ޕީއެންސީގެ މެންބަރުންނަށް ފައިސާ ބެހިކަމަށް ބުނެ ފަތުރަނީ ދޮގު ޚަބަރެއް: އިބްރާހީމް ޝުޖާއު

ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޕާލަމެންޓްރީ ގްރޫޕްގެ މެންބަރުންނަށް ފައިސާ ބަހާފައިވާ ކަމަށް ބުނެ "އަދަދު" ނޫހުން ފަތުރަމުންދާ ޚަބަރަކީ އެއްވެސް އަސާސެއް ނެތް ދޮގު ޚަބަރެއްކަމަށް ބާރަށު ދާއިރާގެ މެންބަރު އަދި ޕީއެންސީގެ ސީނިއާ ޑެޕިއުޓީ ޕީޖީ ލީޑަރު އިބްރާހީމް ޝުޖާއު ވިދާޅުވެއްޖެއެވެ.

ޝުޖާއު މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ. އޭނާ ވިދާޅުވި ގޮތުގައި ޕީއެންސީގެ ޕާލަމެންޓްރީ ގްރޫޕްގެ މެންބަރުންނަށްވެސް ލިބެނީ އެމްޑީޕީ އާއި މަޖިލީހުގެ އެހެނިހެން މެންބަރުންނަށްވެސް ލިބޭ އުސޫލުން، މަޖިލީހުން ކަނޑައަޅާފައިވާ ރަސްމީ މުސާރައެވެ. އެ ނޫން އެއްވެސް ފައިސާއެއް މެންބަރުންނަށް ދީފައިވާ ކަމަށް ބުނެ ދައްކާ ވާހަކަތަކީ ކަނޑައެޅިގެން އިތުރުފުޅެއް ކަމަށް އޭނާ ފާހަގަކުރެއްވިއެވެ.

ޕީއެންސީގެ ޕީޖީ މެންބަރުންނާ ގުޅޭގޮތުން މިފަދަ ދޮގު މަޢުލޫމާތު ފަތުރަމުންދާތީ އެކަން ހަރުކަށި އިބާރާތުން ކުށްވެރިކުރައްވަމުން ޝުޖާއު ވިދާޅުވީ، ދޮގު ޚަބަރު ފަތުރައިގެންނާއި ފިތުނަ އުފައްދައިގެން ޕީއެންސީގެ ޕީޖީ ގްރޫޕް ރޫޅާލެވޭނެ ކަމަށް ހީކުރުމަކީ މޮޔަކަމެއް ކަމަށެވެ. އަދި މިފަދަ އަމަލުތަކުގެ ސަބަބުން ސަރުކާރު ހިންގާ ޕާޓީގެ މެންބަރުންގެ މެދުގައި އޮތް ބަދަހި ގުޅުމަށް އެއްވެސް ބުރުލެއް ނޭރުވޭނެ ކަމުގެ ޔަގީންކަން އޭނާ ދެއްވިއެވެ.

މީގެ އިތުރުން ޝުޖާއު ވިދާޅުވީ، ޕީއެންސީގެ ސުޕަރ މެޖޯރިޓީ އޮތް 20 ވަނަ މަޖިލީހުން އަބަދުވެސް އިސްކަންދޭނީ ޤައުމާއި ރައްޔިތުންގެ ލާބަޔާއި މަންފާއަށްޓަކައި ކުރަންޖެހޭ މުހިއްމު މަސައްކަތްތައް ކުރުމަށް ކަމަށެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރައްޔިތުންނަށް ވެފައިވާ ވަޢުދުތައް ފުއްދުމުގައި މަޖިލީހުގެ ފުރިހަމަ އެއްބާރުލުން އޮންނާނެ ކަމަށްވެސް އޭނާ ވިދާޅުވިއެވެ.

ޝުޖާއު މިހެން ވިދާޅުވެފައިވަނީ ސަރުކާރު ހިންގާ ޕާޓީގެ މެންބަރުންނަށް މާލީ އިނާޔަތްތަކެއް ދެމުންދާ ކަމަށް ބުނެ އިދިކޮޅު ފަރާތްތަކުންނާއި ބައެއް މީޑިއާތަކުން ތުހުމަތުތަކެއް ކުރަމުންދާ ދަނޑިވަޅެއްގައެވެ.