އިލެކްޝަންސް ކޮމިޝަންގެ މެންބަރުކަމަށް މުޙައްމަދު ޝަކީލް ރައީސުލްޖުމްހޫރިއްޔާ އައްޔަންކުރައްވައިފި

އިލެކްޝަންސް ކޮމިޝަންގެ މެންބަރުކަމަށް، މ. ދޫނިހަ، މުޙައްމަދު ޝަކީލް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އައްޔަންކުރައްވައިފިއެވެ.

މި މަޤާމަށް ޝަކީލް އައްޔަންކުރެއްވުމުގެ ރަސްމިއްޔާތު އޮތީ ބުދަ ދުވަހު ރައީސުލްޖުމްހޫރިއްޔާގެ އޮފީހުގައެވެ. މި ރަސްމިއްޔާތުގައި ރައީސުލްޖުމްހޫރިއްޔާގެ ކުރިފުޅުމަތީގައި ޝަކީލް ވަނީ މެންބަރުކަމުގެ ހުވައި ކުރައްވާފައެވެ. އޭނާއަށް ހުވައިލައިދެއްވީ ސުޕްރީމް ކޯޓުގެ ފަނޑިޔާރު އަލްއުސްތާޛު މުޙައްމަދު ސަލީމެވެ. ހުވައިގެ އިޤުރާރުގައި ސޮއިކުރެއްވުމާ ގުޅިގެން، ރައީސުލްޖުމްހޫރިއްޔާ ވަނީ ޝަކީލަށް މަޤާމުގެ ފަތްކޮޅު އަރުވާފައެވެ.

މުޙައްމަދު ޝަކީލަކީ މީގެ ކުރިންވެސް އިލެކްޝަންސް ކޮމިޝަންގެ މެންބަރުކަން ކުރައްވާފައިވާ، އެ ދާއިރާގެ ތަޖުރިބާކާރު ބޭފުޅެކެވެ. އެގޮތުން، 3 ޑިސެންބަރު 2014 އިން ފެށިގެން 9 މޭ 2018 އަށް އޭނާ ވަނީ އެ ކޮމިޝަންގެ މެންބަރުކަން ކުރައްވާފައެވެ. މީގެ އިތުރުން، 1 ސެޕްޓެންބަރު 2013 އިން ފެށިގެން މެންބަރުކަމަށް އައްޔަންކުރެވެންދެން އޭނާ ހުންނެވީ އެ ކޮމިޝަންގެ ޑައިރެކްޓަރ ޖެނެރަލްގެ މަޤާމުގައެވެ.

އިލެކްޝަންސް ކޮމިޝަންގެ މެންބަރުކަމަށް އައްޔަންކުރެއްވުމުގެ ކުރިން ޝަކީލް އެންމެ ފަހުން އަދާކުރެއްވީ މޯލްޑިވްސް ޙައްޖު ކޯޕަރޭޝަންގެ މެނޭޖިންގ ޑައިރެކްޓަރުގެ މަޤާމާއި އެ ކޯޕަރޭޝަންގެ ބޯޑު މެންބަރުކަމުގެ މަޤާމެވެ.

ޝަކީލް މި މަޤާމަށް އައްޔަންކުރައްވާފައިވަނީ އިލެކްޝަންސް ކޮމިޝަނުން ހުސްވެފައިވާ މެންބަރުކަމުގެ މަޤާމަށް ކުރިމަތިލުމަށް ހުޅުވާލި ފުރުޞަތުގައި ކުރިމަތިލެއްވި ބޭފުޅުންގެ ތެރެއިން، ރައްޔިތުންގެ މަޖިލީހުން އޭނާގެ ނަން ފާސްކުރުމާ ގުޅިގެންނެވެ.