މަމްސް އެއިޑް ޖަމުއިއްޔާއާއި މިނިސްޓަރ އައިޝަތު ޝިހާމް ބައްދަލުކުރައްވައިފި

ޒަރޫރީ ބޭނުންތައް ފުއްދުމަށް ދަތި ޢާއިލާތަކަށް އެހީތެރިކަން ފޯރުކޮށްދިނުމުގައި މަސައްކަތް ކުރަމުންދާ މަމްސް އެއިޑް ޖަމުއިއްޔާއާއި އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ބައްދަލުކުރައްވައިފިއެވެ.

މަމްސް އެއިޑް އިން ގެންދަނީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ކުރިއަށް ގެންދާ ހާލު ކިހިނެއް؟ ޕްރޮގްރާމުގެ ތެރެއިން ފާހަގަވާ އެހީތެރިކަން ބޭނުންވާ ޢާއިލާތަކަށް، އެހީ ފޯރުކޮށްދިނުމުގައި ވެސް އިސް ރޯލެއް އަދާކުރަމުންނެވެ.

އެގޮތުން މިހާތަނަށް އެ ޖަމުއިއްޔާއާއި، ހައުސިންގް ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)އާއި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ ގުޅިގެން ހާލު ކިހިނެއް ޕްރޮގްރާމުގެ ތެރެއިން ދެނެގަނެވުނު މިފަދަ 6 ޢާއިލާއަކަށް ދަނީ އެހީތެރިކަން ފޯރުކޮށްދީ، ޢާއިލާތަކުގެ ހާލަތު ރަނގަޅު ކުރުމަށް މަސައްކަތް ކުރަމުންނެވެ.

ޢާއިލާތަކުގެ ހާލަތު ރަނގަޅު ކުރުމާއި، ފުދުންތެރި ޢާއިލާތައް ބިނާކުރުމަށް މަމްސް އެއިޑްއިން ކުރަމުން ގެންދާ މަސައްކަތްތަކަކީ، އިޖުތިމާޢީ ދުޅަހެޔޮކަމާއި، ފުދުންތެރި ޢާއިލާތަކެއް ބިނާކުރުމަށް ނުހަނު ބޭނުންތެރި މަސައްކަތަކަށް ވުމާއެކު، އެކަމަކީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ޝުކުރުވެރިކަމާއެކު ފާހަގަކުރާ ކަމެކެވެ.

ވަޒީރު ޑރ. ޢާއިޝަތު ޝިހާމް މަމްސް އެއިޑްގެ މުއައްސިސުންނާއެކު ކުރިއަށް ގެންދިޔަ ބައްދަލުވުމުގައި ވަނީ އެ ޖަމުއިއްޔާއާއި ގުޅިގެން އާންމު ރައްޔިތުންނަށް އެހީތެރިކަން ފޯރުކޮށްދެވޭނެ ގޮތްތަކާއި ގުޅިގެން މަސައްކަތްކުރާނެ ދާއިރާތަކާއި ގުޅިގެން މަޝްވަރާކޮށްފައެވެ.

އިޖުތިމާޢީ ދުޅަހެޔޮކަން ކަށަވަރުކުރުމަށް އެކި ޖަމުއިއްޔާތަކުން ކުރަމުންދާ މަސައްކަތްތަކީ ލާމަސީލު އަދި އަގު ނުކުރެވޭނެ މަސައްކަތްތަކެއްގެ ގޮތުގައި ވަޒީރު ޑރ. ޢާއިޝަތު ޝިހާމް ފާހަގަކުރައްވައެވެ.

އަދި ޖަމުއިއްޔާތަކާއި ގުޅިގެން މަސައްކަތް ކުރުމަކީ މި ވުޒާރާއިން ޝައުގުވެރިވާ އަދި ޚާއްސަ އިސްކަމެއް ދީގެން މަސައްކަތް ކުރާނެ ކަމެއްގެ ގޮތުގައި އެ ކަމަނާ ވަނީ ވިދާޅުވެފައެވެ.