ހޭދަކުރުމުގައި އިޤުތިޞާދުކުރުމަށް މިއަދުގެ ހުކުރު ޚުޠުބާގައި ގޮވާލައްވައިފި

މުދަލަކީ މާތް ﷲ އަޅުތަކުންނަށް ދެއްވާފައިވާ އަމާނާތެއް ކަމަށާއި، އެ މުދާ ހޯދުމާއި ހޭދަކުރުމުގައި އިސްލާމީ ޝަރީޢަތުގެ މިންގަނޑުތަކަށް ރައްކާތެރިވުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.

ޚުޠުބާގައި ފާހަގަކުރެއްވި ގޮތުގައި، ދުނިޔޭގައިވާހައި ތަކެއްޗަކީ މާތް ﷲ އަހަރެމެންގެ ޚިދުމަތުގައި ލައްވާފައިވާ ތަކެއްޗެވެ. އަދި މުދަލުގެ ޙަޤީޤީ މިލްކުވެރި ފަރާތަކީ މާތް ﷲ ކަމަށްވާއިރު، އެއީ އަހަރެމެން އިމްތިޙާނު ކުރެއްވުމަށް ޙަވާލުކުރައްވާފައިވާ އަމާނާތެކެވެ. އެހެންކަމުން މުދާ ހޯދުމުގައި ޚިޔާނާތްތެރިވުމާއި، ފޭރުމާއި، ވައްކަމާއި، ރިޝްވަތާއި، ރިބާ އަދި ޖުވާ ފަދަ ޙަރާމް ކަންކަމުން ދުރުހެލިވުމަށް ޚުޠުބާގައި ބާރުއަޅުއްވާފައިވެއެވެ.

މީގެ އިތުރުން، މުދާ ލިބުމަށްފަހު އެ މުދަލަށް ގެއްލުން ދިނުމާއި ބޭކާރު ގޮތުގައި ހޭދަކުރުމަކީ ހުއްދަ ކަމެއް ނޫންކަން ޚުޠުބާގައި ހަނދާންކޮށްދެއްވިއެވެ. "ބޭނުންވާ މިންވަރަށް ވުރެ އިތުރަށް މުދާ ގަތުމުން ދުރުވާން ޖެހޭނެ. ބޭނުންވާ ވަރަށް ވުރެ އިތުރަށް ގަންނަ މުދާ، ބޭނުންނުކޮށް ހުރެ މުއްދަތު ހަމަވެ އުކާލަން ޖެހޭ ފަހަރު މަދެއް ނޫން،" ޚުޠުބާގައި ވިދާޅުވިއެވެ.

ދިރިއުޅުމުގެ ޚަރަދުތައް ބެލެހެއްޓުމުގައި އިޤުތިޞާދީ ވިސްނުން އިސްކުރުމުގެ މުހިންމުކަމުގެ މައްޗަށް އަލިއަޅުވާލައްވަމުން، ލިބޭ މިންވަރަށް ވުރެ އިތުރަށް ޚަރަދުކުރުމާއި ދަރަނި ނެގުން ފަދަ އާދަތަކުން ދުރުވުމަށް ނަޞޭޙަތްތެރިވެފައިވެއެވެ. އަދި މުދަލުގައި އަނބިދަރިންނާއި، ފަޤީރުންނާއި މިސްކީނުންގެ ޙައްޤުތައް ވާކަން ދަނެ، އެ މީހުން އެ ޙައްޤުތަކުން މަޙްރޫމް ނުކުރުމަށްވެސް ގޮވާލެއްވިއެވެ.

ޚުޠުބާ ނިންމަވާލައްވަމުން ވިދާޅުވީ، ލިބޭ އެއްޗަކުން ދިރިއުޅުން ބައްޓަންކުރުމަކީ އިޖުތިމާޢީ ގިނަ މައްސަލަތަކަކުން ސަލާމަތްވެ، ޢާއިލާއަށް އުފާވެރިކަން ލިބޭނެ ކަމެއް ކަމަށެވެ. އަދި ލިބޭ އެއްޗެއް އެއްކޮށް ހުސްކޮށްނުލައި، މުސްތަޤުބަލަށްޓަކައި އޭގެ ބައެއް ރައްކާކުރުމަށް ހުރިހާ މުސްލިމުންނަށް ވަނީ އިލްތިމާސްކުރައްވާފައެވެ.