ރައީސް ސިންގަޕޫރަށް ކުރެއްވި ދަތުރުފުޅާ ގުޅޭގޮތުން ފަތުރަނީ ދޮގު ވާހަކަތަކެއް: މުހުތާޒު
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި އެމަނިކުފާނުގެ އާއިލާ ސިންގަޕޫރަށް ކުރެއްވި ދަތުރުފުޅުގައި، ބަޔަކާ ބައްދަލުކުރައްވައި ސިޔާސީ މަޝްވަރާތަކެއް ކުރެއްވި ކަމަށް ބުނެ ފަތުރަމުންދަނީ މުޅިން ހަގީގަތާ ހިލާފު ދޮގު ވާހަކަތަކެއް ކަމަށް ސިންގަޕޫރުގައި ހުންނަވާ ރާއްޖޭގެ ޑެޕިއުޓީ ހައި ކޮމިޝަނަރު މުހުތާޒު މުހުސިން ވިދާޅުވެއްޖެއެވެ.
ކުރީގެ ޕްރޮސިކިއުޓަރ ޖެނެރަލްކަމާއި، ރައީސް އޮފީހުގެ ކްރިމިނަލް ޖަސްޓިސް އެޑްވައިޒަރުގެ މަގާމުވެސް ފުރުއްވާފައިވާ މުހުތާޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާގެ ދެކަނބަލުންނާއި އާއިލާ ސިންގަޕޫރަށް ކުރެއްވި ދަތުރުފުޅުގައި ބަޔަކާ ބައްދަލުކުރައްވައި ސިޔާސީ މަޝްވަރާތަކެއް ކުރެއްވި ކަމަށް ބުނެ ބައެއް ފަރާތްތަކުން ޚަބަރު ފަތުރަމުންދާ ކަމަށެވެ. ނަމަވެސް އެއީ އެއްވެސް އަސާސެއް ނެތް ދޮގު ވާހަކަތަކެއް ކަމަށް އޭނާ ވިދާޅުވިއެވެ.
މުހުތާޒު ވިދާޅުވި ގޮތުގައި، އެ ދަތުރުފުޅުގައި ރައީސުލްޖުމްހޫރިއްޔާ ހުރިހާ ވަގުތެއް ހޭދަކުރެއްވީ އާއިލާއާ އެކުގައެވެ. އަދި އެ ދަތުރުފުޅުގެ ކަންކަން އެންމެ ގާތުން ދުށް މީހެއްގެ ހައިސިއްޔަތުން، ސިޔާސީ އެއްވެސް ބައްދަލުވުމެއް ބާއްވާފައި ނުވާކަން ކަށަވަރުކޮށްދެއްވާ ކަމަށްވެސް އޭނާ ވިދާޅުވިއެވެ.
މީގެ އިތުރުން، މުހުތާޒު ވަނީ ސިޔާސީ ފިތުނަވެރިކަން އުފެއްދުމަށްޓަކައި ފަތުރާ މިފަދަ ދޮގު ވާހަކަތަކަށް ރައްޔިތުން ސަމާލުވުމަށް އިލްތިމާސް ކުރައްވާފައެވެ. އަދި މުޖުތަމައު ބައިބައިކޮށް، ހަގީގަތާ ހިލާފު މައުލޫމާތު ފެތުރުން ފަދަ ކަންކަމުން އެންމެހާ ފަރާތްތަކުން ދުރުހެލިވާން ޖެހޭ ކަމަށްވެސް އޭނާގެ ޕޯސްޓުގައި ފާހަގަކުރައްވާފައިވެއެވެ.
ރައީސުލްޖުމްހޫރިއްޔާގެ މި ދަތުރުފުޅަކީ އަމިއްލަ ދަތުރުފުޅެއް ކަމަށް ސަރުކާރުން ކުރިންވެސް ވަނީ ހާމަކޮށްފައެވެ. ސޯޝަލް މީޑިއާގައި މިފަދަ ދޮގު ޚަބަރުތަކެއް ފެތުރިފައި މިވަނީ ސިޔާސީ މަޝްރަހު ހޫނުވެފައިވާ ދަނޑިވަޅެއްގައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
