ހޯރަފުށީ ސިއްޙީ މަރުކަޒުގެ މުވައްޒަފު އުއްމުކުލްޘޫމް ޒާހިރުގެ ދިގު މުއްދަތުގެ ޚިދުމަތުގެ އަގު ވަޒަންކޮށްފި

ހއ. ހޯރަފުށީ ސިއްޙީ މަރުކަޒުގައި ދިގު މުއްދަތަކަށް ޚިދުމަތް ކުރެއްވުމަށްފަހު ވަކިވެވަޑައިގަންނަވާ ހެލްތް އޮގްޒީލިއަރީ އަލްފާޟިލާ އުއްމުކުލްޘޫމް ޒާހިރުގެ އިޚްލާޞްތެރި ޚިދުމަތުގެ އަގު އެ މަރުކަޒުން ވަޒަންކޮށްފިއެވެ.

މިކަމަށްޓަކައި ބޭއްވުނު ޚާއްޞަ ބައްދަލުވުމެއްގައި، އުއްމުކުލްޘޫމް ޒާހިރު ސިއްޙީ ދާއިރާގައި ހޭދަކުރެއްވި 28 އަހަރާއި، 9 މަހާއި، 22 ދުވަހުގެ ދިގު މުއްދަތުގެ ޚިދުމަތްތައް ވަނީ ފާހަގަކޮށްފައެވެ. އޭނާއަކީ މަސައްކަތަށް ނުހަނު ފަރުވާތެރި، މުވައްޒަފުންނާ ގުޅޭ، އަދި ވަޒީފާގެ ޒިންމާތަކާއި މަސްޢޫލިއްޔަތުތައް އެންމެ ފުރިހަމައަށް އަދާކުރެއްވި ހިތްވަރުގަދަ ކަނބަލެއްގެ ގޮތުގައި ހޯރަފުށީ ސިއްޙީ މަރުކަޒުން ސިފަކުރެއެވެ.

ހޯރަފުށީ ސިއްޙީ މަރުކަޒުގެ ކުރިއެރުމަށްޓަކައި އުއްމުކުލްޘޫމް ޒާހިރު ކޮށްދެއްވި ގިނަގުނަ މަސައްކަތްތަކަކީ އެ މަރުކަޒުން ނުހަނު އުފަލާއެކު ބަލައިގަންނަ ކަންތައްތަކެކެވެ. ވަރަށް މުރާލިކަމާއެކު އޭނާ ކޮށްދެއްވި މި ޚިދުމަތުގެ އަގު ވަޒަންކޮށް، ސިއްޙީ މަރުކަޒުގެ ހުރިހާ މުވައްޒަފުންގެ ނަމުގައި އޭނާއަށް ވަނީ އިޚްލާޞްތެރިކަމާއެކު ޝުކުރު އަދާކޮށްފައެވެ.

މި މުނާސަބަތުގައި އޭނާގެ ކުރިއަށް އޮތް ދުވަސްތަކަކީ ބާއްޖަވެރި ދުވަސްތަކަކަށް ވުމަށް އެ މަރުކަޒުގެ މުވައްޒަފުން ވަނީ އެދިފައެވެ.