ޕީއެންސީގެ އައު ރަސްމީ ވެބްސައިޓް ރައީސުލްޖުމްހޫރިއްޔާ ޑރ. މުއިއްޒު އިފްތިތާޙުކޮށްދެއްވައިފި

ރައީސުލްޖުމްހޫރިއްޔާ އަދި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ލީޑަރު ޑރ. މުޙައްމަދު މުޢިއްޒު، އެ ޕާޓީގެ އައު ރަސްމީ ވެބްސައިޓް ރަސްމީކޮށް އިފްތިތާޙުކޮށްދެއްވައިފިއެވެ.

ރައީސް މި ވެބްސައިޓް އިފްތިތާޙުކޮށްދެއްވީ ހުކުރު ދުވަހުގެ ރޭ ބޭއްވި ޕީއެންސީގެ ކޮންގްރެސް ނިންމުމުގެ ރަސްމިއްޔާތުގައެވެ.

ޕީއެންސީން މަޢުލޫމާތު ދެއްވި ގޮތުގައި، މި އައު ވެބްސައިޓަކީ ޒަމާނީ ފެންވަރަށް ތައްޔާރުކޮށްފައިވާ އަދި އެންމެ ފަހުގެ ޑިޖިޓަލް ވަސީލަތްތަކާއި ޚިދުމަތްތައް ހިމެނޭ ގޮތަށް ފަރުމާކޮށްފައިވާ ވެބްސައިޓެކެވެ.

މީގެއިތުރުން، މި ކޮންގްރެސްގެ ތެރޭގައި އެ ޕާޓީގެ ހައި ކައުންސިލް އިންތިޚާބު ކުރިއަށް ގެންގޮސްފައިވަނީ ވެސް ޑިޖިޓަލް ވޯޓިންގ ނިޒާމެއް މެދުވެރިކޮށެވެ. މިއީ އެ ޕާޓީގެ އެތެރޭގެ އިންތިޚާބީ މަރުޙަލާތަކުގައި ޑިޖިޓަލް ޓެކްނޮލޮޖީ ބޭނުންކުރަން ފެށި މުހިންމު ފިޔަވަޅެކެވެ. ޕީއެންސީން ވަނީ ޑިޖިޓަލްކޮށް މި އިންތިޚާބު ކުރިއަށް ގެންދިއުމަކީ ރާއްޖޭގެ އެހެން އެއްވެސް ސިޔާސީ ޕާޓީއަކުން މިހާތަނަށް ހޯދާފައިނުވާ ފަދަ ބޮޑު ކާމިޔާބީއެއްގެ ގޮތުގައި ފާހަގަކޮށްފައެވެ.

ދިވެހިރާއްޖެ ޑިޖިޓަލައިޒް ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅުތަކުގެ ތެރޭގައި ހިމެނޭ ކަމެކެވެ. އަދި މި ލަނޑުދަނޑި ޙާޞިލުކުރުމަށްޓަކައި ސަރުކާރުން އަންނަނީ ގިނަގުނަ މަސައްކަތްތަކަކާއި މަޝްރޫޢުތަކެއް ތަންފީޛުކުރަމުންނެވެ.