ބޮޑު ތައްޓެއްގައި އަތް ނުލެވި 58 އަހަރު- އެކަން ބަދަލު ކުރަން އިނގިރޭސިން ގަދަ އަޒުމެއްގައި

2020 ވަނަ އަހަރު ޔޫރޯ ފައިނަލުގައި އިޓަލީއާއި ވާދަކޮށް ހިތްދަތި ގޮތަކަށް ބަލިވި އިނގިރޭސިން މިރޭ އަނެއްކާވެސް މި ކުރިމަތި ލަނީ ޔޫރޯގެ ފައިނަލަކާއިއެވެ. އެ ހިތްދަތިކަން ހަނދާން ނައްތާލާ 58 އަހަރު ބޮޑު ތައްޓެއްގައި އަތް ނުލެވި ދިޔުން މާޒީއަށް ހެދުމަށެވެ.

މިރޭގެ ފައިނަލާއި ކުރިމަތިލާއިރު އިނގިރޭސި ޓީމު އޮތީ ރަނގަޅު ފޯމެއްގައެވެ. މިރޭގެ މެޗު ކާމިޔާބުކޮށް އިނގިރޭސިންނަށް ތަށި ކާމިޔާބު ކުރެވިއްޖެނަމަ އެތަށް ގޮތަކުން ތާރީހް ބަދަލުކުރެވޭނެއެވެ. 58 އަހަރުގެ އިންތިޒާރު ނިމުމުގެ އިތުރުން ގައުމުން ބޭރުގައި އިނގިރޭސިންނަށް ބޮޑު ތައްޓެއް ލިބިފައެއް ނުވެއެވެ. އެހެންކަމުން މި ހުރިހާ ކަމެއް ބަދަލުކޮއް އިނގިރޭސިންނަށް ތަށި ކާމިޔާބު ކުރުމުގައި ޓީމު އޮތް އިރު ސަޕޯޓަރުންވެސް ދަނީ މިރޭގެ މެޗަށް ތައްޔާރުވަމުނެވެ.

މިރޭގެ މެޗު ބެލުމަށް 50،000 އިނިގިރޭސި ސަޕޯޓަރުން ދަނޑަށް ވަންނާނެކަމަށް ލަފާ ކުރެވެއެވެ. މި މެޗާއި ބެހޭ ގޮތުން ވާހަކަ ދައްކަމުން އިނގިރޭސި ކޯޗު ސައުތުގޭޓް ބުނީ ޓީމާއިމެދު ފަހުރުވެރި ވާކަމަށާއި، ގައުމުން ބޭރުގައި ފައިނަލް ކުޅެން ލިބުމަކީވެސް ފަހުރެއް ކަމަށެވެ.

މިރޭގެ މެޗާއި ކުރިމަތިލާއިރު ސްޕެއިންވެސް އޮތީ ރަނގަޅު ފޯމެއްގައެވެ. ރީތި ހިތްގައިމު ކުޅުމަކަށްފަހު ފްރާންސް ހަމަބިމަށް ތިރިކޮށް ފައިނަލަށް އައި ސްޕެއިން ހުއްޓުވަން އިނގިރޭސިންނަށް ފަސޭހައެއް ނުވާނެއެވެ.