ސްޓޭޓް ފާމާއިން ޕާކިސްތާނުގެ ހިރާނިސް ފާމަސޫޓިކަލްސްއާއެކު އެއްބަސްވުމެއްގައި ސޮއިކޮށްފި

ދިވެހިރާއްޖޭގެ ސިއްޙީ ނިޒާމު ހަރުދަނާކޮށް، ފެންވަރު ރަނގަޅު ބޭހުގެ ޚިދުމަތް ކަށަވަރުކުރުމަށްޓަކައި ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް (ސްޓޭޓް ފާމާ) އިން ޕާކިސްތާނުގެ މަޝްހޫރު ކުންފުންޏެއް ކަމަށްވާ ހިރާނިސް ފާމަސޫޓިކަލްސް ޕްރައިވެޓް ލިމިޓެޑާއެކު ޑިސްޓްރިބިއުޝަން އެއްބަސްވުމެއްގައި ސޮއިކޮށްފިއެވެ.

މި ސެޕްޓެމްބަރު މަހުގެ 3 ވަނަ ދުވަހު ސޮއިކުރެވުނު މި އެއްބަސްވުމަކީ ރާއްޖެއަށް ބޭނުންވާ ފެންވަރު ރަނގަޅު ފާމަސޫޓިކަލް އުފެއްދުންތައް މެދުކެނޑުމެއްނެތި ފޯރުކޮށްދިނުމުގެ ނިޒާމު އިތުރަށް ވަރުގަދަކުރުމަށް ވެވުނު މުހިންމު އެއްބަސްވުމެކެވެ.

ސްޓޭޓް ފާމާއިން މަޢުލޫމާތު ދެއްވާ ގޮތުގައި، މިއީ އެ ކުންފުނީގެ ބައިނަލްއަޤްވާމީ ސަޕްލަޔަރުންގެ ވިއުގަ ފުޅާކޮށް ހަރުދަނާކުރުމަށް އެޅުނު މުހިންމު ފިޔަވަޅެކެވެ. އިތުބާރު ހުރި ސަޕްލައި ޗެނަލްތައް ޤާއިމުކުރުމުގެ ސަބަބުން، ސަރުކާރު ހިއްސާވާ މި ކުންފުނިން ރާއްޖެއަށް ބޭނުންވާ މެޑިކަލް ސާމާނު ހޯދުމަށް ކުރަމުންދާ މަސައްކަތްތަކަށް ބޮޑު ކުރިއެރުމެއް ލިބިގެންދާނެއެވެ.

މި އެއްބަސްވުމުގެ މައިގަނޑު މަޤްޞަދަކީ ރާއްޖޭގެ ހުރިހާ ސަރަޙައްދެއްގައި ދިރިއުޅޭ ރައްޔިތުންނަށްވެސް ރައްކާތެރި، ފެންވަރު ރަނގަޅު ބޭސް ފަސޭހަކަމާއެކު ލިބޭނެ އިންތިޒާމު ހަމަޖެއްސުމެވެ. މީގެއިތުރުން، ޒަރޫރީ ބޭސްތައް ހުސްނުވެ ލިބޭނެކަން ކަށަވަރުކުރުމަށްޓަކައި ލޮޖިސްޓިކްސް އިންތިޒާމުތައް ހަރުދަނާކޮށް، ބޭހުގެ ދަތިކަން ކުރިމަތިވުމުގެ ފުރުޞަތު ކުޑަކުރުންވެސް މި އެއްބަސްވުމުގެ ތެރޭގައި ހިމެނެއެވެ.

ހިރާނިސް ފާމަސޫޓިކަލްސްއަކީ ދުނިޔޭގެ ފެންވަރުގައި ފާހަގަކޮށްލެވޭ، އަދި ބައިނަލްއަޤްވާމީ ބާޒާރުގައި ބޮޑު މަޤްބޫލުކަމެއް ހޯދާފައިވާ ކުންފުންޏެކެވެ. އެ ކުންފުނިން އުފައްދާ މެޑިކަލް އުފެއްދުންތައް އޭޝިއާގެ އެކި ޤައުމުތައް ކަމަށްވާ އަފްޣާނިސްތާނާއި ފިލިޕީންސް ފަދަ ޤައުމުތަކުގެ އިތުރުން ދުނިޔޭގެ އެހެނިހެން މާކެޓްތަކަށްވެސް އެކްސްޕޯޓް ކުރެއެވެ. އެހެންކަމުން، މި ކުންފުންޏާއެކު ވެވުނު މި ޕާޓްނަރޝިޕަކީ ރާއްޖޭގެ ޞިއްޙީ ދާއިރާއަށް ލިބުނު ވަރަށް މުހިންމު އަދި ސްޓްރެޓެޖިކް ކުރިއެރުމެކެވެ.