ބޭރުގައި ކިޔަވާ ދަރިވަރުންގެ ވިސާ ފީ ދެއްކުމަށް ބީއެމްއެލް އިން ކާޑު ލިމިޓް އިތުރުކޮށްފި

ރާއްޖޭން ބޭރުގައި މަތީ ތައުލީމު ހާސިލުކުރަމުންދާ ދިވެހި ދަރިވަރުންނަށް ބޭނުންވާ ބޭރު ފައިސާގެ ދަތިކަން ހައްލުކޮށްދިނުމުގެ ގޮތުން، ވިސާއާ ގުޅުންހުރި ފީތައް ދެއްކުމަށް ކާޑު ލިމިޓް އިތުރުކޮށްދޭން ބޭންކް އޮފް މޯލްޑިވްސް (ބީއެމްއެލް) އިން ނިންމައިފިއެވެ.

ބީއެމްއެލް އިން ނެރުނު ބަޔާނެއްގައި ބުނެފައިވަނީ، މިއީ ރާއްޖޭން ބޭރުގައި ކިޔަވާ ދަރިވަރުންނަށް އިތުރު އެހީތެރިކަން ފޯރުކޮށްދިނުމުގެ ގޮތުން ނިންމި ނިންމުމެއް ކަމަށެވެ. ބޭންކުގެ ތަރުޖަމާނު މުޙައްމަދު ސައީދު ވިދާޅުވި ގޮތުގައި، މީގެ ކުރިންވެސް ވަކިވަކި ކޭސްތަކަށް ބަލައި ދަރިވަރުންނަށް ކާޑު ލިމިޓް އިތުރުކޮށްދީފައިވެއެވެ. ނަމަވެސް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެހީތެރިކަމާއެކު، މިހާރު ވަނީ ވިސާ ފީ ދެއްކުމަށް އެދޭ ޝަރުތު ހަމަވާ ހުރިހާ ދަރިވަރުންނަށް މި ފުރުސަތު ހުޅުވާލަން ނިންމާފައެވެ.

މިހާރުވެސް ބޭރުގައި ކިޔަވާ ދަރިވަރުންނަށް ކިޔަވައިދޭ މަރުކަޒުތަކުގެ ފީ ދެއްކުމަށާއި ދިރިއުޅުމުގެ ޚަރަދުތަކަށް ބޭނުންވާ ބޭރު ފައިސާ ފޯރުކޮށްދިނުމުގެ އިންތިޒާމުތައް ބޭންކުން ވަނީ ހަމަޖައްސާފައެވެ. އެގޮތުން، ބޭރުގައި ކިޔަވާ ދަރިވަރުންނަށް މަހަކު 1,200 އެމެރިކާ ޑޮލަރާ ހަމައަށް ކާޑު ލިމިޓް ބޭނުންކުރެވެއެވެ.

މީގެ އިތުރުން، ދަރިވަރުން ނުވަތަ ބެލެނިވެރިންގެ ދިވެހި ރުފިޔާ އެކައުންޓުން ޓެލެގްރަފިކް ޓްރާންސްފަރ (ޓީޓީ) މެދުވެރިކޮށް ކޯސް ފީ އާއި ތައުލީމާ ގުޅުންހުރި އެހެނިހެން ޚަރަދުތައް ދެއްކުމުގެ ފުރުސަތުވެސް ބީއެމްއެލް އިން ފޯރުކޮށްދެއެވެ. އަދި ރާއްޖޭގައި ހުންނަ ރުފިޔާ އެކައުންޓުން، ކިޔަވަން ހުންނަ ގައުމުގައި ބޭނުންކުރާ އެކައުންޓަށް ފައިސާ ފޮނުވުމުގެ އިންތިޒާމުވެސް ވަނީ ހަމަޖައްސައިދީފައެވެ.

ބީއެމްއެލް އިން ބުނީ ބޭރުގައި ކިޔަވާ ދަރިވަރުންނަށް ބޭނުންވާ ބޭންކިންގ ޚިދުމަތްތައް ފަސޭހަކަމާއެކު ފޯރުކޮށްދިނުމުގައި އެ ބޭންކުން އަބަދުވެސް ދެމިތިބޭނެ ކަމަށެވެ.