ހުއްދަނެތި އަދަދު ނޫހުގެ ނޫސްވެރިޔާ ވަނުމުން 'ޕްރެސް ވިތު ދަ ސްޕޮކްސް' ކުރިއަށް ނުގެންދެވުނު: މުންދު

ރައީސުލްޖުމްހޫރިއްޔާގެ އޮފީހުން މީޑިއާތަކާ ބައްދަލުކޮށް ސުވާލުތަކަށް ޖަވާބުދިނުމަށް ބާއްވާ ސިލްސިލާ ޕްރޮގްރާމް "ޕްރެސް ވިތު ދަ ސްޕޮކްސް" ގެ މިއަދުގެ އެޕިސޯޑް ކުރިއަށް ނުގެންދެވި ލަސްވާން ދިމާވީ ހުއްދަ ނެތި 'އަދަދު' ނޫހުގެ ނޫސްވެރިޔަކު ސްޓޫޑިއޯއަށް ވަދެ އިނުމުން ކަމަށް ރައީސް އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.

ޕީއެސްއެމްގެ ސްޓޫޑިއޯގައި ލައިވްކޮށް ރެކޯޑުކުރަން ހަމަޖެހިފައި އޮތް މި ޕްރޮގްރާމަށް މިއަދު ހަވީރު 4:00 އަށް ދަޢުވަތު ދީފައިވަނީ މިކަމަށް ހަމަޖެހިފައިވާ މީޑިއާ ގްރޫޕް މެދުވެރިކޮށެވެ. މުންދު ވިދާޅުވީ މި ޕްރޮގްރާމަކީ ރައީސް އޮފީހުގެ ޕްރެސް ކޮންފަރެންސްތަކުގައި ބައިވެރިވާ، ގެޒެޓްކުރެވި، ސްކްރީންކޮށް ހުއްދަ ދީފައިވާ މީޑިއާތަކަށް ހުޅުވާލެވިފައިވާ ފުރުސަތެއް ކަމަށެވެ. އަދި އަދަދު ނޫހަކީ މީގެ ދެތިން މަސް ކުރިން ޣައިރުޤާނޫނީ ޢަމަލުތަކަކާއި ޖިނާއީ މައްސަލަތަކެއް ހިނގަމުންދާތީ އެ ފުރުސަތު އުނިކޮށްފައިވާ ފަރާތެއް ކަމަށާއި، އެހެންކަމުން ރައީސް އޮފީހުގެ މިފަދަ ޕްރޮގްރާމްތަކުގައި ބައިވެރިވުމުގެ ފުރުސަތު އެ ނޫހަށް މިހާރު ނޯންނާނެ ކަމަށް އޭނާ ފާހަގަކުރެއްވިއެވެ.

މި ޕްރޮގްރާމްގައި ބައިވެރިވުމަށް 20 ވަރަކަށް ނޫސްވެރިން ނަންނޯޓުކުރި ކަމަށާއި، އަދަދު ނޫހުގެ ފަރާތުން ލީވާން ނަމަކަށް ކިޔާ ނޫސްވެރިޔަކު ބައިވެރިވާން ބޭނުންވެގެން މެސެޖު ކުރި ނަމަވެސް، ރައީސް އޮފީހުން އޭނާއަށް އެއްވެސް ހުއްދައެއް ދީފައި ނުވާނެ ކަމަށް މުންދު ވިދާޅުވިއެވެ.

"ޕްރޮގްރާމް ނަގަން ކައިރިވެފައި އޮއްވާ، ހުއްދައެއް ނެތި ލީވާން އެތަނަށް ވަދެ އިށީނދެ، ތެދުވެގެން ނުދާން އުޅުނީ. ޕީއެސްއެމް އަކީ ވަކި ޤާނޫނީ ބާރު އޮތް މުއައްސަސާއެއް، މިއީ ޤާނޫނު ހުއްދަކުރާ ކަމެއްވެސް ނޫން ބައެއްގެ ތަނަކަށް ހުއްދަނެތި ވަނުމަކީ،" ތަރުޖަމާނު ވިދާޅުވިއެވެ.

މުންދު އިތުރަށް ވިދާޅުވީ، އަދަދު ނޫހަކީ ދޮގުހެދުމާއި، ޑްރާމާ ކުޅުމާއި ފިލްމު އެޑިޓްކުރުމުގައި ހައްދެއް ނެތް ބައެއް ކަމަށެވެ. އަދި ހުއްދަ ނެތް ސައްހަ ނޫން މީހަކު ސްޓޫޑިއޯގައި އިނުމުގެ ސަބަބުން ޕްރޮގްރާމް ކުރިއަށް ނުގެންދެވި ވަގުތު ބޭކާރުވުމުން، އެކަމަށްޓަކައި ޕީއެސްއެމް އަށާއި ބައިވެރިވި އެހެން ހުރިހާ ނޫސްވެރިންގެ ކިބައިން މާފަށް އެދިވަޑައިގަންނަވާ ކަމަށެވެ. މީގެއިތުރުން ޕީއެސްއެމްގެ ފަރާތުންވެސް މި މައްސަލައިގައި ފިޔަވަޅު އަޅަންޖެހޭނަމަ ފިޔަވަޅު އަޅާނެކަމަށް މުންދު ވިދާޅުވިއެވެ.

ރައްޔިތުންގެ ސުވާލުތަކަށް ޖަވާބު ދިނުމަށް ޒިންމާދާރު ނޫސްވެރިންނާ އެކު ބާއްވާ މި ބައްދަލުވުމުގެ ފުރުސަތު ނަގާލައި، ހުރަސްއެޅުމުގެ ފުރުސަތު އެއްވެސް ފަރާތަކަށް ނުދެއްވާނެ ކަމަށް މުޙައްމަދު ޙުސައިން ޝަރީފް (މުންދު) ވިދާޅުވިއެވެ. އަދި ސައްހަ މީޑިއާތަކާއި ނޫސްވެރިންނާ އެކު، މާ ލަސްތަކެއް ނުވެ އެހެން މާހައުލެއްގައި މި އެޕިސޯޑު އަލުން ރެކޯޑުކުރާނެ ކަމުގެ ޔަގީންކަންވެސް ތަރުޖަމާނު ދެއްވިއެވެ.