ކުޅުދުއްފުށިން 80،000 އަށްވުރެ ގިނަ ރުފިޔާގެ އިލެކްޓްރިކް ސާމާނު ވަގަށް ނެގި ދެމީހަކު ހައްޔަރުކޮށްފި

ހދ. ކުޅުދުއްފުށީގެ ބޯޓްޔާޑަކުންނާއި ގުދަނަކުން 80،000 އަށްވުރެ ގިނަ ރުފިޔާގެ އަގުހުރި އިލެކްޓްރިކް ސާމާނުތަކެއް ވަގަށް ނެގި ކަމުގެ ތުހުމަތުގައި ދެ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.

ފުލުހުން ހާމަކޮށްފައިވާ ގޮތުގައި މި މައްސަލައާ ގުޅިގެން މި މަހުގެ 9 ވަނަ ދުވަހު ހައްޔަރުކޮށްފައިވަނީ ކުޅުދުއްފުށީގެ ދެ ޒުވާނުންނެވެ. އެއީ:

1. ޙަސީބު އާދަމް (27 އަހަރު)، ތަންބީގެ، ހދ. ކުޅުދުއްފުށި

2. މުޙައްމަދު ނަބީލް އަޙްމަދު (27 އަހަރު)، ވައިޓް ހާޑް، ހދ. ކުޅުދުއްފުށި

މި ދެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ނަބީލް 12 ދުވަހަށް އަދި ޙަސީބު 5 ދުވަހަށް ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ.

މި ވައްކަމުގެ މައްސަލަ ފުލުހުންނަށް ރިޕޯޓްކޮށްފައިވަނީ މި މަހުގެ 8 ވަނަ ދުވަހުއެވެ. ފުލުހުން ވިދާޅުވި ގޮތުގައި ވަގަށް ނަގާފައިވާ ތަކެތީގެ ތެރޭގައި އިލެކްޓްރިކް ޑްރިލް، ކަރަންޓު ކަތުރު، ކަޓްއޮފް މެޝިން، ޓޫލް ބޮކްސް، ކަރަންޓު ނަރު އަދި އެހެނިހެން އިލެކްޓްރިކް އާލާތްތައް ހިމެނެއެވެ. މި ތަކެތީގެ ޖުމްލަ އަގު 80،000 ދިވެހި ރުފިޔާއަށްވުރެ މަތިވާނެ ކަމަށް ފުލުހުން އަންދާޒާ ކުރެއެވެ.

ފުލުހުން އިތުރަށް ވިދާޅުވީ، ވަގަށް ނަގާފައިވާ ހުރިހާ ތަކެތި މިހާރު ހޯދިފައިވާ ކަމަށާއި، އެ ތަކެތި މިހާރު އޭގެ ވެރިފަރާތާ ހަވާލުކުރުމުގެ މަސައްކަތް ކުރަމުންދާ ކަމަށެވެ.

މި މައްސަލަ ކުޅުދުއްފުށީ ޕޮލިސް ސްޓޭޝަނުން އިތުރަށް ތަޙުޤީޤު ކުރަމުންދާ ކަމަށްވެސް ފުލުހުން މައުލޫމާތު ދެއެވެ.