އަމިއްލަ ދިރިއުޅުމުގެ ސިއްރުތައް ހިފެހެއްޓުމަށާއި ސުލޫކީ މިންގަނޑުތަކަށް ހުރުމަތްތެރިކޮށް ހިތުމަށް މީޑިއާތަކަށް އިލްތިމާސްކޮށްފި

ބްރޯޑްކާސްޓް ކުރުމުގައްޔާއި ޚަބަރާއި މައުލޫމާތު ފެތުރުމުގައި އަމިއްލަ ދިރިއުޅުމުގެ ސިއްރުތައް ހިފެހެއްޓުމަށާއި، ކަނޑައެޅިފައިވާ ސުލޫކީ މިންގަނޑުތަކަށް ފުރިހަމައަށް އަމަލުކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން ހުރިހާ މީޑިއާތަކަށާއި ނޫސްވެރިންނަށް އިލްތިމާސްކޮށްފިއެވެ.

މީޑިއާ ކޮމިޝަނުން މިއަދު ނެރުނު ނޫސްބަޔާނެއްގައި ބަޔާންކޮށްފައިވަނީ، ބްރޯޑްކާސްޓަރުންނާއި މީޑިއާގައި މަސައްކަތްކުރާ ފަރާތްތަކުގެ ސުލޫކީ މިންގަނޑާއި، އަމަލުކުރަންޖެހޭ ބްރޯޑްކާސްޓް ކުރުމުގެ މިންގަނޑުތަކުގެ ދަށުން، އަމިއްލަ ދިރިއުޅުމުގެ ސިއްރު ހިފެހެއްޓުމާއި، އިންޓަވިއުތަކާއި ރެކޯޑިންގތައް އަދި މައުލޫމާތު އެއްކުރުމާއި ބޭނުންކުރުމާ ގުޅޭގޮތުން މުހިންމު ފަންނީ ޒިންމާތަކެއް ކަނޑައަޅާފައިވާ ކަމަށެވެ.

އެހެންކަމުން، ފޯނު ކޯލަކަށް ޖަވާބުދޭ ނުވަތަ މުއާމަލާތެއްގައި ބައިވެރިވާ ކޮންމެ މީހަކީވެސް، އެ މުއާމަލާތެއް އާންމުންނަށް ބްރޯޑްކާސްޓްކުރުމަށް އިއުތިރާޒެެއް ނެތް ފަރާތެއްކަން ކަށަވަރުކުރަންޖެހޭނެ ކަމަށް ކޮމިޝަނުން ބުންޏެވެ. އަދި ފޯނު މުއާމަލާތެއް ވަގުތުން ލައިވް ކުރަން ގަސްދު ކުރާނަމަ، އެ ފޯނު ކޯލަކީ ވަގުތުން ލައިވް ކުރެވެމުންދާ ކޯލެއްކަން އެ މީހަކަށް ކުރިން ސާފުކޮށް އަންގަންޖެހޭނެ ކަމަށްވެސް އެ ބަޔާނުގައި ވަނީ ފާހަގަކޮށްފައެވެ.

މީގެ އިތުރުން، ކޮންމެ މުއާމަލާތެއްގައިވެސް ރުހުން ހޯދުމާއި، އަމިއްލަ ދިރިއުޅުމުގެ ސިއްރު ހިފެހެއްޓުމާއި، އިންސާނީ ކަރާމާތް ރައްކާތެރިކުރުމުގެ އިތުރުން އިންސާފުވެރިކަމާއެކު މުއާމަލާތްކުރުމާ ގުޅޭ ގޮތުން ކަނޑައަޅާފައިވާ މިންގަނޑުތަކަށް ބްރޯޑްކާސްޓަރުންނާއި މީޑިއާގައި މަސައްކަތް ކުރާ ފަރާތްތަކުން ފުރިހަމައަށް ބޯލަނބަންވާނެ ކަމަށް ކޮމިޝަނުން ބުނެފައިވެއެވެ.

އެ ބަޔާނުގައި އިތުރަށް ބުނެފައިވަނީ، އެމީހަކަށް ނޭނގި ނުވަތަ އެކަށީގެންވާ ހުއްދައަކާ ނުލައި ހޯދާފައިވާ ރެކޯޑިންގތަކާއި މައުލޫމާތުތައް ބޭނުންކުރުމުގައި ޚާއްސަ ސަމާލުކަމެއް ދޭންޖެހޭނެ ކަމަށެވެ. އަދި މިފަދަ ތަކެތި ބޭނުންކުރަންވާނީ ގާނޫނުތަކާއި ގަވާއިދުތަކުގެ އިތުރުން، ނޫސްވެރިންގެ ސުލޫކީ މިންގަނޑުތަކާ އެއްގޮތްވާ ގޮތުގެ މަތިން އެކަނި ކަމަށްވެސް ކޮމިޝަނުން ހަނދާންކޮށްދީފައިވެއެވެ.

މީޑިއާ ކޮމިޝަނުގެ ބަޔާން ނިންމާލަމުން ވަނީ، ޒިންމާދާރު އަދި ފަންނީ ބްރޯޑްކާސްޓް ކުރުމުގެ މިންގަނޑުތައް ދެމެހެއްޓުމަށާއި، ވަކިވަކި ފަރުދުންގެ އަމިއްލަ ދިރިއުޅުމުގެ ސިއްރުތަކާއި، ކަރާމާތާއި ހައްގުތައް ރައްކާތެރި ކުރުމުގައި ހުރިހާ މީޑިއާ އިދާރާތަކުން ފުރިހަމަ އެއްބާރުލުން ދިނުމަށް ގޮވާލާފައެވެ.