ވަޒީރު ރާފިޢު، އޭޝިއަން ސާފިން ޗެމްޕިއަންޝިޕް ކުރިއަށްދާގޮތް ބައްލަވާލައްވައިފި

ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް ކުރިއަށްދާ ގޮތް ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ބައްލަވާލައިފި އެވެ.

މި މަހުގެ 17 ގައި ފެށި އޭޝިއާ ސަރަހައްދުގެ އެންމެ ބޮޑު ސާފިން މުބާރާތުގައި މި އަހަރު 20 ގައުމަކުން 100 އަށްވުރެ ގިނަ އެތުލީޓުން ވާދަކުރެ އެވެ. މިދިޔަ އަހަރުވެސް މި މުބާރާތް ބާއްވާފައިވަނީ ކ. ތުލުސްދޫގަ އެވެ.

މުބާރާތް ކުރިއަށްދާ ސަރަަހައްދަށް ވަޑައިގެން ވަޒީރު ރާފިޢު ވަނީ އިންތިޒާމްތައް ބައްލަވާލައްވާ، މުބާރާތުގެ ބައެއް ހީޓުތައްވެސް ބައްލަވާލައްވާފަ އެވެ. މީގެ އިތުރުން އެކި ގައުމުތަކުގެ އޮފިޝަލުންނާއި، އެތުލީޓުންނާ ބައްދަލުކުރެއްވި އެވެ.

ވަޒީރު ރާފިޢު ވަނީ އެ ވަގުތޔ ކުރިއަށްދިޔަ ބައެއް ހީޓުތަކުގައި ވާދަކުރި ދިވެހި އެތުލީޓުންނާވެސް ބައްދަލުކުރައްވާ ހޯދި ކާމިޔާބީ އަށް މަރުޙަބާ ދަންނަވާފަ އެވެ.

3 ވަނަ އޭޝިއަން ސާފިން ޗެމްޕިއަންޝިޕްގެ ނިމުމުގެ ރަސްމިއްޔާތު އޮންނާނީ އަންނަ ހޮނިހިރު ދުވަހު އެވެ.