ޕީއެންސީ ބައިބައިކުރަން ފަތުރަނީ ކަނޑައެޅިގެން ދޮގު ޚަބަރުތަކެއް: ޕާޓީގެ ލީޑަރޝިޕުން ރައްދު ދީފި

ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އާ ގުޅުވައިގެން ބައެއް ނޫސްތަކުން ފަތުރަމުންދާ ޚަބަރުތަކަކީ ޕާޓީގެ ތެރޭގައި ފިތުނަ އުފައްދައި، ރައްޔިތުންގެ މެދުގައި އޮޅުވާލުންތަކެއް އުފެއްދުމަށް ގަސްތުގައި ކުރަމުންދާ މަސައްކަތެއް ކަމަށް ބުނެ އެ ޕާޓީގެ އިސް ބޭފުޅުން ވަރުގަދަ ރައްދެއް ދެއްވައިފިއެވެ.

ޕީއެންސީގެ ސެކްރެޓަރީ ޖެނެރަލް މޫސާ ފަތުހީ އާދަމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ކޮންގްރެސް ޕާޓީގެ މަތީ މަޖިލިސް 2026 ބޭއްވުމާ ބެހޭ ކަންކަން ވިލަރެސްކުރާ ކޮމެޓީ އެކުލަވާލި ގޮތާއި، އެ ޕާޓީގެ ސެނެޓުން ނިންމި ނިންމުންތަކާ ގުޅޭގޮތުން "އަދަދު" ނޫސް ހިމެނޭހެން ބައެއް މީޑިއާތަކުގައި ޝާއިޢުކޮށްފައިވަނީ ހަގީގަތާ ޚިލާފު ވާހަކަތަކެއް ކަމަށެވެ.

ކޮންގްރެސް ޕާޓީގެ މަތީ މަޖިލިސް - 2026 ބޭއްވުމާބެހޭ ކަންކަން ވިލަރެސްކުރާ ކޮމެޓީ އެކުލަވާލެވުނު ގޮތާބެހޭ ގޮތުންނާއި މެންބަރުންގެ މަޖިލީހުގެ ނިންމުމާބެހޭގޮތުން، އަދަދު ނޫހާއި ހުރިހާ ނޫހުގައި ލިޔެފައިވާ ޚަބަރަކީ ވަރަށް ބޮޑަށް އޮޅުވާލައި ފިތުނަ އުފެއްދުމަށް ލިޔެފައިވާ ޚަބަރެއް،

މިއަހަރުގެ އޭޕްރީލް 20 ގައި އެސްޖީގެ މަގާމާ ހަވާލުވެވަޑައިގެންނެވި ފަތުހީ ވިދާޅުވިއެވެ.

މި މައްސަލާގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވެސް ވަނީ މީޑިއާތަކުން ފަތުރާ ވާހަކަތައް ދޮގުކުރައްވާފައެވެ. މަޖިލިސް ރައީސް ވިދާޅުވީ، ޕާޓީގެ ސެނެޓުން ވަކި ގޮތަކަށް ކަމެއް ނިންމުމަށް ރިޔާސަތުން ޕާޓީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެއްވެސް ހުށަހެޅުމެއް ހުށަހަޅުއްވާފައި ނުވާ ކަމަށެވެ. އަދި ޕީއެންސީއަކީ ޑިމޮކްރަސީގެ ރިވެތި އުސޫލުން ހިންގާ ޕާޓީއެއްކަން ފާހަގަކުރައްވައި، ފިތުނަ ފަސާދަ އުފައްދައިގެން ޕާޓީ ބައިބައި ނުކުރެވޭނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ޕީއެންސީގެ ޕާލިމަންޓަރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙް ވިދާޅުވީ، ރައީސް މުޢިއްޒު ބޭނުންފުޅުނުވާ އެއްވެސް ކަމެއް ޕާޓީގެ ސެނެޓްގައާއި ލީޑަރޝިޕްގައި ނުހިނގާނެ ކަމަށެވެ. އަދި މިފަދަ ދޮގު ޚަބަރުތަކުން ސާފުވަނީ، ބައެއް ފަރާތްތަކުން ފައިސާ ދީގެން ނޫސްވެރިން ލައްވައި ބޮޑެތި އިތުރުފުޅުތައް ހައްދަމުންދާ މިންވަރު ކަމަށް ފަލާޙް ތުހުމަތު ކުރެއްވިއެވެ.

ރައީސް މުޢިއްޒަކީ މި ގައުމު މިފަހުގެ ތާރީޚެއްގައި ދެކުނު، މުޅި ގައުމުގެ ރައްޔިތުންގެ މަޝްވަރާއާއި ލަފާ ހޯއްދަވައިގެން ހަމައެކަނި ވެރިކަން ކުރައްވާ ރައީސް،

ފަލާޙް ވިދާޅުވިއެވެ.

ޕީއެންސީގެ ލީޑަރޝިޕުން ބުނަމުންދަނީ އެ ޕާޓީ އޮތީ ރައީސް ޑރ. މުޢިއްޒުގެ ފަހަތްޕުޅުގައި ވަރަށް ބަދަހިކޮށް ކަމަށާއި، ބޭރުން އަންނަ އެއްވެސް ނުފޫޒަކުން ނުވަތަ ފަތުރާ ދޮގު ޚަބަރަކުން ޕާޓީގެ ސަފުތައް ރޫޅާނުލެވޭނެ ކަމަށެވެ.