ކާބޯތަކެތި އުފައްދާ ފަރާތްތައް ދަފްތަރުކުރުމުގެ ޚިދުމަތް 'ވަން ގަވް' އަށް ބަދަލުކުރަނީ

މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ދެމުންގެންދާ މުހިންމު ޚިދުމަތެއް ކަމަށްވާ، އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކާ ފަރާތްތައް ދަފްތަރުކުރުމުގެ ޚިދުމަތް "ވަން ގަވް" ޕޯޓަލަށް ބަދަލުކުރުމަށް ނިންމައިފިއެވެ.

މިކަމާ ގުޅޭގޮތުން އެ އޮތޯރިޓީން ކުރި އިޢުލާނެއްގައި ބުނެފައިވަނީ، މިހާރު "ދިރިތި" ޕޯޓަލް މެދުވެރިކޮށް ދެމުންދާ މި ޚިދުމަތް، 7 ޖޫން 2026 އިން ފެށިގެން ދެން ލިބޭނީ ސަރުކާރުގެ އެއް ވިއުގަ "ވަން ގަވަރންމެންޓް" (ވަން ގަވް) ޕޯޓަލް މެދުވެރިކޮށް ކަމަށެވެ.

މި ބަދަލާ ގުޅިގެން، 3 ޖޫން 2026 ވާ ބުދަ ދުވަހުގެ މެންދުރުފަހު 2:00 އިން ފެށިގެން "ދިރިތި" ޕޯޓަލުން މި ޚިދުމަތް މެދުކަނޑާލާނެއެވެ. އަދި އާ ނިޒާމުގެ ދަށުން ޚިދުމަތަށް އެދި ހުށަހެޅުމުގެ ފުރުޞަތު ހުޅުވާލެވޭނީ 7 ޖޫން 2026 ގައެވެ.

އެމް.އެފް.ޑީ.އޭ އިން އިތުރަށް ހާމަކޮށްފައިވާ ގޮތުގައި، ޚިދުމަތް މެދުކަނޑާލާ މުއްދަތުގެ ތެރޭގައި، މިހާރު "ދިރިތި" ޕޯޓަލްގައި ދަފްތަރުވެފައިވާ ފަރާތްތަކުގެ މަޢުލޫމާތު "ވަން ގަވް" ޕޯޓަލަށް ބަދަލުކުރުމުގެ މަސައްކަތް ކުރިއަށްދާނެއެވެ.

މި ބަދަލަކީ ޚިދުމަތްތައް ލާމަރުކަޒީކޮށް، އެއް ފުރާޅެއްގެ ދަށުން އަވަސްކަމާއެކު ރައްޔިތުންނަށް ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ތެރެއިން އެޅުނު ފިޔަވަޅެކެވެ. މިކަމާ ގުޅޭގޮތުން އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން އެ އޮތޯރިޓީގެ ހޮޓްލައިން ނަންބަރުތައް ކަމަށްވާ 7603204 ނުވަތަ 3034221 އަށް ގުޅުއްވުމަށް އެމް.އެފް.ޑީ.އޭ އިން އިރުޝާދުދެއެވެ.