ދުނިޔޭގެ ކާބޯތަކެތީގެ ރައްކާތެރިކަމުގެ ދުވަސް ފ. ނިލަންދޫގައި ކުލަގަދަކޮށް ފާހަގަކޮށްފި

ދުނިޔޭގެ ކާބޯތަކެތީގެ ރައްކާތެރިކަމުގެ ދުވަސް ފާހަގަކުރުމުގެ ގޮތުން ރާއްޖޭގައި ބޭއްވި ޚާއްޞަ ހަރަކާތްތައް ފ. ނިލަންދޫގައި ކުލަގަދަ ރަސްމިއްޔާތަކާއެކު ބާއްވައިފިއެވެ. ކޮންމެ އަހަރެއްގެ ޖޫން މަހުގެ 7 ވަނަ ދުވަހަކީ ބައިނަލްއަޤްވާމީ ގޮތުން ފާހަގަކުރާ ކާބޯތަކެތީގެ ރައްކާތެރިކަމުގެ ދުވަހެވެ.

މިއަހަރުގެ މި ދުވަހަށް ކަނޑައަޅާފައިވާ ޝިޢާރަކީ "From burden to solution – safe food everywhere" އެވެ. މި ޝިޢާރުގެ ދަށުން މައިގަނޑު ގޮތެއްގައި އަލިއަޅުވާލާފައިވަނީ ރައްކާތެރިނޫން ކާބޯތަކެތީގެ ސަބަބުން އިންސާނުންގެ ދުޅަހެޔޮކަން ގެއްލި، އެކި ބަލިތަކަށް މަގުފަހިވާކަމާއި، މިފަދަ ބަލިތައް މަދުކުރުމަށްޓަކައި ރައްކާތެރި ކާބޯތަކެތީގެ މާހައުލެއް ޤާއިމުކުރުމުގެ މުހިންމުކަމުގެ މައްޗަށެވެ.

މި ދުވަސް ފާހަގަކުރުމަށް ނިލަންދޫގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދުއެވެ. މި ރަސްމިއްޔާތުގައި ނިލަންދޫ ދާއިރާގެ މެންބަރު ފާތިމަތު ސައުދާ އާއި، ރަށު ކައުންސިލްގެ ރައީސްގެ އިތުރުން ސަރުކާރުގެ އިސްވެރިން ބައިވެރިވެވަޑައިގެންނެވިއެވެ.

މި ރަސްމިއްޔާތުގެ ތެރެއިން މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) ގެ އާ ލޯގޯ އިފްތިތާހުކުރުމާއި، ކާބޯތަކެތީގެ ޚިދުމަތްދޭ ތަންތަން އަހުލުވެރިކުރުމަށް ތައްޔާރުކުރެވިފައިވާ "ސަމާވަރު" ޕްރޮގްރާމް އިފްތިތާހުކުރުން ކުރިއަށްދިޔައެވެ.

ދުވަހުގެ ހަރަކާތްތަކުގެ ތެރެއިން ނިލަންދޫގައި ދޮރުން ދޮރަށް ހިނގައި، ގޭގޭގައި ރައްކާތެރިކަމާއެކު ކާބޯތަކެތި ތައްޔާރުކުރާނެ ގޮތުގެ މަޢުލޫމާތު އާންމުންނަށް ވަނީ ދީފައެވެ. މީގެ އިތުރުން، ސްކޫލް ކުދިންނަށް ޚާއްޞަ އެސެމްބްލީއެއް ބާއްވައި، ކާބޯތަކެތީގެ ރައްކާތެރިކަމާ ގުޅޭގޮތުން ދަރިވަރުން ހޭލުންތެރިކުރުވާފައިވެއެވެ.

ދުނިޔޭގެ ސިއްޙަތު ޖަމިއްޔާ (ޑަބްލިއު.އެޗް.އޯ) ގެ ހިސާބުތަކަށް ބަލާއިރު، ކާބޯތަކެތީގެ ޒަރީޢާއިން ޖެހޭ ބަލިތަކުގައި އަހަރަކު 600 މިލިއަން މީހުން ބަލިވެ، 420,000 މީހުން ފުރާނަ ދޫކުރެއެވެ. މީގެ ތެރެއިން 40 އިންސައްތައަކީ ފަސް އަހަރުން ދަށުގެ ކުޑަކުދިންނެވެ.

އެމް.އެފް.ޑީ.އޭ އިން ފާހަގަކުރި ގޮތުގައި، ކާބޯތަކެތީގެ ރައްކާތެރިކަން ކަށަވަރުކުރުމަކީ ހަމައެކަނި މުއައްސަސާއެއްގެ ޒިންމާއެއް ނޫނެވެ. އެއީ އުފައްދާ ފަރާތުން ފެށިގެން ބޭނުންކުރާ ފަރާތާ ހަމައަށް އެންމެންގެ ޒިންމާއެކެވެ. އެގޮތުން ދަނޑުވެރިކަމާއި، ތަކެތި ގުދަންކުރުމާއި، ވިޔަފާރިކުރުމުގެ ހުރިހާ މަރުހަލާއެއްގައިވެސް ސާފުތާހިރުކަމުގެ މިންގަނޑުތަކަށް އަމަލުކުރުމަކީ ބަލިތަކުން ސަލާމަތްވުމަށް އޮތް އެންމެ ބޮޑު ހައްލުކަމަށް އެ އޮތޯރިޓީން ބުނެއެވެ.