ށ. މިލަންދޫ ފައިބަރު މަސައްކަތްކުރާ ސަރަޙައްދެއްގައި ބޮޑު އަލިފާނުގެ ހާދިސާއެއް ހިނގައިފި

ށ. މިލަންދޫގައި ފައިބަރު އޮޑިދޯނިފަހަރު ބަނުމާއި މަރާމާތުކުރުމުގެ މަސައްކަތް ކުރާ ސަރަޙައްދެއްގައި ރޭ ވަރުގަދަ އަލިފާނުގެ ހާދިސާއެއް ހިނގައިފިއެވެ.

2026 ޖޫން 1 ވާ ހޯމަ ދުވަހުގެ ރޭ ހިނގި މި ހާދިސާގެ މައުލޫމާތު ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި، އަލިފާން ރޯވެފައިވަނީ އެ ރަށުގެ "އާދަމްކޮއިބޭ ފައިބަރު ވޯކްޝޮޕް" ހުންނަ ސަރަޙައްދުގައެވެ. މިއީ އާންމުކޮށް ގިނަ އަދަދެއްގެ އޮޑިދޯނިފަހަރު ބަނުމާއި މަރާމާތު ކުރުމުގެ މަސައްކަތް ކުރާ ތަނެކެވެ.

މި ހާދިސާ ހިނގުމާއެކު ރަށުގެ ގިނަ އަދަދެއްގެ ރައްޔިތުން އެ ސަރަޙައްދަށް އެއްވެ، އަލިފާން ނިއްވުމުގެ މަސައްކަތުގައި އަމަލީގޮތުން ބައިވެރިވެފައިވެއެވެ. ރަށުން ވާހަކަ ދެއްކި މީހަކު ބުނި ގޮތުގައި، އަލިފާން ރޯވި ސަރަޙައްދަކީ އެ ރަށުގައި އެއާޕޯޓް ތަރައްޤީ ކުރަމުންދާ ސަރަޙައްދާ ކައިރީގައި އޮންނަ، ގިނަ އަދަދެއްގެ ޑިންގީތައް އަޅާފައި އޮންނަ ސަރަޙައްދެކެވެ.

ހާދިސާ ހިނގި ވަގުތު އެ ސަރަޙައްދުގައި ހުރި ގިނަ ޑިންގީތަކެއް ރައްޔިތުންގެ އެހީތެރިކަމާއެކު ރައްކާތެރި ހިސާބުތަކަށް ބަދަލުކުރެވުނު ނަމަވެސް، މަދުވެގެން ދެ ޑިންގީއެއްގައި އަލިފާން ހިފާ ބޭނުންނުކުރެވޭ ވަރަށް އަނދާފައިވާ ކަމަށް މައުލޫމާތު ލިބެއެވެ. އަދި އަލިފާންގަނޑު ވަރަށް ބޮޑަށް ފެތުރި، އެ ސަރަޙައްދަށް ބޮޑެތި ގެއްލުންތަކެއް ވަނީ ލިބިފައެވެ.

މި ހާދިސާ ހިނގަން މެދުވެރިވި ސަބަބެއް އަދި މިހާތަނަށް ސާފުވެފައެއް ނުވެއެވެ. އަދި މި ހާދިސާގައި އެއްވެސް މީހަކަށް އަނިޔާއެއް ނުވަތަ ގެއްލުމެއް ލިބުނުކަމުގެ ރިޕޯޓެއް މިހާތަނަށް ލިބިފައެއް ނުވެއެވެ. ކަމާބެހޭ ފަރާތްތަކުން ދަނީ މި ހާދިސާ އިތުރަށް ތަޙުޤީޤު ކުރަމުންނެވެ.