ސިޔާސީ ފިކުރަށް ބަލައި ވަޒީފާއިން ވަކިކުރުމުގެ ސަގާފަތް މި ސަރުކާރުން ނައްތާލައިފި: އިބްރާހިމް ޝުޖާއު
ސިޔާސީ ގޮތުން މުވައްޒަފުން ވަޒީފާއިން ވަކިކުރާ ކަމަށް ބުނެ އިދިކޮޅު އެމްޑީޕީން އިހުތިޖާޖު ކުރަން ނިންމާފައިވާ ދަނޑިވަޅެއްގައި، ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު އެ ޕާޓީއަށް ވަރުގަދަ ރައްދެއް ދެއްވައިފިއެވެ.
ޝުޖާއު މި ރައްދު ދެއްވީ "ސިޔާސީ ގޮތުން މުވައްޒަފުން ވަކިކުރާ މައްސަލާގައި ބުރާސްފަތި ދުވަހު މުޅި ރާއްޖޭގައި އިހުތިޖާޖު ކުރަން އެމްޑީޕީން ނިންމައިފި" ކަމަށް ބުނެ ލިޔެފައިވާ ޚަބަރަކާ ގުޅިގެން އެކްސްގައި ކުރެއްވި ޕޯސްޓެއްގައެވެ.
ޝުޖާއު ވިދާޅުވީ، އެމްޑީޕީގެ ވެރިކަމުގައި އެތައް ސަތޭކަ މުވައްޒަފުންނެއް ވަޒީފާއިން ވަކިކުރީ ހަމައެކަނި ޕީޕީއެމް/ޕީއެންސީގެ ފިކުރުގެ މީހުންނަށް ވީތީ ކަމަށެވެ. އަދި ސަރުކާރަށް ސަނާ ނުކިޔައިގެން ވަޒީފާއިން ވަކިކުރި މުވައްޒަފުންނަށް ފޮނުވި ޗިޓްތައް، އެ މުވައްޒަފުންގެ ގޭގޭގެ ސިޓިންގ ރޫމް ފާރުތަކުގައި މިހާރުވެސް ހަރުކޮށްފައި އެބަހުރި ކަމަށާއި، އެކަން ބައްލަވައިލެއްވުމަށް ޝުޖާއު ގޮވާލެއްވިއެވެ.
"އެދަފްތަރު އަޅުގަނޑުމެން އަތުގައި އެބައޮތް. ބޮޑު ބަދަލަކީ އެ މުވައްޒަފުންނަށް ރައީސް ޑރ. މުޙައްމަދު މުޢިއްޒު ވަނީ އަނބުރާ އެބޭފުޅުންގެ ހައްޤު ދެއްވާފައި،" ޝުޖާއު ވިދާޅުވިއެވެ.
މީގެ އިތުރުން، މި ސަރުކާރުން ސިޔާސީ ފިކުރު ތަފާތުވެގެން އެއްވެސް މުވައްޒަފަކު ވަޒީފާއިން ވަކިނުކުރާނެ ކަމުގެ ޔަގީންކަން ދެއްވަމުން، އޮޅުވާލުމުގެ ތެރޭގައި ނޫޅުއްވުމަށް ޝުޖާއު ވަނީ އިދިކޮޅު ފަރާތްތަކަށް އިލްތިމާސް ކުރައްވާފައެވެ.
ރައީސް ޑރ. މުޢިއްޒުގެ ސަރުކާރުން ގެންގުޅުއްވާ ސިޔާސަތަކީ އެއްވެސް މީހަކު ސިޔާސީ ފިކުރަކަށް ބަލައި ވަޒީފާއިން ވަކިނުކުރުން ކަމަށް ސަރުކާރުގެ އިސްވެރިން މީގެ ކުރިންވެސް ވަނީ ތަކުރާރުކޮށް ވިދާޅުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
