ކޮމަންވެލްތުގައި ރާއްޖޭގެ ދައުރު ފުޅާކުރުމާ ގުޅޭގޮތުން ފޮރިން މިނިސްޓަރުގެ މުހިންމު މަޝްވަރާތަކެއް

ކޮމަންވެލްތުގައި ދިވެހިރާއްޖޭގެ ދައުރު އިތުރަށް ފުޅާކުރުމަށާއި، އެ ޖަމްޢިއްޔާއާ އެކު އޮންނަ ގުޅުން ބަދަހިކުރުމާ ގުޅޭގޮތުން މިނިސްޓަރ އޮފް ފޮރިން އެފެއާޒް އިރުތިޝާމް އާދަމް، ކޮމަންވެލްތުގެ ސެކްރެޓަރީ ޖެނެރަލްއާ އެކު މަޝްވަރާތަކެއް ކޮށްފިއެވެ.

ލަންޑަނުގައި ހުންނަ ކޮމަންވެލްތުގެ މައި މަރުކަޒު، މާލްބަރާ ހައުސްގައި ބޭއްވުނު މި ބައްދަލުވުމުގައި މިނިސްޓަރު އިރުތިޝާމް ވަނީ ކޮމަންވެލްތުގެ ސެކްރެޓަރީ ޖެނެރަލް ޝާރލީ އަޔޯކަރ ބޮޗްވޭއާ ބައްދަލުކުރައްވާފައެވެ. މި ބައްދަލުވުމުގައި ދިވެހިރާއްޖެއާއި ކޮމަންވެލްތާ ދެމެދު އޮތް ގާތް އަދި ޒަމާންވީ ގުޅުމުގެ މައްޗަށް މިނިސްޓަރު އަލިއަޅުއްވާލެއްވިއެވެ.

މި ބައްދަލުވުމުގައި ސެކްރެޓަރީ ޖެނެރަލް ބޮޗްވޭ ވަނީ، ތަރައްޤީވަމުން އަންނަ ކުދި ޖަޒީރާ ޤައުމުތަކަށް (އެސްއައިޑީއެސް) ކުރިމަތިވާ ތަފާތު ގޮންޖެހުންތައް ހައްލުކުރުމުގައާއި، އެ ޤައުމުތަކުގެ ހައްޤުތައް ބައިނަލްއަޤްވާމީ މައިދާނުގައި ވަކާލާތުކުރުމުގައި ރާއްޖެއިން އަދާކުރަމުންދާ އިސް ދައުރު ފާހަގަކުރައްވައި ތައުރީފު ކުރައްވާފައެވެ. އަދި މިނިސްޓަރު އިރުތިޝާމަށް މާލްބަރާ ހައުސްއިން މަރުޙަބާ ދެންނެވުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށާއި، މިއީ ރާއްޖެއިން ކޮމަންވެލްތުގެ މަސައްކަތްތަކަށާއި އުސޫލުތަކަށް ދޭ އަހައްމިއްޔަތު ހާމަވާ ކަމެއް ކަމަށްވެސް އެކަމަނާ ވިދާޅުވިއެވެ.

ބައްދަލުވުމަށްފަހު އެކްސްގައި ކުރެއްވި ޕޯސްޓެއްގައި މިނިސްޓަރު އިރުތިޝާމް ވަނީ ދެ ފަރާތުގެ މަސްލަހަތު ހިމެނޭ ކަންކަމުގައި މަޝްވަރާ ކުރުމަށް ފުރުސަތު ދެއްވި ކަމަށްޓަކައި ސެކްރެޓަރީ ޖެނެރަލްއަށް ޝުކުރު އަދާކުރައްވާފައެވެ. ރާއްޖެއިން ކޮމަންވެލްތުގެ ޗާޓަރަށާއި އަސާސްތަކަށް ފުރިހަމައަށް ތަބާވާނެ ކަމުގެ ޔަގީންކަން މިނިސްޓަރު ދެއްވިއެވެ. އަދި ކުރިއަށް އޮތް އަހަރުތަކުގައި ކޮމަންވެލްތުގެ ތެރޭގައި ރާއްޖޭގެ ބައިވެރިވުން އިތުރުކޮށް، ނުފޫޒުގަދަ ދައުރެއް އަދާކުރުމަކީ ރާއްޖޭގެ ޚާރިޖީ ސިޔާސަތުގެ މުހިންމު އަމާޒެއް ކަމަށްވެސް ވިދާޅުވިއެވެ.

2020 ވަނަ އަހަރު އަލުން ކޮމަންވެލްތާ ގުޅުނު ފަހުން، ރާއްޖެ ވެފައިވަނީ މޫސުމީ ބަދަލުތަކާއި، ކަނޑުގެ ސަލާމަތާއި ރައްކާތެރިކަން އަދި ދެމެހެއްޓެނިވި ތަރައްޤީ ފަދަ މުހިންމު ދާއިރާތަކުން ކުދި ޤައުމުތަކުގެ އަޑު އުފުލާ އިސް ޤައުމަކަށެވެ. 56 މެންބަރު ޤައުމު ހިމެނޭ މި ޖަމްޢިއްޔާގެ ތެރެއިން ބައިނަލްއަޤްވާމީ އެހީތެރިކަމާއި އެއްބާރުލުން ހޯދުމަށް ރާއްޖެއިން ދަނީ މެދުކެނޑުމެއްނެތި މަސައްކަތް ކުރަމުންނެވެ.