އެމް.އައި.ބީގެ ރުފިޔާ ކާޑުން ޑޮލަރު މުޢާމަލާތް ކުރެވޭ ސައިޓްތަކަށް ބަދަލު ގެނެސްފި

މޯލްޑިވްސް އިސްލާމިކް ބޭންކް (އެމް.އައި.ބީ) ގެ ރުފިޔާ ޑެބިޓް ކާޑުތަކުން ބައެއް އީ-ކޮމާސް ވެބްސައިޓްތަކުގައި ޑޮލަރުން މުޢާމަލާތްކުރުން އެ ބޭންކުން މިއަދު ހަނިކޮށްފިއެވެ.

މިކަމާ ގުޅޭގޮތުން އެމް.އައި.ބީ އިން ނެރުނު ބަޔާނެއްގައި ބުނެފައިވަނީ، ރުފިޔާ ކާޑުތަކަށް ދީފައިވާ މަހަކު 250 ޑޮލަރުގެ ލިމިޓަކީ ކަސްޓަމަރުންގެ ޒަރޫރީ ބޭނުންތަކަށް ޚާއްޞަކޮށްފައިވާ މިންވަރެއް ކަމަށެވެ. ނަމަވެސް، ފަހަކަށް އައިސް ބައެއް ކަސްޓަމަރުން މި ޚިދުމަތުގެ ބޭނުން ހިފަމުންދަނީ އެހެނިހެން ކަންކަމުގައިކަން ފާހަގަކުރެވިފައިވާ ކަމަށް އެ ބޭންކުން ބުނެއެވެ.

އެ ބޭންކުން ހާމަކުރި ގޮތުގައި، މި ޚިދުމަތަކީ ދެމެހެއްޓެނިވި ގޮތެއްގައި ފޯރުކޮށްދެވޭ ޚިދުމަތަކަށް ހެދުމަށާއި، ކަސްޓަމަރުންގެ އެންމެ މުހިންމު ޒަރޫރީ ބޭނުންތަކަށް އިސްކަންދިނުމުގެ ގޮތުން، ބައެއް ވިޔަފާރި ވެބްސައިޓްތަކުގައި ޑޮލަރު ލިމިޓް ބޭނުންކުރުން ވަގުތީ ގޮތުން ވަނީ ހުއްޓާލާފައެވެ.

މި ބަދަލާއެކު، އީ-ކޮމާސް ވެބްސައިޓްތަކުގައި މަހެއްގެ މައްޗަށް އެންމެ ގިނަވެގެން ކުރެވޭނީ 10 މުޢާމަލާތް ކަމަށްވެސް އެމް.އައި.ބީ އިން ބުނެފައިވެއެވެ.

ނަމަވެސް، މި ބަދަލު ގެނައި ކަމުގައިވިޔަސް، އާންމުކޮށް ބޭނުންކުރާ ސަބްސްކްރިޕްޝަން ޚިދުމަތްތަކަށާއި، ރާއްޖޭން ބޭރުގެ ޕީ.އޯ.އެސް (POS) ޓާމިނަލްތަކުން ކުރާ ވިޔަފާރިތަކަށާއި، ސިއްޙީ ބޭނުންތަކަށާއި ދަތުރުފަތުރުގެ ޚަރަދުތަކަށް 250 ޑޮލަރުގެ ލިމިޓް ބޭނުންކުރެވޭނެ ކަމަށް އެ ބޭންކުން ޔަގީންކޮށްދެއެވެ.

އެމް.އައި.ބީ އިން ބުނި ގޮތުގައި މި ނިންމުން ނިންމީ ޑޮލަރުގެ ލިމިޓަކީ ކަސްޓަމަރުންގެ އެންމެ މުހިންމު ބޭނުންތަކަށް ބޭނުންކުރެވޭ އެއްޗަކަށް ހެދުމަށާއި، ވީހާވެސް ގިނަ ކަސްޓަމަރުންނަށް މި ލުއިފަސޭހަކަން ފޯރުކޮށްދިނުމުގެ މަޤްޞަދުގައެވެ.