ދިވެހިރާއްޖެއާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުމާ ގުޅޭގޮތުން މަޝްވަރާކޮށްފި

ދިވެހިރާއްޖެއާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުމެއް (އެފް.ޓީ.އޭ) ގާއިމުކުރުމާ ގުޅޭގޮތުން ކުރިއަށްދާ މަޝްވަރާތަކާއި، ދެ ގައުމުގެ ދެމެދުގައި އިންވެސްޓްމަންޓްތައް އިތުރުކުރުމަށްޓަކައި އެކުލަވައިލާ "ބައިލެޓްރަލް އިންވެސްޓްމަންޓް ޓްރީޓީ" ނިންމުމާ ގުޅޭގޮތުން މުހިންމު މަޝްވަރާތަކެއް ބާއްވައިފިއެވެ.

މި މަޝްވަރާތައް ބާއްވާފައިވަނީ އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު މިހާރު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، އިންޑިއާގެ ކޮމާސް އެންޑް އިންޑަސްޓްރީ މިނިސްޓަރު ޕިޔުޝް ގޯޔަލްއާ އެކު ބޭއްވެވި ބައްދަލުކުރެއްވުމުގައެވެ.

އިގުތިސާދީ ވަޒީރު މުހައްމަދު ސައީދު ވިދާޅުވި ގޮތުގައި، މި ބައްދަލުވުމުގައި ދެ ގައުމުގެ ދެމެދުގައިވާ އިގުތިސާދީ ގުޅުން އިތުރަށް ހަރުދަނާކުރުމާ ގުޅޭގޮތުން ވަރަށް އުއްމީދީ އަދި ބިނާކުރަނިވި މަޝްވަރާތަކެއް ކުރެވުނެވެ. މިގޮތުން، މިނިވަން ވިޔަފާރީގެ އެއްބަސްވުމުގެ އިތުރުން، ވިޔަފާރިއާއި އިންވެސްޓްމަންޓްގެ ދާއިރާއިން އާ ފުރުސަތުތައް ހޯދުމާއި، ދެ ގައުމުގެ އިގުތިސާދީ ގުޅުން އާ ހަރުފަތަކަށް ގެންދިއުމަށް ކުރެވިދާނެ ކަންކަމާ ގުޅޭގޮތުން ވާހަކަދެކެވުނެވެ.

ވަޒީރު ސައީދު އިތުރަށް ފާހަގަކުރެއްވި ގޮތުގައި، މި މަސައްކަތްތަކަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދި އިންޑިއާގެ ބޮޑުވަޒީރު ނަރެންދުރަ މޯދީ ގެންގުޅުއްވާ ތަސައްވުރުގެ ދަށުން، ދެ ގައުމަށް ފައިދާހުރި ގޮތެއްގައި އިގުތިސާދީ ގުޅުން ބަދަހިކުރުމަށް ދެއްވާ އަހައްމިއްޔަތު ރަމްޒުކޮށްދޭ ކަމެކެވެ. ދެ ގައުމުން ވެސް ގަބޫލުކުރާ ގޮތުގައި އާ އިންވެސްޓްމަންޓްތަކާއެކު ދެ ގައުމުގެ ދިގު މުއްދަތުގެ ގުޅުން އިތުރަށް ވަރުގަދަވެގެންދާނެއެވެ.

އިގުތިސާދީ ވުޒާރާއިން ހާމަކުރި ގޮތުގައި، މި ބައްދަލުވުމުގައި ދެ ފަރާތުން އެއްބަސްވީ ދެމެހެއްޓެނިވި އިގުތިސާދީ ތަރައްގީއަށް އަމާޒުކޮށްގެން ގުޅުން ބަދަހިކުރުމަށެވެ. އަދި ހުށަހެޅިފައިވާ މިނިވަން ވިޔަފާރީގެ އެއްބަސްވުމުގެ ސަބަބުން ދެ ގައުމުގެ ވިޔަފާރިތަކަށް އާ މާކެޓްތައް ހުޅުވި، ވިޔަފާރިކުރުމުގައި ހުރި ހުރަސްތައް ނެތިގެންގޮސް، އިންވެސްޓަރުންނަށް ފަހި މާހައުލެއް ގާއިމުވާނެ ކަމަށް ބެލެވެއެވެ.

މި ބައްދަލުކުރެއްވުމުގައި އިންޑިއާއަށް ކަނޑައަޅުއްވާފައި ހުންނަވާ ދިވެހި ސަފީރު އައިޝަތު އަޒީމާގެ އިތުރުން، އިގުތިސާދީ ވުޒާރާއާއި ހައިކޮމިޝަނުގެ އިސްވެރިން ބައިވެރިވެވަޑައިގެންނެވިއެވެ.