ހުޅުމާލޭގައި ނުރައްކާތެރިކޮށް ސައިކަލު ދުއްވި ޒުވާނަކު ޖޫރިމަނާކޮށް، ސައިކަލް ޓޯކޮށްފި

ހުޅުމާލެ ފޭސް 1 ގައި އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ނުރައްކާތެރިކޮށް ދުއްވި ސައިކަލެއް ޓޯކޮށް، އެ ސައިކަލް ދުއްވި މީހާއަށް ފިޔަވަޅު އަޅައިފިއެވެ.

މޯލްޑިވްސް ޕޮލިސް ސާވިސްއިން ވިދާޅުވީ މި ހާދިސާ ހިނގާފައިވަނީ 2026 އޮކްޓޫބަރު 9 ވަނަ ދުވަހުގެ ރޭ 22:30 އެހައިކަންހާއިރު ކަމަށެވެ. އެގޮތުން، މިކަން ފާހަގަކުރެވިފައިވަނީ އެ ވަގުތު ހުޅުމާލެތެރެ ޕެޓްރޯލް ކުރަމުންދިޔަ ފުލުހުންގެ ބީޓަކަށެވެ.

ފުލުހުން މައުލޫމާތު ދެއްވި ގޮތުގައި، ހުޅުމާލެ ކިނބިގަސްމަގު ފްލެޓް 12 ކައިރިން ދެކުނުން އުތުރަށް ދުއްވާފައި ދިޔަ އެ ސައިކަލު ދުއްވާފައިވަނީ ކުރީ ފުރޮޅު ހިއްލައިގެން، މަގުމަތީގެ ސަލާމަތަށް ނުރައްކާވާ ފަދަ ގޮތަކަށެވެ.

މި މައްސަލައާ ގުޅިގެން ފުލުހުން ވަނީ އެ އުޅަނދު ޓޯކޮށް، ސައިކަލު ދުއްވަން އިން 20 އަހަރުގެ ދިވެހި ފިރިހެން މީހާ ހުއްޓުވައި އޭނާ ޖޫރިމަނާކޮށްފައެވެ.

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ހާއްސަ މަސައްކަތްތަކެއް ކުރަމުންދާއިރު، އާންމުންނަށް ނުރައްކާވާ ގޮތަށް ގަވާއިދާ ހިލާފަށް އުޅަނދު ދުއްވާ ފަރާތްތަކާމެދު ދިވެހި ފުލުހުންގެ ޚިދުމަތުން ދަނީ ހަރުކަށި ފިޔަވަޅުތައް އަޅަމުންނެވެ.