ރާއްޖޭގެ ފުރަތަމަ ޑިވޮލޮޕްމަންޓަލް ޕީޑިއެޓްރީޝަން ޑރ. ފަޒްނާ ނިޔާވުމާ ގުޅިގެން ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި

ކުޑަކުދިން ހެދިބޮޑުވާގޮތް ބަލައި ފަރުވާ ދިނުމުގެ ދާއިރާއިން ރާއްޖޭގައި ފުރަތަމަ ފަހަރަށް ޚާއްޞަވި ދިވެހި ޑޮކްޓަރު، ޑރ. އާމިނަތު ފަޒްނާ ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ފޮނުއްވައިފިއެވެ.

އުމުރުން 47 އަހަރުގެ ޑރ. ފަޒްނާ ނިޔާވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް މިއަދުގެ ވަގުތެއްގައެވެ. ގދ. ގައްދޫ، ކަށިކެޔޮމާގޭ، ޑރ. ފަޒްނާ ނިޔާވިއިރު އޭނާގެ ދެ އަންހެން ކުދިން ދުނިޔޭގައި އެބަތިއްބެވެ.

ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، ކުޑަކުދިން ހެދިބޮޑުވާގޮތް ބަލައި ފަރުވާ ދިނުމުގެ ދާއިރާއިން ޚާއްޞަ ސުޕަޝެލިސްޓެއްގެ ގޮތުގައި ޤައުމަށް ޚިދުމަތްކޮށްދެއްވަން ފެށްޓެވި ފުރަތަމަ ދިވެހި ޑޮކްޓަރު އާމިނަތު ފަޒުނާ އަވަހާރަވުމުގެ ހިތާމައިގައި ބައިވެރިވެވަޑައިގަންނަވާ ކަމަށެވެ. އަދި އެ މަރުޙޫމާގެ ޢާއިލާއަށާއި، ދަރުމަވަންތަ ހޮސްޕިޓަލާއި އައި.ޖީ.އެމް.އެޗް.ގެ ހުރިހާ މުވައްޒަފުންނަށް އަދި ޞިއްޙީ ދާއިރާގައި މަސައްކަތްކުރައްވާ ފަރާތްތަކަށް ރައީސް ވަނީ ތަޢުޒިޔާ ދަންނަވާފައެވެ. ރައީސްގެ ދުޢާއަކީ މަރުޙޫމާއަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުމެވެ.

ޑރ. ފަޒްނާއަކީ މެލޭޝިއާގެ ނޭޝަނަލް ޔުނިވާސިޓީ އާއި އެމެރިކާގެ ކެލިފޯނިއާ ޔުނިވާސިޓީން މަތީ ތަޢުލީމާއި ތަމްރީނު ހާސިލުކުރައްވާފައިވާ ބޭފުޅެކެވެ. އޭނާ އައިޖީއެމްއެޗްއާ އަލުން ގުޅިވަޑައިގަތީ 2018 ވަނަ އަހަރުއެވެ. ނަމަވެސް، ޑިވޮލޮޕްމަންޓަލް ޕީޑިއެޓްރީޝަންގެ ދާއިރާއިން ތަމްރީނު ފުރިހަމަކުރެއްވުމަށްފަހު، އޯޓިޒަމާއި އޭޑީއެޗްޑީ ފަދަ ކުޑަކުދިންގެ ހެދިބޮޑުވުމުގެ މައްސަލަތަކަށް ޚާއްޞަވެގެން ބަލިމީހުން ބައްލަވަން ފެއްޓެވީ 2024 ވަނަ އަހަރުގެ އޮކްޓޫބަރު މަހުއެވެ.

ޑރ. ފަޒްނާއަކީ ރާއްޖޭގައި އޯޓިޒަމް ފަދަ ބަލިތައް ދެނެގަތުމަށް ޚާއްޞަވި ފުރަތަމަ ދިވެހި ޑޮކްޓަރަށް ވުމާއެކު، އޭނާގެ ވަކިވެދިއުމަކީ ރާއްޖޭގެ ޞިއްޙީ ދާއިރާއަށް ލިބުނު ފޫނުބެއްދޭނެ ބޮޑު އުނިކަމެކެވެ. އޭނާގެ ފަރާތުން ފަރުވާ ހޯދި ކުދިންގެ އާއިލާތަކުންނާއި މަސައްކަތްތެރި އެކުވެރިން އަންނަނީ ފުން ހިތާމައެއް ފާޅުކުރަމުންނެވެ.

ޑރ. ފަޒްނާގެ މައްޗަށް ކުރެވޭ ކަށުނަމާދު އޮންނާނީ މިރޭގެ އިޝާ ނަމާދަށްފަހު މަސްޖިދުއް ތަޢާވުން (އާސަހަރާ މިސްކިތް) ގައެވެ.