމަލާތްތަކުގެ ތެރެއިން ރެންޑަމްކޮށް 45 ޕޭމަންޓް ވައުޗަރެއް ބަލައި ފާސްކޮށްފައެވެ. މީގެ ތެރެއިން 27 ވައުޗަރެއްގައި ހިމެނޭ ކޯޓޭޝަންތަކަކީ އެއް ކުންފުންޏެއްގެ ދެ އައުޓްލެޓަކުން ނުވަތަ އެއް ހިއްސާދާރުންތަކެއްގެ މަސްލަހަތު އޮންނަ އެކި ވިޔަފާރިތަކުން ހޯދާފައިވާ ކޯޓޭޝަންތަކެއްކަން ވަނީ ފާހަގަކުރެވިފައެވެ. މި 27 މުއާމަލާތުގެ ޖުމްލަ އަގު 732,043.86 ރުފިޔާއަށް އަރައެވެ.

އޮޑިޓް ރިޕޯޓުގައި ބަޔާންކޮށްފައިވަނީ، މިގޮތަށް ގުޅުންހުރި ވިޔަފާރިތަކުން ކޯޓޭޝަން ހޯދުމަކީ ޕްރޮކިއުމަންޓްގެ ނިޒާމުގެ ތެރޭގައި އޮންނަންޖެހޭ ވާދަވެރިކަން ކުޑަވެގެންދާ ކަމެއް ކަމަށެވެ. އަދި މިކަމުގެ ސަބަބުން ކައުންސިލަށް އެންމެ އެކަށީގެންވާ އަގުހެޔޮ އަދި ވާދަވެރި މާހައުލެއްގައި ތަކެއްޗާއި ޚިދުމަތް ހޯދުމަށް ހުރަސްއެޅޭ ކަމަށްވެސް ރިޕޯޓުގައިވެއެވެ.

މީގެ އިތުރުން، މިފަދަ އަމަލުތަކުގެ ސަބަބުން ވަކި ފަރާތްތަކަށް ނާޖާއިޒު މަންފާ ހޯދައިދިނުމުގެ ފުރުސަތު ހުޅުވިގެންދާކަން ފާހަގަކޮށް، އޮޑިޓަރުން ވަނީ މިކަން އިސްލާހުކުރުމަށް އިރުޝާދު ދީފައެވެ. ކައުންސިލްގެ މިހާރުގެ މޭޔަރު އާދަމް އާޒިމްގެ ދައުރުގައި މި ރިޕޯޓު އާންމުކޮށްފައިވާއިރު، މިއީ މާލީ ނިޒާމު ހަރުދަނާކުރުމަށް ކުރެވޭ މަސައްކަތެއްގެ ގޮތުގައި ބެލެވެއެވެ.