މެލޭޝިޔާގައި ދިރިއުޅޭ ދިވެހިން ކުލަގަދަކޮށް އަޟްޙާ އީދު ފާހަގަކޮށްފި

މެލޭޝިޔާގައި ދިރިއުޅޭ ދިވެހި މުޖުތަމަޢުގެ ބައިވެރިންނާ އެކު، 1447 ހިޖުރީ އަހަރުގެ އަޟްޙާ އީދު ފާހަގަކުރުމަށް މެލޭޝިޔާގައި ހުންނަ ދިވެހި ހައިކޮމިޝަނުން ޚާއްސަ ހަފްލާއެއް ބާއްވައިފިއެވެ.

2026 ވަނަ އަހަރުގެ އަޟްޙާ އީދާ ގުޅުވައިގެން ބޭއްވި މި ހަފްލާއަކީ މެލޭޝިޔާގައި ދިރިއުޅޭ ދިވެހިންގެ މެދުގައި އޮންނަ ގުޅުން ބަދަހިކޮށް، އީދުގެ އުފަލާއި ރޫޙު އެކުވެރިކަމާ އެކު ދެމެހެއްޓުމުގެ މަގުސަދުގައި ބޭއްވި ބައްދަލުވުމެއް ކަމަށް މެލޭޝިޔާގައި ހުންނަ ދިވެހި ހައިކޮމިޝަނުން ހާމަކުރެއެވެ.

ދިވެހި ހައިކޮމިޝަނުން "އެކްސް" މެދުވެރިކޮށް ހާމަކޮށްފައިވާ ގޮތުގައި، މި ހަފްލާގައި ދިވެހި ބަހާއި ސަގާފަތް ރަމްޒުކޮށްދޭ ތަފާތު ހަރަކާތްތަކެއް ވަނީ ކުރިއަށް ގެންގޮސްފައެވެ. އޭގެ ތެރޭގައި ފޯރިގަދަ ބޯޑުބެރުގެ ހަރަކާތްތަކާއި، ސަގާފީ ތަފާތު ނެށުންތަކުގެ އިތުރުން ކުޑަކުދިންނާއި އާއިލާތަކަށް ޚާއްސަ ކުޅިވަރުތަކާއި ހަރަކާތްތައް ހިމެނެއެވެ. އަދި ހަފްލާގެ ބައިވެރިންގެ މެދުގައި ނެގުނު ގުރުއަތުން ހޮވޭ ފަރާތްތަކަށް އަގުހުރި އިނާމުތަކެއް ދިނުން ވެސް ކުރިއަށް ދިޔައެވެ.

މި ހަފްލާގައި ދިވެހި ސަގާފަތާއި އާދަކާދަތައް ދައްކުވައިދިނުމަށްޓަކައި މެލޭޝިޔާގައި ހަރަކާތްތެރިވާ ދިވެހި ދަރިވަރުންގެ ޖަމިއްޔާތަކުން ވަނީ އިސް ދައުރެއް އަދާކޮށްފައެވެ. އެގޮތުން ސަންވޭ ޔުނިވާސިޓީ، ޓޭލާޒް ޔުނިވާސިޓީ، އޭޝިޔާ ޕެސިފިކް ޔުނިވާސިޓީ (އޭ.ޕީ.ޔޫ) އަދި މޯލްޑިވްސް ނޭޝަނަލް ޔުނިވާސިޓީ (އެމް.އެން.ޔޫ) ގެ ދަރިވަރުންގެ ފަރާތުން ހުށަހަޅައިދިން ސަގާފީ އައިޓަމްތައް ފާހަގަކޮށްލެވެއެވެ.

މެލޭޝިޔާގައި ހުންނަ ދިވެހި ހައިކޮމިޝަނުން ވަނީ މި ހަފްލާ ކާމިޔާބުކަމާ އެކު ނިންމާލުމަށް އެހީތެރިވެދިން ހުރިހާ ވޮލަންޓިއަރުންނަށާއި، ދަރިވަރުންނަށާއި، ހުށަހެޅުންތައް ހުށަހަޅައިދިން ފަރާތްތަކުގެ އިތުރުން މެލޭޝިޔާގައި ދިރިއުޅޭ ދިވެހި މުޖުތަމަޢުގެ އެންމެހާ ފަރާތްތަކަށް އިޚްލާޞްތެރިކަމާ އެކު ޝުކުރު އަދާކޮށްފައެވެ.