ނުއަގުގައި ދޯންޏެއް ކުއްޔަށް ހިފިކަމަށް ދެކެވޭ ވާހަކަ ފެނަކައިން ދޮގުކޮށްފި

ފެނަކައިން ނުއަގުގައި ދޯންޏެއް ކުއްޔަށް ހިފިކަމަށް ބުނެ ސޯޝަލް މީޑިއާގައި ދައްކަމުން އަންނަ ވާހަކަތައް ފެނަކައިން ދޮގުކޮށްފިއެވެ. 

ފެނަކައިން އެކަމާއި ގުޅިގެން ނެރުނު ބަޔާނުގައި ބުނެފައިވަނީ އެއީ ފެނަކައިން އެކި ތާރީޚުތަކުގައި ތަފާތު ބޭނުންތަކަށް ކޮށްފައިވާ މުއާމަލާތްތަކެއްގެ ލިޔެކިޔުންތަކުން ބައެއް ނަކަލުކޮށްގެން އެއީ އެއް ކަމަކަށް ކޮށްފައިވާ އެއް މުއާމަލާތެއް ކަމަށް ދައްކަންކޮށްފައިވާ މަސައްކަތެއްކަމަށެވެ. 

އެކަމަކީ ފާއިތުވި 7 މަސް ދުވަހުގެ ތެރޭގައި ކުންފުނީގެ އަދުގެ މެނޭޖްމެންޓުން ކުންފުނީގެ ޕްރޮކިއުމަންޓް މުއާމަލާތްތައް ހަރުދަނާކޮށް، ކުންފުންޏަށް ހިދުމަތް ފޯރުކޮށްދޭ ފަރާތްތަކާއި ކުންފުނިން ހިދުމަތް ފޯރުކޮށްދެމުންދާ ފަރާތްތަކުގެ އިތުބާރު އަލުން ހޯދަމުންދާ ދިއުމަށް ހުރަސް އަޅައި، ހަގީގަތް އޮޅުވާލައި ފިތުނަވެރި ވާހަކަތަކާއި އަޑުތައް ބޭނުންކޮށްގެން ކުންފުނީގެ ސާފުވަމުންދާ ނަން ކިލަނބު ކުރުމަށް ބައެއް ފަރާތްތަކުން ކުރަމުންދާ ނާތަހުޒީބު މަސައްކަތްތަކެއްކަމަށްވެސް ފެނަކައިން ބުނެއެވެ. އަދި މިއީ ޣައިރު ޒިންމާދާރު، އަދި މިނިވަން ނޫސްވެރިކަމުގެ ނިވަލުގައި ތިބެ، މުޖްތަމައު ފަސާދަ ކުރުމަށް ރޭވިގެން ހިންގާ ސިލްސިލާގެ ތެރެއިން ބޮޅެއް ކަމުގައި ފެނަކައިން ބުނެއެވެ.

އެ ކުންފުންޏަކީ ރާއްޖޭގެ 157 ރަށުގައި ފެނާއި ނަރުދަމާ އަދި ކަރަންޓުގެ އަސާސީ ހިދުމަތްތައް ފޯރުކޮށްދެމުންދާ ކުންފުންޏަކަށްވެފައި، ހިދުމަތްތަކަށް ބޭނުންވާ އެންމެ އަސާސީ ތަކެތި ވެސް ރަށްރަށުން ލިބެން ނުހުންނައިރު، ރަށްރަށުގެ ރައްޔިތުންނަށް މެދުކެނޑުމެއް ނެތި އިތުބާރާއެކު އެހިދުމަތްތައް ފޯރުކޮށްދިނުމަށް ކޮންމެހެން ފޮނުވަން ޖެހޭ ގިނަ އަދަދެއްގެ ތަކެތި މާލޭން އެރަށްރަށަށް އަދި އެއް ރަށުން އަނެއް ރަށަށް ފޮނުވުމަކީ ކުންފުނީގެ ދުވަހުން ދުވަހަށް ކުރެވޭ މުހިންމު މަސައްކަތުގެ ތެރެއިން ބައެއް ކަމަށް ފެނަކައިން ބުނެއެވެ.

ފާއިތުވިތަނުގައި ވަކި ދަތުރުތަކަށް ދޯނި ފަހަރު ނަގައި، އެވްރެޖް ގޮތެއްގައި 7 މިލިއަން ރުފިޔާ މަހެއްގެ މައްޗަށް ދަތުރުފަތުރަށް ހަމަޖައްސައި، އެ ކަމުން ނާޖައިޒު ފައިދާތަކެއް ބަޔަކު ނަގާފައި އޮތްއޮތުން ނިމުމަކަށް ގެނެސް، ކުންފުންޏަށް އެންމެ ފައިދާ ހުރި ގޮތުގައި އެއް ކުރެވެން ހުންނަ ދަތުރުތައް އެއްކޮށް، ގިނަ ދަތުރުތައް ކުރަން ޖެހުނަސް ހަރަދު ބޮޑުވެގެން ނުދާނެކަން ކަށަވަރު ކުރެވެނިވި ގޮތަކަށް ކުންފުނީގެ ތާރީހުގައި އެންމެ ކުޑަ އަގުގައި، ކުންފުނީގައި ކަނޑައަޅާފައިވާ ގަވައިދުތަކާއި އުސޫލުތަކުގެ ތެރެއިން ކުންފުނީގެ އަދުގެ މެނޭޖްމަންޓުން އެކަން ހަރުދަނާކޮށް އިންތިޒާމު ކުރަމުންދާ ދިއުން، ކުރިން އެކަންކަމުން ނާޖައިޒު ފައިދާ ހޯދި އަދި ހޯދައިދިން ފަރާތްތަކުން ދަތި އިހްސާސްތަކަކަށް ވުމަކީ މިފަދަ ފިތުނަ ފަސާދަ އުފެއްދުމުގެ މައިގަނޑު އެއް ސަބަބުން ކަމުގައި މި ކުންފުނިން ދެކެމެވެ ފެނަކައިގެ ބަޔާނުގައި ބުނެފައިވެއެވެ.

ފެނަކައިން ވަނީ ރައީސް، ޑރ. މުހައްމަދު މުއިއްޒު ކަނޑައަޅުއްވާފައިވާ ދެފުށް ފެންނަ ހަރުދަނާ އިންތިޒާމުތަކުގެ ތެރެއިން ރައްޔިތުންނާއި ގާތުން، ރައްޔިތުންނަށް ފައިދާ ހުރި ގޮތުގައި ހިދުމަތް ދިނުމުގައި ސިޔާސަތު ތަންފީޒު ކުރުމުގައި ސާބިތުކަމާއި އެކީ ކުރިއަށްދާނެ ކަމުގެ ޔަގީންކަން ދީފައެވެ.