ރާއްޖެއަށް ތާރީޚީ ކާމިޔާބީއެއް: ފުރަތަމަ ފަހަރަށް އދ. ގެ އީކޯސޮކަށް އިންތިޚާބުވީތީ ރައީސް މަރުހަބާ ވިދާޅުވެއްޖެ

އދ. ގެ އިކޮނޮމިކް އެންޑް ސޯޝަލް ކައުންސިލް (އީކޯސޮކް) ގެ 2027 އިން 2029 އަށް ހިނގާ ދައުރަށް ދިވެހިރާއްޖެ އިންތިޚާބުވުމަކީ ގައުމަށް ލިބުނު ފަޚުރުވެރި އަދި ތާރީޚީ ކާމިޔާބީއެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިކަން ހާމަކުރެއްވީ އެކްސް ގައި ކުރެއްވި ޕޯސްޓެއްގައެވެ. ރައީސް ވިދާޅުވީ، މިއީ ރާއްޖެ އދ. ގެ މެންބަރަކަށް ބަދަލުވި 60 އަހަރުގެ ތާރީޚުގައި މި ކައުންސިލަށް ރާއްޖެ އިންތިޚާބުވި ފުރަތަމަ ފަހަރު ކަމަށެވެ. މިއީ ބައިނަލްއަގުވާމީ މުޖުތަމައުއިން ދިވެހިރާއްޖެއަށް ކުރާ އިތުބާރާއި، ބައިނަލްއަގުވާމީ މައިދާނުގައި ރާއްޖެއިން ގެންގުޅޭ ހަރުދަނާ ސިޔާސަތުތައް ބަލައިގަންނަކަމުގެ ހެއްކެއް ކަމަށްވެސް އެމަނިކުފާނު ފާހަގަކުރެއްވިއެވެ.

ތަރައްޤީވަމުން އަންނަ ކުދި ޖަޒީރާ ގައުމެއްގެ ހައިސިއްޔަތުން، މޫސުމަށް އަންނަ ބަދަލުތަކާއި، އިގްތިސާދީ ގޮންޖެހުންތަކާއި، ދެމެހެއްޓެނިވި ތަރައްގީއަށް ހުރި ހުރަސްތައް ރާއްޖެއަށް ވަރަށް ރަނގަޅަށް އެނގޭކަން ރައީސް ފާހަގަކުރެއްވިއެވެ. އަދި އީކޯސޮކްގެ ގޮނޑިއާއެކު، ދުނިޔޭގެ އެކި ކަންކޮޅުތަކުގައި ތިބި ކުދި ޖަޒީރާ ގައުމުތަކާއި ތަރައްގީވަމުން އަންނަ ގައުމުތަކުގެ އުންމީދުތަކާއި އިސްކަންދޭ ކަންކަމަށް ވަކާލާތު ކުރުމަށް ރާއްޖެއަށް ވަރުގަދަ ޕްލެޓްފޯމެއް ލިބިގެންދާނެ ކަމަށްވެސް ވިދާޅުވިއެވެ.

ރައީސުލްޖުމްހޫރިއްޔާގެ ޕޯސްޓުގައި އިތުރަށް ވިދާޅުވީ، ރާއްޖޭގެ ބައިވެރިންނާ ގުޅިގެން ބައިނަލްއަގުވާމީ އެއްބާރުލުން އިތުރުކުރުމަށާއި، ދެމެހެއްޓެނިވި ތަރައްގީގެ މަސައްކަތްތައް ހަލުވިކުރުމަށް ރާއްޖެއިން މަސައްކަތް ކުރާނެ ކަމަށެވެ. އަދި އީކޯސޮކް މެދުވެރިކޮށް އިންސާފުވެރި މާލީ އެހީތެރިކަމާއި، ހަރުދަނާ ނަތީޖާތަކެއް ނެރެދޭ، ގޮންޖެހުންތަކަށް ކެތްކުރެވޭނެ މުސްތަގުބަލެއް ބައްޓަންކުރުމަށް ރާއްޖެއިން އިސްދައުރެއް އަދާކުރާނެ ކަމުގެ ޔަގީންކަން އެމަނިކުފާނު ދެއްވިއެވެ.

މި ތާރީޚީ ކާމިޔާބީއަކީ ރައީސް ޑރ. މުޢިއްޒުގެ ސަރުކާރުން ބައިނަލްއަގުވާމީ ދާއިރާގައި ރާއްޖޭގެ ދައުރު ވަރުގަދަކުރުމަށް ކުރަމުންދާ މަސައްކަތަށް ލިބުނު ބޮޑު ކުރިއެރުމެކެވެ.