ރާއްޖެ އިސްލާމްވިތާ 900 އަހަރު ފުރޭ ތާރީޚީ އަހަރާ ގުޅިގެން ރައީސުލްޖުމްހޫރިއްޔާ ތަހުނިޔާ ފޮނުއްވައިފި

ދިވެހިރާއްޖެ އިސްލާމްވިތާ 900 އަހަރު ފުރޭ ތާރީޚީ އަހަރު ފެށުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި އެންމެހައި ރައްޔިތުންނަށް ހެޔޮއެދުމާއި ތަހުނިޔާ ފޮނުއްވައިފިއެވެ.

ރައީސުލްޖުމްހޫރިއްޔާ މި ތަހުނިޔާ ފޮނުއްވާފައިވަނީ މިއަދު އެކްސް މެދުވެރިކުރައްވައި ކުރެއްވި ޕޯސްޓެއްގައެވެ. ރައީސްގެ މެސެޖުގައި ފާހަގަކުރެއްވި ގޮތުގައި މި ފެށުނު އަހަރަކީ ރާއްޖޭގެ ތާރީޚުގައި ނުހަނު ޚާއްޞަ އަހަރެކެވެ. އެއީ ރާއްޖެ އިސްލާމްވީތާ 900 އަހަރު ފުރުމުގެ ބަރަކާތްތެރި މުނާސަބާ ދިވެހިންނާ ބައްދަލުކުރާނެ އަހަރަށް ވާތީއެވެ.

އިސްލާމްކަމުގެ މަތިވެރި ނިޢުމަތުގައި ދިވެހި ޤައުމު އެތައް ސަތޭކަ އަހަރަކަށް ލެހެއްޓެވިކަމަށްޓަކައި، ގަދަކީރިތިވަންތަ މާތްﷲގެ ޙަޟްރަތަށް ރައީސް ޙަމްދުކުރެއްވިއެވެ. އަދި ދިވެހި ޤައުމަށް ނަޞްރާއި، ކާމިޔާބީއާއި، ހަމަޖެހުން މިންވަރުކޮށްދެއްވުމަށް އެދިވަޑައިގެން ދުޢާކުރެއްވިއެވެ.

މީގެ އިތުރުން، މި ފެށުނު އައު އަހަރަކީ ދިވެހި ކޮންމެ ރައްޔިތަކަށްމެ ބަރަކާތާއި ރަޙްމަތުން ފުރިގެންވާ އަހަރަކަށް ވުމަށް އެދިވަޑައިގަންނަވާކަމަށްވެސް ރައީސުލްޖުމްހޫރިއްޔާގެ މެސެޖުގައި ވިދާޅުވެފައިވެއެވެ.

ރާއްޖެ އިސްލާމްވިތާ 900 އަހަރު ފުރުމުގެ މުނާސަބާ މިއަހަރު ފާހަގަކުރާއިރު، މިއީ ދިވެހިންގެ ދީނީ ވަޙްދަތާއި ޤައުމީ އަމާންކަން ދެމެހެއްޓުމަށް ލިބޭ މުހިންމު ފުރުޞަތެއްގެ ގޮތުގައި ސަރުކާރުން ދެކެވަޑައިގަންނަވައެވެ.