އެމްއައިބީ އޭދަފުށި ބްރާންޗުން ބ. އަތޮޅަށް މާލީ ޚިދުމަތްތައް ފަހިވާނެ: މިނިސްޓަރ ޒަރީރު

މޯލްޑިވްސް އިސްލާމިކް ބޭންކް (އެމްއައިބީ)ގެ ބ. އޭދަފުށި ބްރާންޗު މިއަދު ހުޅުވުމާ ގުޅިގެން، ބ. އަތޮޅުގައި މާލީ ޚިދުމަތްތައް ލިބިގަތުމުގެ ފުރުސަތު ފުޅާވެ، އިޤްތިޞާދީ ހަރަކާތްތަކަށް ބޮޑު އެހީތެރިކަމެއް ލިބިގެންދާނެ ކަމަށް މިނިސްޓަރ އޮފް ފިނޭންސް އެންޑް ޕަބްލިކް އެންޓަޕްރައިޒަސް ހަސަން ޒަރީރު ވިދާޅުވެއްޖެއެވެ.

މިނިސްޓަރ ޒަރީރު މި މޭރުމުން ވިދާޅުވީ، އޭދަފުށީގައި ބޭއްވި އެ ބްރާންޗު ރަސްމީކޮށް ހުޅުވުމުގެ ހަފްލާ ޝަރަފްވެރިކޮށްދެއްވައި ވާހަކަފުޅު ދައްކަވަމުންނެވެ.

ޝަރީޢާ ހުއްދަ ބޭންކިން ޚިދުމަތްތައް ރަށަށް ތަޢާރަފްވުމުން، ވިޔަފާރިވެރިންނާއި މަސްވެރިންގެ އިތުރުން، ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް، އަދި ޢާންމު ރައްޔިތުންނަށް ފައިދާ ކުރާނެ ކަމަށާއި، ކުދި އަދި މެދު ފަންތީގެ ވިޔަފާރިތަކަށް ފައިނޭންސިން ހޯދައި ވިޔަފާރި ފުޅާ ކުރުމުގެ ފުރުސަތު ތަނަވަސްވެގެންދާނެ ކަމަށް ވެސް މިނިސްޓަރ ވިދާޅުވިއެވެ.

ރާއްޖޭގެ ހުރިހާ ހިސާބަކަށް ހަމަހަމަ ގޮތެއްގައި މާލީ ޚިދުމަތްތައް ފޯރުކޮށްދިނުން ފުޅާ ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ސިޔާސަތުގެ މައި ތަނބެއް ކަމަށާއި، ރާއްޖޭގެ ހުރިހާ ސަރަހައްދެއްގެ ރައްޔިތުންނަށް ބޭންކިން އަދި މާލީ ޚިދުމަތްތަކުން ފައިދާ ލިބިގަތުމުގެ ފުރުސަތު ކަށަވަރު ކޮށްދިނުމަށް ސަރުކާރުން ވަރަށް ބޮޑު އިސްކަމެއް ދެއްވާ ކަމަށް ވެސް މިނިސްޓަރ ވިދާޅުވިއެވެ.

ބ. އަތޮޅަކީ ޔުނެސްކޯ ބަޔޮސްފިއަރ ރިޒާވެއް ކަމަށްވާއިރު، ފަތުރުވެރިކަމުގެ ދާއިރާގައި ޤައުމީ ފެންވަރުގައި ވަރަށް ބޮޑު ދައުރެއް އަދާ ކުރާ ސަރަހައްދެއް ކަން ފާހަގަ ކުރައްވަމުން، ފަތުރުވެރިކަމާ ގުޅިފައިވާ ވިޔަފާރިތަކަށާއި، އެ ސަރަހައްދުގެ އިޤްތިޞާދީ ހަރަކާތްތަކަށް ވެސް ބ. އޭދަފުށީ ބްރާންޗު ހުޅުވުމުން ފައިދާ ކުރާނެ ކަމަށް މިނިސްޓަރ ވިދާޅުވިއެވެ.

ރާއްޖޭގެ ހުރިހާ ހިސާބަކަށް ޒަރޫރީ މާލީ ޚިދުމަތްތައް ފުޅާކުރުން ކުރިއަށް ގެންދިއުމަށް އެމްއައިބީ އަދި އެހެނިހެން މާލީ މުއައްސަސާތަކުން ކުރައްވަމުންގެންދަވާ މަސައްކަތްތައް ފާހަގަކުރައްވައި، އެކަމަށް ކުރެވޭ ކޮންމެ މަސައްކަތަކަށްވެސް ސަރުކާރުގެ ފުރިހަމަ އެއްބާރުލުމާއި އެހީތެރިކަން ލިބިގެންދާނެ ކަމުގެ ޔަޤީންކަން ވެސް ދެއްވިއެވެ.