ބުކިންގް ޑޮޓް ކޮމްގެ ނަމުގައި ފައިސާ ފޭރޭ މައްސަލައަކަށް ސަމާލުވާން ފުލުހުން އިލްތިމާސްކޮށްފި

ބުކިންގް ޑޮޓް ކޮމްގެ ނަމުގައި އޮޅުވާލައިގެން މެސެޖުތަކެއް ފޮނުވައި، ބޭންކިންގް މައުލޫމާތު ހޯދުމަށްފަހު ފައިސާ ފޭރޭ މައްސަލައަކަށް ސަމާލުވުމަށް ދިވެހި ފުލުހުންގެ ޚިދުމަތުން އާންމުންނަށް އިންޒާރު ދީފިއެވެ.

ފުލުހުންގެ އެންޓި-ސްކޭމް ސެންޓަރުން ބުނީ، ސްކޭމަރުން ބުކިންގް ޑޮޓް ކޮމްގެ ނަމުގައި މެސެޖުތައް ފޮނުވަމުންދަނީ ރިފަންޑް ފައިސާ ލިބޭނެ ކަމަށް ބުނެ ކަމަށެވެ. މި މެސެޖުތަކުގައި ހިމަނާފައިވާ ލިންކުތަކަކީ ކާޑުގެ މައުލޫމާތާއި އެހެނިހެން ސިއްރު މައުލޫމާތު ހޯދުމަށްޓަކައި ހަދާފައިވާ "ފިޝިންގް" ވެބްސައިޓުތަކެއް ކަމަށް ފުލުހުން މައުލޫމާތުދެއެވެ.

މިގޮތުން ފޮނުވާ މެސެޖުތަކުގައި، ރިފަންޑް ފައިސާ ލިބޭނެ ކަމަށް ބުނެ، މެސެޖު ލިބޭ މީހާގެ އެކައުންޓް ވެރިފައި ކުރުމަށްޓަކައި ލިންކަކަށް ފިތުމަށް ބާރުއަޅައެވެ. ފުލުހުން ހިއްސާކުރި ފޮޓޯއެއްގައިވާ ގޮތުން، "1474" އިން ފޮނުވާ މި މެސެޖުގައި 9،600 ރުފިޔާގެ ރިފަންޑެއް ލިބޭނެ ކަމަށް ބުނެފައިވެއެވެ. އަދި އެ ފައިސާ ހޯދުމަށްޓަކައި 24 ގަޑިއިރު ތެރޭގައި އެކައުންޓް ވެރިފައި ކުރުމަށް އަންގައި ލިންކެއް ދީފައިވެއެވެ.

އެންޓި-ސްކޭމް ސެންޓަރުން ފާހަގަކުރި ގޮތުގައި، މިއީ އޮޅުވާލުމެއްކަން ދެނެގަނެވޭނެ ބައެއް ކަންކަން އެ މެސެޖުގައި ހިމެނެއެވެ. އޭގެ ތެރޭގައި ބުކިންގް ޑޮޓް ކޮމްގެ ރަސްމީ ވެބްސައިޓުގެ ބަދަލުގައި ޝޯޓް ލިންކުތައް ބޭނުންކުރުމާއި، ވަކި ވަގުތެއްގެ ތެރޭގައި އެކަން ނުކޮށްފިނަމަ ފައިސާ ނުލިބޭނެ ކަމަށް ބުނެ ބިރުދެއްކުން ނުވަތަ އަވަސްއަރުވާލުން ހިމެނެއެވެ.

ފުލުހުން ނޯޓުކުރި ގޮތުގައި، އެއްވެސް އިތުބާރު ހުރި ކުންފުންޏަކުން މެސެޖު މެދުވެރިކޮށް ލިންކެއް ފޮނުވައިގެން، ރިފަންޑް ދިނުމަށް ކާޑުގެ ނަންބަރާއި، މުއްދަތު ހަމަވާ ތާރީޚާއި އަދި ބޭންކިންގް އެހެން މައުލޫމާތެއް ނުއަހާނެއެވެ. އެހެންކަމުން، ޝައްކުކުރެވޭ ލިންކުތަކަށް ނުފިތުމަށާއި، ކާޑުގެ މައުލޫމާތާއި އޯ.ޓީ.ޕީ ނުވަތަ އަމިއްލަ އެއްވެސް މައުލޫމާތެއް އެއްވެސް ފަރާތަކާ ހިއްސާނުކުރުމަށް ފުލުހުން ވަނީ އިލްމިތާސްކޮށްފައެވެ.

މިފަދަ ކަންކަމުގައި މައުލޫމާތު ސާފުކުރުމަށް ބުކިންގް ޑޮޓް ކޮމްގެ ރަސްމީ ވެބްސައިޓް ނުވަތަ މޮބައިލް އެޕްލިކޭޝަން ބޭނުންކުރުމަށް ފުލުހުން ލަފާދެއެވެ.

"ފިޝިންގް" ސްކޭމަކީ އިތުބާރު ހުރި މުއައްސަސާއެއް ނުވަތަ ކުންފުންޏެއްގެ ނަމުގައި މީހުންނަށް އޮޅުވާލައިގެން، އެމީހުންގެ އަމިއްލަ، މާލީ ނުވަތަ އެކައުންޓް މައުލޫމާތު ހޯދުމަށް ހިންގާ އޮންލައިން މަކަރާއި ހީލަތުގެ ބާވަތެކެވެ. މީގެ ކުރިން ވެސް ސަރުކާރުގެ ބޯހިޔާވަހިކަމުގެ މަޝްރޫއުތަކާއި މަޝްހޫރު ކުންފުނިތަކުގެ ނަމުގައި މިފަދަ ސްކޭމްތައް ހިންގައި، ގިނަ ބައެއްގެ އަތުން ބޮޑެތި އަދަދުތަކުން ފައިސާ ފޭރިފައިވާކަން ފުލުހުން ފާހަގަކުރެއެވެ.