ސަރަޙައްދީ ހަމަޖެހުމާއި އިޤްތިޞާދީ އެއްބާރުލުން އިތުރުކުރުމަށް ރާއްޖެއާއި ގަތަރުން މަޝްވަރާކޮށްފި

ދިވެހިރާއްޖެ އަދި ގަތަރުގެ ދެމެދުގައި އޮތް ގާތް އަޚުވަންތަ ގުޅުން އިތުރަށް ބަދަހިކުރުމާ ގުޅޭގޮތުން ދިވެހިރާއްޖޭގެ ފޮރިން މިނިސްޓަރ އިރުތިޝާމް އާދަމް، ގަތަރުގެ ސްޓޭޓް މިނިސްޓަރ ފޯ ފޮރިން އެފެއާޒް ސުލްޠާން ބިން ސަޢުދު އަލް މުރައިޚީއާ ފޯނުން ގުޅުއްވައި މަޝްވަރާ ކުރައްވައިފިއެވެ.

މިނިސްޓްރީ އޮފް ފޮރިން އެފެއާޒުން ހާމަކޮށްފައިވާ ގޮތުގައި، މި މަޝްވަރާގައި ދެ ޤައުމުގެ ދެމެދުގައި އޮތް ގާތް ގުޅުމުގެ މައްޗަށް އަލިއަޅުވާލައްވައި، ދެ ފަރާތުން އިސްކަންދޭ މުހިންމު ދާއިރާތަކުން އެއްބާރުލުން އިތުރުކުރެވިދާނެ ގޮތްތަކާ ބެހޭގޮތުން ދެ ވަޒީރުން ވާހަކަފުޅު ދެއްކެވިއެވެ. މިގޮތުން، ޤަތަރުގެ ދޯހާގައި ދިވެހިރާއްޖޭގެ އެމްބަސީއެއް ހުޅުވުމާ ގުޅިގެން ދެ ޤައުމުގެ ދެމެދުގައި އޮތް ސިޔާސީ ގުޅުމަށް ލިބެމުންދާ ކުރިއެރުންތަކަށް މިނިސްޓަރ އިރުތިޝާމް މަރުޙަބާ ވިދާޅުވިއެވެ. އަދި ޤަތަރުން ރާއްޖެއަށް މެދުނުކެނޑި ދެމުންދާ އެހީތެރިކަމަށްޓަކައި ޝުކުރު އަދާކުރެއްވިއެވެ.

މީގެ އިތުރުން، މެދުއިރުމަތީގެ މިހާރުގެ މަސްރަޙާ ގުޅޭގޮތުންނާއި، އެ ސަރަޙައްދުގެ ސުލްޙަ މަސަލަސްކަމަށް ހުރި ގޮންޖެހުންތަކާ ބެހޭގޮތުން ދެ ވަޒީރުން ޚިޔާލު ބަދަލުކުރެއްވިއެވެ. މި މަޝްވަރާގައި މިނިސްޓަރ އިރުތިޝާމް ވަނީ ގަލްފުގެ ޤައުމުތަކާއެކު ރާއްޖެއިން ސާބިތުކަމާއެކު އޮތްކަން ހާމަކުރައްވައި، ވާހަކަދައްކައިގެންނާއި ޑިޕްލޮމެޓިކް ވަސީލަތްތައް މެދުވެރިކޮށް ސަރަޙައްދީ ސަލާމަތާއި ހަމަޖެހުން ޤާއިމުކުރުމަށް ކުރެވޭ މަސައްކަތްތަކަށް ރާއްޖޭގެ ފުރިހަމަ ތާއީދު އޮތްކަން ތަކުރާރު ކުރައްވާފައެވެ. އަދި ސަރަޙައްދީ އެއްބާރުލުން އިތުރުކުރުމުގައި ގަތަރުން އަދާކުރާ ބިނާކުރުވަނިވި ދައުރު މިނިސްޓަރު ފާހަގަކުރެއްވިއެވެ.

މި ފޯނު ކޯލުގައި، ސަރަޙައްދީ ހަލަބޮލިކަމުގެ ސަބަބުން ކުރިމަތިވަމުންދާ އިޤްތިޞާދީ ގޮންޖެހުންތަކާ ބެހޭގޮތުންވެސް ދެ ވަޒީރުން މަޝްވަރާ ކުރެއްވިއެވެ. އަދި އެ ސަރަޙައްދުގެ ރައްޔިތުންނަށާއި އިޤްތިޞާދަށް ކުރާ ނޭދެވޭ އަސަރުތައް ކުޑަކުރުމަށްޓަކައި، މަސްރަޙު އާންމު ހާލަތަކަށް ގެނައުމާއި ހަމަޖެހުން ޤާއިމުކުރުމުގެ މުހިންމުކަން ދެ ބޭފުޅުންގެ ވާހަކަފުޅުގައި ފާހަގަކުރެއްވިއެވެ.