ދިފާޢީ ވަޒީރު އެމް.އެން.ޑީ.އެފް ސަދަން އޭރިޔާ ކޮމާންޑުގެ އެއަރ ސްޓޭޝަނަށް ޒިޔާރަތްކުރައްވައިފި

ދިފާޢީ އަދި ވަތަނީ ޚިދުމަތާބެހޭ ވަޒީރު އޮނަރަބަލް ޙަސަން ރަޝީދު، އެމް.އެން.ޑީ.އެފް ސަދަން އޭރިޔާ ކޮމާންޑުގައި ޤާއިމްކޮށްފައިވާ އެއަރ ސްޓޭޝަނަށް ރަސްމީ ޒިޔާރަތެއް ކުރައްވައިފިއެވެ.

މި ޒިޔާރަތަކީ ދިފާޢީ ބާރުގެ ސަދަން އޭރިއާގެ މަސައްކަތްތައް ބައްލަވައިލެއްވުމަށް ވަޒީރު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ކުރެއްވި ޒިޔާރަތެކެވެ. އައްޑޫ ސިޓީ ގަމުގައި ހުންނަ މި އެއަރ ސްޓޭޝަނަށް ވަޑައިގެން، އެތަނުގައި މަސައްކަތްކުރާ އެމް.އެން.ޑީ.އެފް އެއަރ ކޯގެ ސިފައިންނާ ވަޒީރު ވަނީ ބައްދަލުކުރައްވާފައެވެ. މި ބައްދަލުކުރެއްވުމުގައި، ރާއްޖޭގެ ކަނޑުގެ ސަރަޙައްދު ބެލެހެއްޓުމަށްޓަކައި އެއަރ ކޯއިން ކުރިއަށްގެންދާ އޮޕަރޭޝަންތަކުގެ މަޢުލޫމާތު އޮޅުންފިލުއްވައި، އެ މަސައްކަތްތައް ހިނގާނުހިނގާ ގޮތް ވަޒީރު ބައްލަވައިލެއްވިއެވެ.

މީގެ އިތުރުން، އައްޑޫ ސިޓީ ގަމުގައި ހުންނަ އެމް.އެން.ޑީ.އެފް ސަދަން އޭރިޔާ ކޮމާންޑަށްވެސް ވަޒީރު ޒިޔާރަތްކުރެއްވިއެވެ. އެ ކޮމާންޑުގެ ތަރައްޤީއަށް ކުރެވެމުންދާ މަސައްކަތްތައް ބައްލަވައިލެއްވުމުގެ އިތުރުން، އެތަނުގައި ޚިދުމަތްކުރާ ސިފައިންނާ ބައްދަލުކުރައްވައި، މަސައްކަތުގައި ހުރި ދަތިތަކާ ގުޅޭގޮތުން ވަޒީރު ވަނީ މަޝްވަރާ ކުރައްވާފައެވެ.

ވަޒީރުގެ މި ދަތުރުފުޅުގައި ފުވައްމުލަކު ސިޓީގައި ޤާއިމްކޮށްފައިވާ އެމް.އެން.ޑީ.އެފް ފުވައްމުލައް ޕޯސްޓަށްވެސް ވަނީ ވަޑައިގެންފައެވެ. އެ މަރުކަޒުގެ މަސައްކަތްތައް ކުރިއަށްދާ ގޮތް ބައްލަވައިލައްވައި، އެތަނުގައި ތިއްބެވި ސިފައިންނާ ބައްދަލުކުރައްވައި، ޚިދުމަތް ދިނުމުގައި ކުރިމަތިވާ ގޮންޖެހުންތަކުގެ މަޢުލޫމާތު ވަޒީރު އޮޅުންފިލުއްވިއެވެ.

ދިފާޢީ ވަޒީރު ކަމުގެ މަޤާމާ ޙަވާލުވެވަޑައިގަތުމަށްފަހު، ރާއްޖޭގެ އެކި ސަރަޙައްދުތަކުގައި ހުރި ސިފައިންގެ މަރުކަޒުތަކަށް ވަޒީރު ޙަސަން ރަޝީދު ގެންދަވަނީ ޒިޔާރަތް ކުރައްވަމުންނެވެ. މި ޒިޔާރަތްތަކުގެ މައިގަނޑު މަޤްޞަދަކީ ސިފައިންގެ ތަރައްޤީއަށް ކުރެވޭ މަސައްކަތްތައް ގާތުން ބައްލަވައިލެއްވުމާއި، ސިފައިންގެ ވެލްފެއަރ ކަންކަން ހުރިގޮތް ދެނެގަތުން ކަމަށް ދިފާޢީ ވުޒާރާއިން މަޢުލޫމާތުދެއެވެ.