އިސްލާމީ ޢިލްމު ތަރުޖަމާ ކުރުމަށް ފެށި މަޝްރޫޢުގެ ފުރަތަމަ ފޮތް ޝާއިއުކޮށްފި

އިސްލާމީ ޢިލްމީ ފޮތްތައް ދިވެހި ބަހަށް ތަރުޖަމާ ކުރުމަށް އިސްލާމީ ކަންތައްތަކާ ބެހޭ ވުޒާރާއިން ފެށި ބޮޑު މަޝްރޫޫއުގެ ދަށުން ތަރުޖަމާކުރި ފުރަތަމަ ފޮތް ޝާއިޢުކޮށްފިއެވެ.

މި ފޮތަކީ 'އިސްލާމްދީނުގައި ބައިނަލްއަޤުވާމީ ގުޅުންތައް' މި މަޢުޟޫއުއަށް ޑރ. ވަހުބާ އައްޒުޙައިލީ ލިއުއްވާފައިވާ ފޮތެކެވެ. މި ފޮތް ދިވެހި ބަހަށް ތަރުޖަމާކުރެއްވީ އަލްއުސްތާޛު އިބްރާހިމް ރަޝީދު މޫސާއެވެ.

ޑރ. ބިލާލް ފިލިޕްސް ލިޔުއްވާފައިވާ 'ފަންޑަމެންޓަލްސް އޮފް ތައުހީދު' މި ފޮތުގެ ދިވެހި ތަރުޖަމާ މި ހަފްތާގެ ތެރޭގައި ނެރުމަށް މަސައްކަތް ކުރައްވަމުން ގެންދަވާ ކަމަށްވެސް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވިއެވެ.

މި މަޝްރޫއުއާއި ގުޅޭ ގޮތުން އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު މީގެ ކުރިން ވިދާޅުވީ އިސްލާމީ ޝަރީއަތާއި އިސްލާމިކް ސްޓަޑީސްގެ ދާއިރާއިންނާއި އަދި ފަނޑިޔާރުންނާއި ގާނޫނީ ވަކީލުންނާއި ދީނީ ދާއިރާތަކުން ކިޔަވަމުންދާ ދަރިވަރުންނަށް ބޭނުންވާ އިސްލާމީ ޢިލްމުގެ ވަރަށް މުހިންމު ފޮތްތަކެއް ތަރުޖަމާކުރެއްވުމުގެ ބޮޑު މަޝްރޫއެއް ފެށިފައިވާ ކަމަށާއި މިއީ މި ގޮތުން އިއުލާނުކުރެވޭ މި ފަދަ އެންމެ ބޮޑު މަޝްރޫއުކަމަށް ވެސް ވަޒީރު ވިދާޅުވިއެވެ.